Буџинкан Македонија

Author dovezenski

Семинар за ракување со пушка, се одржа во дворот на Хомбу Доџото на Организацијата за изучување класични јапонски боречки вештини – Пат кон Сонцето.

На настанот, учениците на Буџинкан Македонија имаа можност да се запознаат со техниките и положбите на стрелање од школата Геки рју Хоџутсу. За таа цел, место јапонска пушка-кременарка, учесниците користеа воздушни пушки, меѓутоа запазувајќи ги принципите и начините на Танегашима-та.
Инаку, за време на најплодниот период за развој на јапонските рју-ха, во Земјата на Изгрејсонцето постоеле околу 400-тина Хоџутсу школи.

На крајот на семинарот, беше договорено доколку и во иднина постои интерес за повторување на овој настан, тој да влезе во редовниот календар на настани на Буџинкан Македонија.

Author dovezenski

Тринаесет години по ред долината и ридовите под Липац ечат од грмогласните извици на Воините на Буџинкан Македонија кои секој последен викенд во март се собираат во Хомбу Доџото со цел да ги усовршуваат своите техники за борба со копје (СоЏутсу).

Оваа година, семинарот се одржа на ивицата на шумата Млака, на ливада опкружена со многу столетни трепетликови дрвја, а на настанот учество земаа 20 членови на нашето Доџо.

Под водство на учителот Довезенски и со срдечна помош при предавањето од страна на неговиот помошник Марко Опачиќ, учесниците имаа можност да уживаат во велелепните СоЏутсу техники од школата Шинден Фудо рју Дакентаиџутсу.

За следната година очекуваме бројот на учесници уште повеќе да се зголеми и да го срушиме рекордот по бројност на легендарниот семинар „Силата на Јари“.

Author dovezenski

Еднодневен семинар на тема ШурикенЏутсу се одржа во саботата во дворот на Хомбу Доџото на Организацијата „Пат кон Сонцето“.

Настанот оваа година привлече многу нови заинтересирани од почетничката група на Буџинкан Македонија, со што атмосферата беше уште повеличенствена.

Сите учесници покажаа солидни резултати, а кај некои од нив напредокот беше и повеќе од задоволителен, па така учителот Игор Довезенски на својот ученик Владимир Атновски му додели копија од Деншо (прирачник) за техниките на гаѓање со Шурикени.

Вечерта во Доџото се одржа презентација на видеото од школата Асајама Ичиден рју Таиџутсу, а потоа имаше и „нинџа кино“ односно учесниците уживаа во класичниот шиноби филм од осумдесетите „Моли за смрт/Pray for death“.

Author dovezenski

Дождот што паѓаше во текот на вчерашниот ден, направи уште попријатна атмосфера за време на семинарот што се одржа во скопското доџо на Буџинкан Македонија.

Учесниците имаа можност да ги вежбаат основните положби на телото, како и ударите и блоковите од школите Гјокко рју Косшиџутсу и Кото рју Коппоџутсу.

Веќе од следниот викенд, се отвора новата сезона во Хомбу Доџото на Организацијата „Пат кон Сонцето“, а за две недели закажан е првиот семинар за 2022-ра, во овој храм на јапонските класични борбени вештини.

Author dovezenski

Десеттиот и воедно последен „Детски Нинџа Маратон“, се одржа вчера во скопското доџо на Буџинкан Македонија. На програмата беа неколку техники за самоодбрана, како и техники за бешумно движење.

Со овој семинар, се затвора циклусот на зимски детски маратони, а веќе од следната зима, планиран е нов настан со наслов „Детски Нинџа Самит“, при што освен нинџутсу техники, децата ќе се забавуваат со многу забавни игри и лотарии.

Author dovezenski

Втората сезона на кулинарското шоу „Манџа“ веќе се крчка во студиото на Канал 5, а во првата епизода ќе ги гледате семпаи Сања и шидоши хо Владимир, кои ќе ги претставуваат боите на Буџинкан Македонија.

Се очекува снимањата и постпродукцијата да завршат за отприлика еден месец,  а тогаш ќе имате можност да го проследите нашето гостување во емисијата. Ќе видите неколку техники за самоодбрана, а ќе дознаете нешто и за нинџа-диетата која ја практикуваме.

Иако се трудиме да ги избегнуваме гостувањата во телевизиските емисии и шоуа, не можевме да ја одбиеме поканата на шармантниот Кирил Трајковски Максим, бидејќи еден краток период актерот и водител вежбаше во нашето Доџо, а кај нас важи максимата: еднаш пријател на Доџото – засекогаш пријател на Доџото.

Author dovezenski

Над триесет учеснички во текот на вчерашниот ден уживаа во прекрасната атмосфера која постојано лебдеше во воздухот за време на традиционалната „Работилница за Самоодбрана за Жени“ која се одржува еднаш годишно во организација на Буџинкан Македонија.

За прв пат во Република Македонија, овој настан започнавме да го организираме уште во 2008 година и оттогаш стана синоним за квалитетна обука на припадничките на поубавиот пол.

За време на Работилницата, се изучуваат разни техники за самоодбрана од насилници и тоа според различни сценарија кои потенцијално и реално би можеле да се случат.

Инаку, учителот Игор Довезенски за време на настанот инсистира на подеднаква застапеност како на физичките, така и на менталните техники за подготовка на жените при можни несакани дејствија, па затоа неговите помошници од доџото се во улога на разбојници, со цел учесничките да можат пореално да се соочат со стравот и со силата која доаѓа при нападот.

Доколку сте заинтересирани за тренинзи во нашето доџо или за специјални курсеви за самоодбрана, слободно јавете се на некои од нашите телефони или пишете ни на нашата електронска адреса.

Author dovezenski

Шиноби Таисо семинар за инструктори се одржа во неделата во скопското доџо на Буџинкан Македонија.

Присутните на настанот имаа можност да научат нови Џунан Таисо и Џунан Ундо техники, како и неколку нови манипулации на телото за балансирање на мускулната нерамнотежа.

Исто така, учителот Довезенски подучуваше начини за истегнување со таканареченото Шиноби Тркало односно реквизит кој се користи како помошно помагало за изведување на вежбите.