Категорија: Почетна

Author koryuPosted on септември 15, 2010Categories Почетна

Секоја година, во последната недела од месецот септември, воините на Буџинкан Македонија го одржуваат традиционалниот семинар Патот на Шугенџа.

За оваа година, учениците ја избраа рутата од подножјето на
Липац до Мокро Езеро. За разлика од минатите години, кога километражата ни беше непозната, овој пат имаме сознанија дека ќе треба да изодиме околу 40 километри во текот на денот.
Ќе ги
посетиме попатните цркви и манастири, како и останатите свети места,
каде преку медитација и молитва ќе ја надополниме загубената енергија.
Како помошни средства ќе користиме единствено стари топографски карти и
компас.

Шугендо
е древен јапонски метод кој ги истражува релациите помеѓу човекот и
природата. Во буквален превод, Шугендо значи „Пат на вежбање и
тестирање“, односно тоа е аскетска дисциплина која има за цел да
постигне самоусовршување преку повлекување во планина, медитација под
водопади и ладни реки, вежби за дишење на недостапни терени, се до достигнување на неверојатни подвизи преку тестирање на телесната и
менталната издржливост. Тие кои го практикуваат овој метод, познати се
под името Шугенџа, а учењето се практикува во Јапонија се до денешни
дни.
За
основач на учењето се смета Ен но Гјоџа, кој живеел во близина на Кјото
во 7 век од нашата ера. Другото име, по кое овие следбеници биле
познати, е Јамабуши или Планински Воини. Тие крстосувале по планинските
сртови на јапонските острови посетувајќи и заштитувајќи ги
многубројните храмови.
Некои учени веруваат дека токму овие луѓе, здружени со пребегнатите кинески генерали по падот на
династијата Танг, се сметаат за основоположници на вештината Нинџутсу.

Тема: Патот на Шугенџа / Духовно патување

Ден: 26 септември, 2010 (недела)

Место: Липац-Мокро Езеро

Програма:   
07.00 часот – поаѓање од Скопје
08.00 часот – пристигнување и почеток на маршот
 ??.?? –  враќање назад

Опрема: Земете се што имате, колку потешко-толку подобро (и побезбедно).

п.с. Не е исклучена средба со диви животни, дожд, невреме и останати непредвидени работи. Секој доаѓа на сопствен ризик.

* Пред да се пријавите, „прочепкајте“ ги информациите на нашата веб-страница од минатите години.

Author koryuPosted on септември 2, 2010Categories Почетна

На малата Сара Ѓорѓиевска неодамна и е откриен тумор на мозокот кој треба итно да се оперира во болницата ACIBADEM во Турција. Операцијата чини околу 30.000 евра, а родителите не се во можност сами да ги соберат сите средства. По тој повод, во недела, со почеток во 11.00 часот, на Водно ќе одржиме хуманитарен тренинг, а собраните средства ќе бидат наменети како мала помош за малата Сара.

Тренингот е отворен за сите, цената на истиот изнесува 300 денари, а темата ќе биде Шинкен Гата.

Како клуб кој има многу пријатели во земјава и во странство, ги повикуваме сите кои не се во можност да присуствуваат на тренингот да донираат преку телефоните:

070 143 143
077 143 193
075 143 143
или преку трансакциската с-ка во Стопанска банка.
Сара Ѓорѓиевска
200002201109539 на Стопанска банка.
Бул.Ј.Сандански 112-2-21

Sasko Gjorgjievski-Devizna Smetka
Radisanska 17/2-24Skopje
IBAN Code: MK07210501562799738
SWIFT : TUTNMK22
NLB Tutunska Banka A.D Skopje
Vodnjanska br.1

Author koryuPosted on август 24, 2010Categories Почетна

По успешно одржаниот Летен Нинџа Камп и малиот одмор што следуваше потоа, Школото за класични јапонски борбени вештини Пат кон Сонцето / Буџинкан Македонија продолжува со работа.

