Буџинкан Македонија

Author koryuPosted on July 1, 2008Categories Home

На 6 јули, 2008 година, Буџинкан Македонија ќе го организира традиционалниот семинар во природа на тема Суи Рен (обука во вода).
Ова е одлична можност за сите наши членови да научат повеќе за оваа вештина која е една од 18 основни боречки вештини (Ninja Juhakkei), што секој нинџа морал да ги совлада за време на својата обука.

Тема: Суи Рен / средства за преминување преку вода, водата како оружје, алатки за дишење под вода, невидливост во водена средина, преживување преку обезбедување вода за пиење итн. (дел од техниките кои ќе се учат на семинарот)

Ден: 6 јули, 2008 (недела)

Место: Глушчево Ѓерме на Крива Река

Програма: 08.30 часот – поаѓање од Скопје
09.30 часот – пристигнување
10.00 -16.00 часот – теоретски и практичен дел
17.00 ручек
17.30 враќање назад

Цена: 1.200 денари (во цената е вклучено: семинарска такса, превоз и ручек)

Семинарот ќе се одржи без разлика на временските услови.

Author koryuPosted on June 30, 2008Categories Home

Семинарот помина во одлична атмосфера проследена со тренинг и дружење
меѓу членовите на неколку нинџутсу клубови од Југоисточна Европа.
Оваа година присуствуваа околу 70 учесници од Хрватска, Србија, Босна и Херцеговина, Унгарија и Македонија.
Како и секогаш, учителот Свенерик Богсатер покажа и докажа зошто е еден
од најдобрите нинџутсу мајстори во светот. Тој не само што подучува,
туку и инспирира и ги освежува идеите на своите следбеници.
Нашата екипа пристигна еден час пред започнувањето на семинарот,
преморена од 12 часовното возење од Скопје, што малку влијаеше врз
нашиот тренинг. Но за кратко време, љубовта кон вештината направи
заморот да се надмине и постепено почнавме да го засилуваме темпото.
Вечерта беше резервирана за дружење и концерт на ријечката рок група
Лет 3, што се одржа на отворено на ридот Омановац што се извисува над
Пакрац.
Вториот ден од семинарот помина во вежбање на техники и кати од деншото
на Тогакуре Рју, на голема радост на сите учесници. При тоа, шиханот
демонстрираше и подучуваше и техники со оружје, што предизвика посебен
интерес кај сите.
На паузата за ручек, инструкторот на Буџинкан Македонија, И. Довезенски
имаше средба со учителот Свенерик, на која што беше разговарано за
многу теми поврзани со нашата организација.
Покрај прекрасниот тренинг, семинарот беше искористен и за зацврстување
на пријателството меѓу балканските буџинкан клубови, што е многу важно
за успешно дејствување на Буџинкан Доџо во целина.
На крајот, големи пофалби за организаторот, нашиот верен пријател Марио
Тушек, а воедно, уште еднаш му честитаме за повисокиот ранг кој му беше
доделен лично од шиханот Свенерик Богсатер.    

Author koryuPosted on June 24, 2008Categories Home

На покана од нашите пријатели од клубот Буџинкан Сешин Доџо Пакрац
(Република Хрватска) и инструкторот Марио Тушек, екипа од Нинџутсу
Сојузот Буџинкан Македонија ќе земе учество на семинарот со шиханот
Свенерик Богсатер.
Семинарот ќе се одржи викендов (28/29.06.2008) во убавото гратче
Пакрац, а ова е веќе четврт семинар со шиханот Свенерик Богсатер што се
организира во овој град (ние досега сме учествувале на сите).
Ги покануваме сите заинтересирани лица од Македонија, кои сакат да
присуствуваат на овој настан, да не контактираат преку нашиот е-маил.

Author koryuPosted on June 23, 2008Categories Home

Топлото време и немилосрдното сонце не ги поколеба учесниците на
семинарот Готон По да го совладаат предвидениот материјал за оваа
интересна вештина.
Уште на самиот почеток, учителот на Буџинкан Македонија, И. Довезенски,
им наметна силно темпо на учесниците, така што на целта односно на
местото предвидено за тренинг, неколкумина од нив пристигнаа со мало
задоцнување. Покрај силниот марш зачинет со склекови, „мали и слатки“
проблеми предизвикуваше и дополнителната опрема спакувана во тешки
ранци кои секој мораше да ги носи на себе.
Тренигот се одвиваше беспрекорно, со два мали исклучоци, кога на двајца
ученици им се слоши поради жешкото сонце комбинирано со долго ползење
по високата и сува трева (и боцки). Сепак, по кратко време, тие
продолжија со тренингот.
Покрај многуте интересни моменти, би го издвоиле и оној, кога учителот
со поголема група ученици се искачија (без никаква планинарска опрема)
по стрмните Еленачки Карпи, при тоа, натоварени со целата „борбена
опрема“.
Се на се, многу интересни моменти и техники кои е тешко да се доловат и мораат да се доживеат.

