Буџинкан Македонија

Author dovezenskiPosted on јануари 1, 2023јануари 3, 2023Categories Почетна

Еден ден пред новогодишната вечер, во скопското Доџо на Организацијата „Пат кон Сонцето“ се одржа полагање за повисоки степени за учениците на Буџинкан Македонија.

Свечениот настан почна во 17 часот, при што најпрво беа тестирани најмладите членови од секцијата „Нинџа Клинци“, а потоа и членовите од почетничката и од напредната група.

Им честитаме на сите ученици кои успешно положија за повисок степен, а посебно го истакнуваме полагањето на Ведран Чичов, кој беше тестиран за највисоко звање од останатите кандидати (за трети кју).

По завршувањето на тестирањето (Шикен), во 22.0о часот започна новогодишната прослава (БоненКаи), која има за цел да се заборават и да се простат сите неубави настани од старата и да се влезе чист во новата година.

Author dovezenskiPosted on јануари 1, 2023јануари 2, 2023Categories Почетна

Неколку дена пред крајот на 2022 година, излезе од печат вториот дел од првата буџинкан манга во светот, овој пат насловена како „Такаматсу во Кина – Мисијата во Шилијнхот“.

Ова издание на Организацијата „Пат кон Сонцето“, чиј автор е учителот на Буџинкан Македонија – Игор Довезенски, а илустрирано од страна на неговиот ученик Таки Гаковски, се заврши точно за година и половина од издавањето на првиот стрип „Такаматсу во Кина – Борбата со Чо Ширју“.
Првото издание се продаде во тираж од над 500-тини примероци од кои 400-тини беа на англиски јазик. „Такаматсу во Кина – Борбата со Чо Ширју“ најде дом и пристигна на сите населени континенти.

Во моментов се работи на организирање на официјална промоција на македонското издание, а истовремено членот на Буџинкан Македонија – Ксенија Довезенска, работи на преводот на англиската верзија, по што ќе се испечати истата и ќе почне продажбата на глобално ниво.

Author dovezenskiPosted on декември 26, 2022декември 26, 2022Categories Почетна

Како за крај на 2022 година, во Буџинкан Македонија се оддржа Џиссен Хеихо семинар, со намера да се потсетиме на фанатичните тренинзи кои во нашето Доџо редовно се практикуваа во минатото. Не дека и сега сме заслабнале, меѓутоа го следиме пулсот на генерациите и на времето, па во некои аспекти од тренингот се прилагодуваме кон нив.

На вчерашниот семинар, воглавно учествуваа Семпаите односно постарите ученици кои на времето редовно вежбале Џиссен Хеихо. За тие кои не знаат, тоа е систем развиен од страна на учителот Игор Довезенски, со цел максимално да се искористи борбената стратегија на традиционалните јапонски борбени вештини и полесно да се прилагоди на денешниот начин на борба.

Веќе во петок не очекува годишното полагање за звања, по што следува мала новогодишна прослава (БоненКаи).

Author dovezenskiPosted on декември 5, 2022декември 26, 2022Categories Почетна

На 27 ноември, во скопското Доџо на Буџинкан Македонија, се одржа семинар на тема Шинкен Гата – Тора но Маки.

Овој систем на борба кој потекнува од традиционалната школа Кукишинден рју Дакентаиџутсу е познат по својата динамичност и борбеност. Тоа секако е доволна причина за интерес кај членовите на Организацијата „Пат кон Сонцето“, кои се познати по желбата за тежок и напорен тренинг исполнет со болка.

За време на настанот. учителот Довезенски предаваше техники од првото и од второто ниво на Тора но Маки.

Author dovezenskiPosted on ноември 17, 2022декември 26, 2022Categories Почетна

На 29-30 октомври, во Истанбул (Турција) се одржа третиот по ред меѓународен БуЈуКаи семинар. На настанот, учество земаа околу 40-тина практиканти од Македонија и од земјата домаќин.

Инаку, овој меѓународен семинар се одржува два пати годишно, а како предавачи се учителите Игор Довезенски (Буџинкан Македонија) и Ерџан Шарбат (Буџинкан Турција). Замислен како собор и споделување на искуството на инструкторите, како и меѓусебно дружење и запознавање на учесниците, семинарот секоја година привлекува се повеќе практичари на јапонските боречки вештини.