Тренинзите започнуваат од 01 септември во деновите понеделник, среда и петок (како и досега). Ги повикуваме сите заинтересирани кои сакаат да се зачленат и да започнат да чекорат по трнливиот Пат на традиционалните јапонски боречки вештини да се јават на нашиот телефон 077 976 906, или, пак, да испратат писмо на нашата електронска адреса: daito_macedonia@yahoo.com

Од 02 септември со работа започнува и нашето доџо за Даито рју Аикиџуџутсу и Оно ха Итто рју Кенџутсу, кое е лоцирано во центарот на градот, а ќе работи во деновите вторник, четврток и сабота. Ве очекуваме. 

п.с. Зачленувањето во доџо-то се одвива во текот на целата година, но септември е најдобар термин за да се започне со вежбање.

Author koryuPosted on јули 31, 2010Categories Почетна

Единствениот
месец (август) кога доџо-то на Буџинкан Македонија престанува со работа, се
користи за учество на нашиот Летен Нинџа Камп. Како и минатата година,
така и оваа, настанот ќе се одржи од 04 до 12 август, при што подеднакво ќе уживаме и во
тренинзите и во дружењето.

Иако беше
предвидено учество на само 14 ученици, капацитетите ги зголемувавме два пати,
од причина што интересот беше огромен, а местата беа пополнети за само две
недели од објавувањето. Така, на крајот беше одлучено бројката да се стопира на
18 учесници. Ваквиот огромен интерес само покажува дека квалитетот и содржините
на нашиот камп се на највисоко ниво.

Истовремено им се
извинуваме на сите што моравме да ги одбиеме поради ограничените капацитети.
Едноставно не сакаме да го намалиме нивото на овој прекрасен настан.

Доџо-то во Скопје
продолжува со работа од 1 септември на исто место и во исто време. Ги
известуваме сите заинтересирани за Буџинкан Нинџутсу дека тогаш ќе можат да се зачленат и да почнат
со редовните тренинзи.

Со почетокот на
новиот семестар, во центарот на Скопје отвораме уште едно доџо, за Даито рју
Аикиџуџутсу и Оно ха Итто рју Кенџутсу, две класични јапонски самурајски школи.
Со ова, ние стануваме единствени претставници и на организацијата Даито рју
Аикибудо Даитокаи на територијата на цела Југоисточна Европа.

Ви посакуваме
пријатен одмор.

Author koryuPosted on јули 26, 2010Categories Почетна

Од осум пријавени
учесници на овогодинешното Преживување, седумина преживеава. Четворица од нив
беа ветерани, на кои ова им беше четврто Преживување, додека останатите тројца
беа „гуштери“. Еден од почетниците се откажа во текот на првиот ден, но сепак,
се здоби со едно големо искуство кое ќе му помогне следната година успешно да
се справи со кризите кои се јавуваат во текот на овој семинар.

Првиот ден почна
стандардно со кондиционен тренинг (џунан ундо и атеми но танрен). Потоа започнавме
со изградба и средување на кампот. Следуваше уште еден тренинг, а потоа силен
марш до друга локација, каде што се одржа кенџутсу и шурикен кеико, по што се
одржа предавање (куден). Денот заврши со тренинг за развивање на шестото сетило
(харагеи). Секако, седнувањето на задник не беше дозволено во текот на двата
дена.
Распоредени на стража,
учениците на Буџинкан Македонија се погрижија ноќта да помине во најдобар
ред.

Следниот ден, започна
повторно со кенџутсу и тоа уште пред изгрејсонце. Првите сончеви зраци ги
дочекавме изведувајќи техники со бокен, напаѓајќи и блокирајќи ги ударите упатени од
страна на нашите „противници“. Потоа повторно марш до С’мкнено, каде што како и
секоја година ја обновивме силата со медитација под карпа издлабена од водопад што
во текот на зимата тече на тоа место. Продолживме со вежбање, најпрвин со
таиџутсу, а потоа повторно со бо шурикен.

По завршувањето на
тренингот уште еднаш се „фрливме“ на средување на просторот и изградба на
пристапни патеки кон јужниот дел од кампот. Откако успешно ја завршивме и таа
задача, повторно со силен марш се упативме кон местото „Стари Лозја“ каде што
го уредивме светиот крст посветен на „Свети Трипун“. Во 13.00 часот, вториот
ден, за прв пат беше дозволено да се седне на задник, со што започна
традиционалното „чмаење“, при што, повторно се одржаа неколку кратки
предавања (куден). Во 16.00 часот семинарот заврши.