п.с. Вечерва дополнување со колаж во „Семинари“ и во „Фото галерија“.

Author koryuPosted on June 17, 2008Categories Home

Во недела, на 22 јуни, Нинџутсу Сојузот Буџинкан Македонија ќе одржи
семинар во природа на тема: Готон По (користење на петте природни
елементи).
Готон По е составен дел од легендарната вештина на Тогакуре Рју
Нинџутсу, Интон Џутсу, односно вештина на сокривање, избегнување и
камуфлирање. Според тоа, учесниците на семинарот ќе имат можност да
научат како да ги користат природните елементи: вода, дрво, оган, земја
и метал, со цел да можат да се сокријат, камуфлираат и да ја избегнат
опасноста која им се заканува.

Ден: 22 јуни (2008)

Место: „Млака“ (ако врне), „Еленачки Карпи“ (ако е суво)

Програма:    08.00 часот – поаѓање од Скопје
                     09.00 часот – пристигнување
                     10.00 -16.30 часот – теоретски и практичен дел
                     17.00 – враќање назад

Цена: 1.000 денари (во цената е вклучено: семинарска такса и превоз)

Author koryuPosted on June 15, 2008Categories Home

Уште една група од почетниците на Буџинкан Македонија се оспособи за ракување со лак и стрела.
Имено, на вчерашниот семинар на тема Јуми Ја Џутсу (вештина на лак и
стрела), учесниците имаа можност да научат се за изработката,
историјата и употребата на ова старо оружје.
Меѓудругото, се вежбаа техники на гаѓање од неколку различни камае
(положби), но и понапредни техники, како што се: гаѓање од засолниште,
брзо гаѓање од засолниште и гаѓање во трк.
Еден час пред завршувањето на семинарот, небото над Липац се отвори и
почна да врне многу силен дожд, кој ниту еднаш не ги подвоуми учениците
да прекинат со тренингот. Напротив, сите мокри до гола кожа,
продолживме со изведување на техниките, како ништо да не се случува.
По завршувањето на семинарот, учесниците имаа можност да уживаат во прекрасниот селски ручек.

Author koryuPosted on June 10, 2008Categories Home

На 15 јуни, 2008 година, Буџинкан Македонија го организира традиционалниот семинар во природа на тема Јуми Ја Џутсу (вештина на користење лак и стрела).
Семинарот е од затворен тип, односно на него ќе можат да учествуваат само членовите на нашата организација.
Како и секоја година, така и оваа, учесниците ќе можат да научат како
се изработуваат овие древни орудија, како и кога се користат, односно
ќе се изврши комплетна основна обука за користење на лак и стрела.

Ден: 15 јуни (2008)

Место: „Млака“ (ако врне), „Еленачки Карпи“ (ако е суво)

Програма:    08.00 часот – поаѓање од Скопје
                     09.00 часот – пристигнување
                     10.00 -16.00 часот – теоретски и практичен дел
                     17.00 ручек
                     17.30 враќање назад

Цена: 1.200 денари (во цената е вклучено: семинарска такса, превоз, лак и стрела и ручек)

Author koryuPosted on June 1, 2008Categories Home

– 7 јуни (сабота) / Таихен Џутсу, тренинг во сала
– 15 јуни (недела) / Нинџа Јуми Ја (лак и стрела), семинар во природа
– 22 јуни (недела) / Готон По (техники на исчезнување и избегнување), семинар во природа
– 6 јули (недела) / Суи Рен (обука во вода), семинар во природа

****************************************************************

– 1 и 2 ноември (2008) Шиханот Штефен Фролих  (15 дан) од Германија ќе
одржи семинар во Скопје. Како што вели тој самиот, „после убавите
зборови за квалитетната работа на Буџинкан Македонија од страна на Ед
Мартин Папа Сан и фалбите кои тој ги изрече за добрата организација на
неговиот семинар во Македонија, со задоволство доаѓам“.

