Автор: dovezenski

Author dovezenskiPosted on ноември 25, 2021ноември 28, 2021Categories Почетна

Во скопското доџо на Организацијата „Пат кон Сонцето“, во неделата се одржа семинар посветен на вештината Кукишин рју Дакентаиџутсу.

На настанот учествуваа неколку семпаи, како и еден кохаи од Буџинкан Македонија, кои цели четири саати неуморно ги вежбаа техниките на најтешката школа наследена од соке Масааки Хатсуми.

Пеколната атмосфера беше одлична мотивација за Воините на доџото да продолжат и понатаму да ги совладуваат вештините на Буџинкан Доџо. 

Се гледаме на следниот семинар. Останете мотивирани, силни и храбри во овие тешки времиња!

Author dovezenskiPosted on ноември 3, 2021ноември 17, 2021Categories Почетна

Дванаесет учесници два дена уживаа под зраците на есенското сонце изучувајќи техники од школата Тогакуре рју Нинџутсу во дворот на Хомбу Доџото на „Пат кон Сонцето“.

За време на настанот, присутните имаа можност да вежбаат со Тоами (нинџа мрежа), Оно (голема самурајска секира), Отсучи (голем воен чекан), Кагинава (јаже со куки), Нагината (сечиво закачено на долг стап), Кусари Фундо (ланец со тегови), Кусари Гама (ланец со срп), Кјокетсу Шоге (сор со јаже и обрач), Јари (копје), Боџутсу (борба со долг стап), Чигирики (стап со ланец и тег), како и Таиџутсу (борба со тело), Муто Дори (голорака одбрана од оружје), Кенџутсу (борба со јапонски меч), Кодачи (борба со краток јапонски меч), Кунаи (градинарски бодеж за копање), Тессен (лепеза) и Јавара (приврзок за самоодбрана).

Во саботата вечер, учителот Игор Довезенски одржа и предавање на тема „Што е тоа Нинџутсу?“, кое беше со воодушевување пречекано.

Ова беше последен семинар во Хомбу Доџото на „Пат кон Сонцето“ за оваа година, а новата сезона ќе започне во март, 2022-ра.

Дотогаш, членовите на Буџинкан Македонија продолжуваат со своите тренинзи во Скопје или во природа.

Author dovezenskiPosted on септември 21, 2021септември 22, 2021Categories Почетна

Дворот на Хомбу во неделата што измина ечеше од извиците на Воините на Буџинкан Македонија. Настанот што ги привлече да дојдат и да уживаат во знаењето на учителот Игор Довезенски беше вештината на борење со нагината.

Инаку, ова средновековно оружје, кое се состои од сечиво прикачено на долг стап во минатото било едно од омилените самурајски оружја за војување на бојните полиња.

Членовите на Буџинкан Македонија редовно, барем два пати годишно, ги изучуваат и повторуваат техниките со Нагината кои се навистина атрактивни за око.

Покрај вежбањето, мора да се спомене и одличното дружење кое секогаш е дел од семинарите организирани во стожерот (Хомбу Доџо) на организацијата „Пат кон Сонцето“.

Author dovezenskiPosted on септември 21, 2021септември 22, 2021Categories Почетна

Во Хомбу Доџото на Организацијата „Пат кон Сонцето“, во саботата се одржа семинар за ракување со јапонски меч – катана.

Учесниците имаа можност да научат нови, но и да ги повторат старите Иаиџутсу (брзо извлекување и симултано сечење) техники.

Настанот започна со кратко претставување на школата која што беше тема на семинарот, а потоа се вежбаа сите сегменти од Деншото, како што се Камае, Чибуруи, Ното, Кири и Ката.

Учениците на Игор Довезенски како и секогаш вредно вежбаа, а нивната техника од семинар на семинар станува се подобра и подобра, што е само показател за нивната посветеност.

Author dovezenskiPosted on септември 15, 2021септември 17, 2021Categories Почетна

И покрај строгите правила наметнати поради ковид пандемијата, летниот нинџа камп на Буџинкан Македонија помина во најдобар ред и во одлична работна атмосфера.

Оваа година темите за изучување беа Шинден Фудо рју Џутаиџутсу (чуден гата), како и Кусаригамаџутсу.

Нема зборови да се опише возбудата која што учесниците на настанот ја чувствуваа за време на тренинзите водени од учителот Игор Довезенски, со помош на својот ученик Марко Опачиќ.

За следната година шиханот Довезенски ги најави темите Дакентаиџутсу и Боџутсу од школата Кукишинден рју ХаппоБикен.

Се нетрпение Ве очекуваме!

Author dovezenskiPosted on септември 15, 2021септември 17, 2021Categories Почетна

Четвриот летен “Детски Нинџа Камп“, што се одржа во периодот од 28 јули до 3 август, беше одлично освежување за најмладите вежбачи на Буџинкан Македонија,после едногодишната камперска пауза предизвикана поради ковид пандемијата.

Со почитување на сите протоколи, дечињата уживаа во пребогатите секојдневни активности кои секогаш се дел од овој фанстастичен настан.

Презадоволни беа и родителите, кои го истакнаа своето задоволство од грижата и едукацијата на нивните деца, а сите овие пофалби ни се само мотив повеќе да ја продолжиме оваа успешна приказна.

Се гледаме повторно во 2022 година.