И оваа година се покажа
дека после три Преживувања, нашите ветерани немат никаков проблем да издржат
под било какви услови и притисоци. Тие речиси и да не покажаа никаков замор во
текот на двата дена. Од почетниците, одлични резултати покажа Катерина Д., која
успеа да преживее при првото нејзино учество. Исто така им честитаме и на
Драган Н. и Горан М., кои за разлика од минатата година, оваа успешно го завршија
семинарот, со што докажаа дека упорноста секогаш се исплатува на крајот.

Се надеваме дека
следната година уште повеќе наши ученици ќе се обидат да го поминат овој тест.

Author koryuPosted on јули 15, 2010Categories Почетна

Традиционално, како и секоја година, така и оваа, дојде денот кога можеме да ги испробаме нашите способности и вештини на дело:

Преживување во природа!

Два пеколни дена, далеку од цивилизација, без храна, вода (само литар ипол за двата дена), облека и
хигиенски средства. Два дена вежбање, медитација и голо преживување.

Место: С’мкнено (26 км. до најблискиот град и болница / пустински услови)

Време: 24 и 25 јули, 2010 година

Поаѓање: сабота во 07.00

Враќање: само Господ знае

Дозволена опрема: вреќа за спиење,
шаторско крило, војничка униформа (панталони и кошула),
една маица, капа, еден пар гаќи (широки), еден пар чорапи, јаже, нож, шише од литро ипол (наполнето со вода) и оружја за тренинг кои можете и сакате да ги понесете.

Важно: забрането носење храна,
вода и останати работи кои не се наведени погоре. Пред поаѓање,
ќе има задолжителна проверка. 

Најважно:
семинарот е предвиден само за цврсти момци и девојки. Условите за
тренинг ќе бидат исклучително тешки, а дисциплината ќе биде железна.
Тие кои не се чуствуваат психофизички спремни за во пекол и кои не се
подготвени да го убијат
сопственото его, ги молиме да не се пријавуваат за семинарот. Дозволена
количина на вода за пиење за двата дена:
1.5 литри. Имајте во предвид дека температурата на воздухот може да се
искачи над
45 целзиусови. Забрането седнување на задник за време на семинарот (во
текот на двата дена). Само три часа спиење, останатото време тренинг.

п.с. Забрането жалење, изговори и плачење за време на семинарот.

Author koryuPosted on јули 13, 2010Categories Почетна

По повод 15 години од основањето на Школото за класични јапонски борбени вештини Пат кон Сонцето / Буџинкан Македонија, вчера во просториите на доџо-то се одржа прослава на која присуствуваа сегашни, но и поранешни членови на нашата организација.

Беше прекрасно да се види како учениците се поврзани меѓусебно и како се негува другарството во нашиот клуб. Атмосферата беше одлична, а за тоа допринесе и музичката група составена исклучиво од наши членови.
Буџинкан Македонија продолжува со својата работа. И натаму наша основна цел останува проучувањето на класичните јапонски боречки вештини, како начин за усовршување на поединецот, развивање на моралните особини, градење на чесни, праведни и вредни индивидуи, кои во секое време ќе бидат спремни да се стават на располагање на нашето општество и држава. Развивање на посветеноста, истрајноста и верноста односно сето она што може да не направи подобри во иднина.

На крајот, сакаме да се заблагодариме на сите наши ученици кои се доволно храбри за да чекорат по Патот. Особено голема благодарност до нашиот член Александар В., човек кој и после толку години знае да изненади со своето другарство. Тој е добар пример за помладите ученици во однос на тоа како треба да се негува пријателството.

Одиме напред. Нема лабаво.

Author koryuPosted on јуни 29, 2010Categories Почетна

На 2 јули, 1995 година, со работа започна Школото за класични борбени вештини Буџинкан Македонија (Пат кон Сонцето). Тоа беше основано од страна на Игор Довезенски, човекот коj за прв пат во Македонија ги „донесе“ класичните јапонски самурајски и нинџа вештини. Од тогаш, па до денес, нашето доџо е единствен претставник на организацијата Буџинкан Доџо на соке Масааки Хатсуми.
Од неодамна, станавме представници и на организацијата Даито рју Аикибудо Даито Каи, во која што се проучуваат класичните борбени вештини Даито рју Аикиџуџутсу и Оно ха Итто рју Кенџутсу.