* За сите семинари наскоро следуваат подетални информации.

Author koryuPosted on May 28, 2008Categories Home

Во рамките на нашите хуманитарни активности, помладите инструктори на
Буџинкан Македонија, Марјан Прошев и Марко Опачиќ, одржаа нинџутсу
тренинг во „Дневниот центар за децата од улица“ што работи во рамките
на Министерството за труд и социјална политика.
Станува збор за центар, во кој се згрижуваат воглавно деца од ромската
заедница, а за кои се грижаат три прекрасни наставнички-социјални
работници, кои секојдневно ги подучуваат младите ромчиња како да
читаат, пишуваат и бројат.
Беше прекрасно да се види насмевката на нивните лица за време на
тренингот, во кој навистина уживаа, со оглед на тоа што за прв пат се
среќаваат со боречка вештина од областа на самозаштитата. Марко и
Марјан се потрудија на детски начин да им објаснат за важноста на
физичката активност и нејзиното влијание врз нивното здравје, но и
важноста да се почитуваат постарите, да се збогатува знаењето и сл.
На крајот, беше договорено  во иднина да се одржат уште неколку тренинзи во „Дневниот центар за децата од улица“.

Author koryuPosted on May 19, 2008Categories Home

Меѓународниот нинџутсу семинар Таи Каи Македонија 2008, што се одржа
викендов во организација на Буџинкан Македонија, заврши подобро од
колку што се очекуваше. На семинарот учество земаа 34 учесници од
четири држави, и тоа, Америка, Унгарија, Црна Гора и Македонија.
Големиот американски мајстор, шиханот Ед Мартин попознат како Папа Сан,
и овој пат, успешно ја заврши својата работа. Цели два дена учениците
уживаа во неговите техники и во неговиот посебен начин на предавање
(куден), преку различни приказни и легенди.
Папа Сан пристигна во Скопје во четвртокот и уште вечерта присуствуваше
на регуларниот тренинг. Како што самиот кажа подоцна, тој сакал да види
на какво ниво е работата во Нинџутсу Сојузот Буџинкан Македонија. После
половина час внимателно набљудување, Папа Сан се придружи на тренингот
и започна со предавање на техниките од Кихон Хаппо, но овој пат,
прилагодени за лица кои не се во можност да употребат физичка сила.
На крајот од тренингот, шиханот го изрази своето големо задоволство од
нашата работа и квалитетниот пристап кон предавање на вештината.
Потоа тренингот продолжи во домот на главниот инструктор за Македонија, И. Довезенски, до неколку  часа после полноќ.
Навистина зачудува со колку голема љубов Папа Сан пристапува кон
нинџутсу. Во петокот, во текот на целиот ден, тој зборуваше, подучуваше
и покажуваше техники. На плоштадот во Скопје, како и секогаш, точно во
17.00 часот, Папа Сан ги изработи секојдневните Чи Кунг техники, при
што десетици заинтересирани лица се собраа и го гледаа стариот мајстор.
Семинарот во сабота започна со техники на одбрана од нож од различни
ситуации. Учениците навистина уживаа додека ги совладуваа техниките на
одбрана со ова опасно оружје. Се увежбуваа различни сценарија, како што
се, одбрана од еден или повеќе напаѓачи, ситуации со заложник, но и
одбрана од нож со нож. Вечерта, тренингот продолжи во клубот „Ла
Бруско“, каде што во интимна атмосфера со собраа поголем дел од
учесниците на семинарот, при што, со уживање ги слушаа раскажувањата на
стариот нинџа мајстор Ед Мартин.
Во текот на вториот ден, се вежбаа техники со ханбо (стап од 90 см), но
и техники на голорака одбрана при различни зафати, удари со раце и со
нозе.
Убавата атмосфера на семинарот е приказна за себе. Домаќините и гостите
постојано си помагаа во изведувањето на техниките, сите беа среќни и
одлично расположени.
За време на семинарот, инструкторот на Буџинкан Македонија, И.
Довезенски полагаше за 4 Дан, при што успешно положи. Повеќе за овој
настан можете да прочитате во „Списание“.
Тоа што најмногу не израдува, е фактот дека станавме толку силни и
посветени на вештината, што веќе сме способни и моќни да организираме
семинар со секој шихан што сакаме да не подучува.
Продолжуваме напред!