Буџинкан Македонија

БуЈуКаи XI во Истанбул

dovezenskiноември 3, 2026ноември 3, 2026Почетна

Изминатиов викенд, во Истанбул, Република Турција, се одржа единаесеттото издание на меѓународниот нинџутсу семинар – БуЈуКаи. Овој настан, веќе одамна прерасна во препознатлива традиција на меѓусебно дружење, размена на знаења и продлабочување на пријателството меѓу практичарите од Македонија и Турција.

Семинарот предводен од страна на Игор Довезенски и Ерџан Шарбат, со години ја негува оваа соработка, која се темели врз заедничката љубов кон традиционалните јапонски боречки вештини и искрената желба знаењето да се пренесува на следните генерации.

Во текот на семинарот, учителот Довезенски како тема за предавање ја одбра борбата на земја (Не Ваза), додека инструкторот Шарбат за своја тема jа одбра борбата со стап (ЏоЏутсу), додека вториот ден – улична самоодбрана (ГошинЏутсу).
Двајцата учители особено внимание посветија на правилното движење, рамнотежата, дистанцата, времето на реакција и природното користење на телото во борбените ситуации.

Како и секогаш, целта не беше само совладување на одреден број техники, туку разбирање на принципите што стојат зад нив. Зашто, во традиционалното Будо, техниката претставува само надворешна форма, додека вистинското знаење се крие во способноста да се препознае нејзината суштина и да се примени соодветно на конкретната ситуација.

Токму затоа, ваквите семинари имаат особена вредност. Тие овозможуваат вежбачите да излезат од секојдневната рутина на сопствените доџоа, да се соочат со поинакви пристапи, да ги преиспитаат сопствените знаења и пред сè, да продолжат да учат. Во Нинџутсу не постои конечна точка до која човек може да стигне и да каже дека го совладал сето она што треба да се знае. Патот е долг, а вистинскиот ученик останува ученик до крајот на својот живот.

Освен практичниот дел, БуЈуКаи XI беше уште една можност за продолжување на пријателството кое низ годините се изгради меѓу македонските и турските практичари. Имено, зад сите тренинзи, техники и часови поминати на татамите, стои нешто многу повредно – меѓусебната доверба, почитта и искрената човечка поврзаност.

Посебна благодарност упатуваме до нашите пријатели од Турција за гостопримството, посветеноста и вложениот труд околу реализацијата на уште едно успешно издание на овој семинар.

Се гледаме во мај во Македонија на БуЈуКаи XII.

Неделен Кусаригама семинар во Хомбу

dovezenskiоктомври 21, 2026октомври 22, 2026Почетна

Еден ден по семинарот за КјокетсуШоге, се одржа уште еден традиционален семинар, овојпат посветен на изучувањето на Кусаригама – традиционално јапонско оружје кое, заедно со КјокетсуШоге, е дел од богатото наследство на школата Тогакуре рју Нинџутсу.

На семинарот учествуваа тринаесет вежбачи од кои поголем дел претходниот ден ги изучуваа тајните на КјокетсуШоге, со што овој викенд прерасна во заокружена целина посветена на една од најпознатите древни нинџутсу школи.

Под водство на учителот Игор Довезенски, водачот на Буџинкан Македонија, учесниците имаа можност да се запознаат со специфичните карактеристики на Кусаригама, како и со техниките и принципите на неговата употреба.

Работата со ова оружје бараше посветеност, прецизност и добро разбирање на движењето, растојанието и контролата. Преку кати-те, учениците ги продлабочуваа своите знаења и се обидуваа да ги разберат принципите што се пренесуваат низ генерациите во рамките на традиционалното јапонско воено наследство.

Двата дена, кои беа исполнети со интензивна работа, размена на знаења и дружење, овозможија учесниците да ја согледаат поврзаноста меѓу различните оружја и принципите на традицијата од која потекнуваат.

Така заврши уште еден незаборавен викенд во Хомбу Доџото на Буџинкан Македонија – викенд посветен на Тогакуре рју.

КјокетсуШоге во есенски амбиент на Хомбу

dovezenskiоктомври 21, 2026октомври 22, 2026Почетна

Во саботата, во дворот на Хомбу Доџото на Буџинкан Македонија, се одржа традиционалниот семинар посветен на изучувањето на КјокетсуШоге – необично и специфично оружје од школата Тогакуре рју Нинџутсу.