Во оваа прилика, нема да пишуваме за нашите успеси, туку ќе ја искористиме за да ги поканиме сите наши членови, сегашни и поранешни, сите наши пријатели кои ја следат нашата работа, сите кои што некогаш биле дел од нас и кои уживале во нашите тренинзи, да дојдат на забавата што ќе се одржи на 12 јули, во нашето доџо. 

Прославата ќе започне во 20.30 и ќе трае до 22.30 часот. Коктелот ќе биде организиран од страна на реномираната кетеринг служба „Ла Бруско“, чии клиенти се најпознатите македонски претпријатија и представништва. За атмосферата ќе се погрижат музичари кои истовремено се и членови на нашето доџо.

Со цел подобро да го организираме настанот, Ве молиме да се најавите преку нашиот и-мејл или на некој од нашите телефонски броеви. 

Author koryuPosted on јуни 26, 2010Categories Почетна

На вчерашното полагање кое се одржа во Школото за класични борбени вештини Буџинкан Македонија, беа промовирани нови ученички степени.
За девети кју положија: Искра Б., Косара П., Татјана О., Ана С., Владимир А. и Драган А.
Со седми кју се „закитија“: Тина Д., Катерина Д. и Антон П., додека за пети кју положи Мирон Ц.
На сите од се срце им честитаме и се надеваме дека уште поодлучно ќе продолжат да чекорат по Патот.

Author koryuPosted on јуни 21, 2010Categories Почетна

Каков семинар, каков тренинг, каква атмосфера. Со еден збор одлично. Два дена, пет тренинзи, по два часа, вкупно 10 часа нурнување во чудесниот свет на Оно ха Итто рју Кенџутсу, во услови на наизменични промени на сонце и дожд, проследени со молњи и грмотевици.
За време на семинарот се работеа основните ставови, сечења, отварања на противничкиот став и блокови од оваа прекрасна школа за мечување.

Во саботата се одржаа три тренинзи, а останатото време го искористивме за средување на просторот за вежбање и спиење. Тоа беше една стара напуштена куќа од 18 век, целата зарасната во вегетација, која ни послужи како одлично скривалиште од дождот и грмотевиците што постојано се слушаа во текот на деноноќието. Вечерта, во прекрасна атмосфера, сите собрани околу огинот, се дружевме вртејќи (и јадејќи) колбаси и печурки на жар. Потоа, собрани како сардини и пикнати во вреќите за спиење, сите исполегнавме во единствената колку-толку здрава соба во куќата трудејќи се да ги избегнеме капките дожд што постојано паѓаа од таванот.

Во неделата првиот тренинг се одржа веднаш по изгрејсонце. За тоа време во жарот на огинот се препелкаа млади компирчиња што послужија како вкусен доручек.
По ова, се упативме на другата страна на планината вежбајќи при тоа Сеишин Теки Кјојо (прашајте ги учесниците за начинот). На една убава ливада, го одржавме последниот тренинг, по што повторно поработевме на нашето духовно усовршување преку куден (усна трансмисија).
На крајот, сите ученици кои учествуваа на семинарот го изразија своето огромно задоволство од истиот. Иако тренингот беше навистина напорен, сепак желбата да се проучува оваа стара јапонска школа за мечување, им помогна на учесниците да ги надминат сите потешкотии.
Оно ха Итто рју се одликува со чисти, брзи, моќни и едноставни движења и токму тоа ја прави да биде толку ефикасна. Иако во Школото за класични јапонски борбени вештини Буџинкан Македонија, првенствено се изучуваат деветте школи на Буџинкан Доџо, ние со задоволство одлучивме да ја изучуваме и оваа школа. Тоа се случи благодарение на учителот Антонино Черта, единствениот западен шихан на Даито рју Аикибудо, кој несебично прифати да го подучува инструкторот на Буџинкан Македонија, Игор Довезенски.
За следната година е договорен и семинар со сенсеи Черта во нашата земја, на кој ќе можеме уште подобро да го усовршуваме нашето знаење.