Author dovezenskiPosted on јули 26, 2021јули 28, 2021Categories Почетна

После двегодишна пауза предизвикана поради пандемијата со корона, викендов конечно го завршивме серијалот наречен „Живот во Дивината“. Со тоа, веќе од следната година, подготвени сме да започнеме нова авантура која ќе има за цел да ги усоврши членовите на Буџинкан Македонија во уште едно поле.

Седмиот и последен преживувачки семинар од овој серијал се одржа на ридот Богословец во Овче Поле. Локацијата беше избрана со цел да се долови степата, која всушност и беше тема на последниот „Живот во Дивината“. Иако во Македонија нема вистински степи, научниците пронашле некои сличности во областите Овче Поле и Долна Брегалница, па така целиот овој регион се нарекува полу односно псевдо-степа. Ние се уверивме дека навистина имале причина да го искористат ова име.

Уште еднаш и за последен пат да потсетиме дека семинарите „Живот во Дивината“ беа наследници на претходниот серијал „Преживување во Природа“, кој инаку беше познат и стана легендарен поради својата суровост.
Сценариото и задачата на „Живот во Дивината“ беше да ги научи учениците на учителот Игор Довезенски да ги совладуваат техниките за преживување во група и тоа на: пониски планини односно ридови, повисоки планини од 1000 метри, покрај река, во шума, во пустински услови, покрај езеро и на крајот во степа.

Мораме да го нагласиме задоволството што досега стотина членови на Буџинкан Македонија земале учество на настаните поврзани со техниките на преживување во природа, а истовремено да ја искажеме среќата што ја чувствуваме поради фактот дека многумина од нив успешно ги совладаа самите техники. Генерациите кои беа дел од овие настани ја имаа таа среќа да станат и дел од историјата на Буџинкан Македонија, со оглед на фактот што шиханот Довезенски планира постепено да ги намалува преживувачките семинари на сметка на некои други настани.

Овој извештај ќе го завршиме со информацијата дека Учителот подготви две дипломи за учениците Владимир Антовски и Таки Гаковски со кои ќе го награди нивниот труд, посветеноста, жртвувањето, како и знаењето стекнато за време на учеството во „Живот во Дивината“. Од вкупно седум семинари од овој серијал, Антовски учествуваше на шест, а Гаковски на пет. Со тоа, а секако и со зголеменото знаење, тие ја придобија довербата на нивниот учител кој секогаш го наградува трудот и залагањето на своите ученици.

Токму овие двајца, поради знаењето од областа на групното преживување на најразличен терен, ја заслужија дипломата која ќе биде признание и доказ за нивната стручност.

Од следната година почнува нов серијал кој ќе ги наследи и надгради претходните два, а неговото име ќе биде „Шиноби Кампо – Традиционална хербална медицина“.

Author dovezenskiPosted on јуни 22, 2021јуни 23, 2021Categories Почетна

По успешното полагање за шодан (прв дан) што се одржа во неделата во Хомбу-то на „Пат кон Сонцето“, после една деценија вежбање во нашето Доџо, семпаи Таки Гаковски заслужено се закити со долгоочекуваниот „црн појас“.  Со тоа, Буџинкан Македонија доби уште еден Јуданша (носител на мајсторско звање) и уште еден Шидоши Хо (помлад инструктор).

Како што погоре споменавме, тестирањето (Шикен) се одржа во Хомбу-то на Организацијата „Пат кон Сонцето“, при што овој редок чин беше прославен во прекрасна атмосфера.

По завршувањето на настанот, учителот Довезенски одржа краток говор, кој предизвика солзи радосници кај присутните. Ова и не е воопшто чудно, доколку се земе во предвид колку многу напор е потребно за да се достигне црниот појас во Буџинкан Македонија. Најмалку десет години редовен тренинг, но истовремено пролевање многу крв, пот и солзи на татамите.

Шидоши Хо Таки Гаковски е еден од најактивните членови во Буџинкан Македонија, одговорен за работата на детската група (Нинџа Клинци). Тој присуствувал на речиси сите семинари организирани од нашето Доџо и никогаш не пропушта ниту еден тренинг на редовните часови.

Му честитаме од срце и му посакуваме уште похрабро да чекори по Патот.

Author dovezenskiPosted on јуни 22, 2021јуни 23, 2021Categories Почетна

Уште еден семинар со наслов „Буџутсу – талкање меѓу митот и реалноста“ се одржа во неделата во дворот на Хомбу Доџо-то на Организацијата „Пат кон Сонцето“.

Најпрвин преку Рандори (слободна борба), а потоа и преку предавање техники и куден, учителот Игор Довезенски ги соочи своите ученици со вистината околу реалната борба со оружје.

На крајот, учесниците повторно ја искажаа желбата овој настан да продолжи како традиционален и да се одржува барем еднаш во годината.

Author dovezenskiPosted on јуни 22, 2021јуни 23, 2021Categories Почетна

Семинар за борба со кратка палка (ТанбоЏутсу) се одржа во саботата во дворот на Хомбу Доџото на Организацијата „Пат кон Сонцето“.

На настанот учествуваа неколку ученици на Буџинкан Македонија, кои за прв пат се сретнаа со ова едноставно, но сепак корисно орудие.

На крајот на семинарот, учесниците изразија желба да го продолжат своето знаење во оваа вештина преку организирање на уште еден настан во текот на втората половина на годината.