За време на семинарот, учесниците имаа можност да се запознаат со техниките и принципите на употреба на ова оружје, кое зазема посебно место во богатото наследство на древната нинџа традиција.

Посебен белег на семинарот му даде прекрасната есенска идила во дворот на Хомбу. Жолтите лисја паѓаа од многубројните дрвја, создавајќи живописен амбиент, додека нивното крцкање под нозете на вежбачите ја надополнуваше атмосферата на овој несекојдневен тренинг.

Вечерта продолжи во Хомбу Доџото, каде што учителот Игор Довезенски одржа предавање на тема Чорјаку/Борјаку (Воена стратегија и тактика). Собрани околу топлиот камин, учениците со внимание ги следеа неговите предавања и имаа можност да навлезат подлабоко во принципите и значењето на оваа тема.

Уште еден прекрасен ден во Хомбу, исполнет со тренинг, нови сознанија, есенски убавини и дружење. Ден што уште еднаш потврди дека патот на традиционалното Будо не се состои само од изучување техники, туку и од заедништво, почит и постојано продлабочување на знаењето.

Одржан семинарот за Чигирики

dovezenskiсептември 21, 2026октомври 4, 2026Почетна

Еден ден по семинарот за Шурикени, во неделата, учителот Игор Довезенски го одржа и редовниот семинар посветен на оружјето Чигирики од школата Тогакуре рју.

Учениците имаа можност да ги повторат и продлабочат техниките со Чигирики од оваа древна нинџутсу традиција.

Во текот на тренингот, учесниците работеа на различните начини на употреба на оружјето, посветувајќи особено внимание на правилното движење, дистанцата и поврзувањето на техниките во целина. Како и секогаш, поискусните членови на доџото несебично помогнаа во пренесувањето и повторувањето на материјата со помладите ученици.

Убавото време и атмосферата во Хомбу Доџото придонесоа уште еден семинар да помине во одлично расположение, со многу тренинг, дружење и размена на искуства.

Тогакуре рју Шурикенџутсу во Хомбу

dovezenskiсептември 21, 2026октомври 4, 2026Почетна

Во саботата, во дворот на Хомбу Доџото на Буџинкан Македонија, се одржа семинар посветен на изучувањето на Тогакуре рју Шурикенџутсу.

На семинарот учествуваа петнаесетина вежбачи, кои имаа можност да ги изучуваат и усовршуваат различните техники на фрлање со шурикени, карактеристични за оваа древна нинџутсу школа.

Во пријатна атмосфера и со голема посветеност, повеќечасовниот тренинг помина брзо и во повторување, усовршување и совладување на техниките на фрлање метални сечива и бодежи од Тогакуре рју.

Како и секогаш, по завршувањето на тренингот следуваше дружење во Хомбу, а вечерта беше заокружена со традиционалното ноќно кино.

Уште еден убав семинар, исполнет со тренинг, дружење и нови искуства.

Едно Доџо – едно семејство.
Нинпо Иккан!!!

Заврши 18-тото издание на Летниот Нинџа Камп

dovezenskiавгуст 13, 2026август 17, 2026Почетна

Уште еден легендарен Летен Нинџа Камп е зад нас, во организација на најдинамичното Доџо во светот – Буџинкан Македонија.

Повторно, 18-ти пат по ред, учителот Игор Довезенски ги собра сите искрени љубители на јапонските традиционални боречки вештини, продолжувајќи ја традицијата на пренесување на знаењето, искуството и тајните на древните нинџа школи.

Кампот и оваа година привлече голем број учесници, а покрај Македонците, имавме учесник и од Турција, со што настанот повторно доби свој препознатлив меѓународен карактер.

Тренинзите беа силни, динамични и исполнети со предизвици, а атмосферата, како и секогаш, беше величенствена. Деветте дена поминаа во знакот на интензивно тренирање, дружење и создавање нови незаборавни спомени.

Иако 18-тиот Летен Нинџа Камп штотуку заврши, интересот за следното издание веќе започна. Пријавите и следната година ќе стартуваат уште на новогодишната ноќ, па затоа навреме подгответе се за уште една нинџа авантура.

Ви благодариме за довербата!

Одржан јубилејниот 10-ти по ред Детски Летен Нинџа Камп

dovezenskiавгуст 13, 2026август 17, 2026Почетна

Хомбу Доџото на Буџинкан Македонија повторно беше домаќин на јубилејниот десетти по ред Детски Летен Нинџа Камп, кој како и секоја година се одржа во периодот меѓу 27 јули и 2 август.