Следниот БуЈуКаи ќе се одржи во Македонија во мај (2023), а на истиот се очекува да се придружи уште ден реномиран учител од Буџинкан Доџо.

Author dovezenskiPosted on октомври 20, 2022октомври 20, 2022Categories Почетна

Со есенскиот „Тогакуре рју Нинџа Викенд“, Доџото за класични јапонски боречки вештини Буџинкан Македонија ја затвори сезоната на тренинзи во Хомбу за 2022 година. На семинарот учествуваа 14 членови на нашето Доџо, како и еден учесник од Турција, со што семинарот доби меѓународен карактер.

За време на настанот, учителот Игор Довезенски динамично го подигнуваше ритамот, менувајќи ги често техниките, како и оружјата со кои учесниците ги вежбаа разните одбрани и напади. Многубројните комбинации и варијанти, само ја зголемуваа возбудата, а тренингот се повеќе наликуваше на боено поле.

Како и секогаш, слободното време беше предвидено за дружба и друштвени игри, со цел што повеќе да се зближат членовите на најдинамичното европско Доџо.

Важен момент за време на семинарот, беше доделувањето на бронзен медал „Генин“ на семпаи Таки Гаковски, за неговата посветеност и служба во Буџинкан Македонија. Му честитаме и му посакуваме понатамошен напредок на Патот.

Author dovezenskiPosted on септември 29, 2022септември 29, 2022Categories Почетна

На покана на Александар Дујин од нинџутсу клубот Буџинкан Нови Бечеј, чие доџо е полноправен член на Буџинкан Србија, викендов што измина водачот на Буџинкан Македонија, Игор Довезенски, одржа предавање на школата Гјокко рју Кошиџутсу на настанот насловен како БуЈуКаи Србија.

На семинарот учествуваа и предавачи од Хрватска, Австрија, како и неколкумина од земјата домаќин, а заедно со учителот Довезенски од Македонија отпатуваа и седуммина негови ученици кои со своето знаење и енергија предизвикаа огромен интерес кај останатите.

Презадоволни од начинот на предавање и интерпретирање на катите од страна на учителот Довезенски, домаќините веднаш го поканија да подучува и следната година, при што поканата со задоволство беше прифатена.

На крајот, упатуваме благодарност до организаторот кој се погрижи целиот престој да помине во најдобар ред и истовремено го истакна своето гостопримство кон членовите на Буџинкан Македонија.

Author dovezenskiPosted on септември 14, 2022септември 14, 2022Categories Почетна

Еден ден по семинарот за Оно (самурајска воена секира), засилени со уште неколкумина учесници, членовите на Буџинкан Македонија уживаа во уште еден семинар, овој пат за Лак и Стрела (Јуми Ја).

За време на настанот, воините на Буџинан Македонија ги тестираа своите вештини во гаѓање, во три мети и со пет различни видови лакови.

Семинарот за Јуми Ја е еден од најстарите во Буџинкан Македонија и редовно се одржува уште од самото основање на Доџото, во 1995 година.

Се гледаме на следниот настан.

Author dovezenskiPosted on септември 14, 2022септември 14, 2022Categories Почетна

Во дворот на Организацијата „Пат кон Сонцето“, во саботата се одржа одличен семинар за Оно.

На настанот учествуваа десет членови на Буџинкан Македонија, од кои некои од нив, за прв пат се сретнаа со ова необично оружје од арсеналот на јапонските средновековни воини.

Вечерта, како и секогаш, помина во одлична атмосфера и дружба меѓу соборците, зачинета со заедничка Окономијаки вечера и друштвени игри.

Author dovezenskiPosted on август 22, 2022август 23, 2022Categories Почетна

Најголемиот и највеличенствениот настан што се одржува под покровителство на Организацијата „Пат кон Сонцето“, успешно ја испиша и 14-тата страница во клупската историја.

Во периодот меѓу 4 и 12 август, членовите на Буџинкан Македонија имаа можност да уживаат во деветте незаборавни денови исполнети со тренинзи, а збогатени и со најразлични активности и дружби.

Бидејќи не постојат зборови да се опише возбудата и среќата кои се верни и гарантирани придружници на нашите летни кампови, ни останува само да Ве поканиме следната година да бидете дел од овој наш преубав настан.