Author dovezenskiPosted on Categories ПочетнаГодината 2025-та беше година на стабилизација, продлабочување и квалитетна надградба на сето она што со години се гради во Организацијата „Пат кон Сонцето“ односно во доџоата на Буџинкан Македонија и Даито рју Македонија. Иако фокусот и понатаму беше поделен меѓу редовните семинари и континуираниот развој на Хомбу Доџото, годината донесе доволен број настани, значајни меѓународни активности и важни достигнувања кои ја потврдуваат посветеноста на сите членови.
Во текот на годината беа организирани повеќе тематски семинари во скопското Доџо и во Хомбу Доџото на Буџинкан Македонија, при што главен акцент беше ставен на практичната примена на традиционалните техники, оружја и телесната подготовка. Семинарите за СоЏутсу, КусариГама, КјокетсуШоге, Чигирики, ЈумиЈа, ХоЏутсу, како и специјализираниот семинар за Тогакуре рју Шурикенџутсу, беа посетени со голем интерес и придонесоа за продлабочување на разбирањето на Нинџутсу.
Од меѓународните настани, најзначаен беше деветтото издание на интернационалниот БуЈуКаи, одржан во Истанбул, каде што водачот на Буџинкан Македонија, Игор Довезенски, предаваше заедно со својот долгогодишен пријател и соработник Ерџан Шарбат. Настанот повторно ја потврди силната врска и континуираната соработка меѓу македонското и турското Буџинкан доџо.
И во 2025 година беа одржани летните нинџа кампови, како за деца, така и за возрасни. Камповите ја задржаа својата препознатлива форма, со интензивни тренинзи, работа во природа и силен акцент на дисциплината, заедништвото и традицијата. Двата кампа привлекоа рекордно голем број учесници, вклучувајќи и практиканти од странство, што дополнително го зацврсти меѓународниот карактер на настанот.
Во рамките на Даито рју Македонија – Корју Доџо, во текот на годината беа одржани пет семинари за Аикиџуџутсу. Меѓу нив се издвојува јануарскиот семинар кој беше одржан по покана на Македонската Аикидо Федерација, а посветен на корените на аикидо принципите, како и мартовскиот семинар со полагање за јуданша (Таки Гаковски), при што беше забележан значаен успех на домашно ниво. Семинарите во јуни, ноември и декември овозможија континуитет и систематска работа според класичната методологија на школата.
Ако направиме краток преглед со бројки, во 2025 година беа одржани вкупно 31, од кои 26 нинџутсу семинари, меѓу кои два меѓународни БуЈуКаи, два летни нинџа кампови (детски и за возрасни), како и пет семинари по Даито рју Аикиџуџутсу. Учителот Игор Довезенски предаваше на четири меѓународни настани и тоа во Турција, Чешка, Германија и САД.
Исто така вреди да се спомене дека двајца членови добија Генин медали (Тодор Ангеловски и Константин Анастасијевиќ), додека тројца семпаи положија за Нидан (II дан) и еден (Марко Опачиќ) за Јондан (IV дан). Секако, да не го заборавиме јубилејот – 30 години од основањето на „Пат кон Сонцето“ и на Буџинкан Македонија, што резултираше со неверојатно добра забава во Довезенце.
На крајот, сакаме да изразиме искрена благодарност до сите членови на Буџинкан Македонија, Даито рју Македонија и Организацијата „Пат кон Сонцето“, кои со својата посветеност, трпение и континуирана работа придонесоа и 2025 година да биде уште едно значајно поглавје во нашата заедничка приказна. Не ветуваме повеќе, но сигурни сме дека додека постои здравје во нас – Патот ќе продолжи.
Темата за 2026 година во Буџинкан Македонија ќе биде Шинден Фудо рју ДакенТаиџутсу.
Едно Доџо – Една Љубов.
Буџинкан Македонија – лојалност, посветеност, чест.
Најубавата приказна која трае и не завршува.
Нинпо Иккан!