На настанот, покрај дечињата од Македонија, учествуваа и наши млади нинџи од Италија, Франција и Кина (Хонг Конг), со што и овој јубилеен камп го задржа својот меѓународен карактер.

Десеттото издание беше посебно по тоа што ја одбележа една цела деценија исполнета со дружење, тренинг, забава и нови нинџа предизвици за најмладите. Во текот на седумте дена, дечињата имаа можност да ги усовршуваат своите вештини, но и да стекнуваат нови пријателства и незаборавни спомени.

И оваа година интересот за кампот беше исклучително голем, што уште еднаш потврди дека Детскиот Летен Нинџа Камп прерасна во традиционален и препознатлив настан, не само кај нас, туку и пошироко.

Им благодариме на сите учесници и родители за довербата и поддршката, а на сите наши млади нинџи им посакуваме уште многу успешни тренинзи и нови авантури до следниот, единаесетти по ред Детски Летен Нинџа Камп!

Семинар за Кенџутсу во Хомбу

dovezenskiјули 6, 2026јули 9, 2026Почетна

Еден ден по семинарот за Нагината, во неделата, во дворот на Хомбу Доџото на Буџинкан Македонија се одржа и семинар посветен на изучувањето на Кенџутсу – традиционална јапонска вештина на борба со меч.

Под водство на учителот Игор Довезенски, учесниците имаа можност да ги вежбаат техниките на брзо извлекување на мечот, како и да работат на основните принципи на движење и борба. Како и секогаш, неговото долгогодишно искуство и начинот на кој ги пренесува знаењата овозможија сите учесници да бидат исполнети со нови сознанија и практични детали што ја збогатуваат личната обука на секој ученик.

Покрај интензивниот тренинг, не изостана ниту дружењето кое е препознатлив дел од ваквите семинари. Во паузите, под сенките на столетните ореви во дворот на Хомбу Доџото, учесниците заеднички уживаа во кафе, какао и разговори, разменувајќи искуства и впечатоци од тренингот во пријатна и опуштена атмосфера.

Уште еден успешен семинар кој потврди дека вистинското Будо не се гради само преку техниката, туку и преку заедништвото, почитта и искреното другарство кое се создава на секое заедничко вежбање.

НагинатаЏутсу во дворот на Хомбу

dovezenskiјули 6, 2026јули 8, 2026Почетна

Во саботата, во дворот на Хомбу Доџото на Буџинкан Македонија се одржа редовниот семинар посветен на изучувањето на вештината со Нагината – традиционално јапонско оружје кое со векови било составен дел од самурајската боречка традиција.

За време на семинарот беа обработени положбите на телото, основните принципи на движење, правилното користење на дистанцата, како и неколку кати и нивната практична примена. Преку повеќечасовниот тренинг, учениците имаа можност дополнително да го продлабочат своето разбирање на техниките и специфичностите на ова оружје.

Во паузите и слободното време учесниците уживаа во убавините на јапонската зен градина што се наоѓа во дворот на Хомбу Доџото. Пријатната атмосфера беше дополнета со дружење и друштвени игри на дрвената платформа, сместена во сенките на дрвјата, каде што продолжија разговорите и размената на впечатоци од тренингот.

Семинарот уште еднаш потврди дека покрај стекнувањето нови знаења и вештини, ваквите собири претставуваат можност за зацврстување на пријателствата и негување на вредностите што ги носи традиционалното јапонско Будо.

Се одржа 62-рото полагање за ученички степени

dovezenskiјуни 25, 2026јуни 26, 2026Почетна

Вечерва се одржа 62-рото полагање за ученички степени во Доџото за традиционални јапонски нинџа и самурајски боречки вештини – Буџинкан Македонија.

Веќе 31 година создаваме многу повеќе од вештина – создаваме луѓе. Воспитуваме генерации, градиме карактер, поттикнуваме самодоверба и нудиме поддршка, пријателство и чувство на припадност за деца и возрасни.

Зад секое полагање стојат години посветеност, труд, истрајност и заедништво. Зад секој ученик стои една приказна за растење.

Буџинкан Македонија – повеќе од боречка вештина. Повеќе од љубов.
Буџинкан Македонија – моја утеха, моја приказна, мој дом.