Буџинкан Македонија

Author koryuPosted on декември 30, 2011Categories Почетна

Според насоките на соке Масааки Хатсуми, тема за 2012-та година ќе
биде вештината на мечување (катана). Среќни сме што организацијата Буџинкан ќе почне да посветува повеќе внимание на
вежбањето со меч.
Како и секоја година, Буџинкан Македонија има и своја интерна тема, која што се
разработува во текот на дванаесетте месеци. Во 2012-та одлучивме да се
концентрираме на школото Шинден
Фудо рју Таиџутсу (Школото на неподвижните божествени учења).

Програмата за 2012-та на Буџинкан Македонија веќе е поставена на нашата
веб-страница.

*************************************

Ве известуваме дека во текот на претстојните празници, Школото за
борбени вештини Пат кон Сонцето, заедно со двете доџо-а Буџинкан Македонија и
Даито рју Македонија нема да работат во деновите:

-Буџинкан Македонија 06 јануари (Бадник) / прв тренинг на 2 јануари (2012)
-Даито рју Македонија 06 јануари (Бадник) / прв тренинг на 13 јануари (2012)

На сите наши членови и пријатели им посакуваме се најубаво
во новата 2012 година. Нека ни е честит Божиќ !

Akemashite Omedeto Gozaimasu!

Author koryuPosted on декември 27, 2011Categories Почетна

Минатогодишниот извештај го завршивме со ветување дека во 2011 година ќе
постигнеме уште подобри резултати. Денес, со големо задоволство можеме да кажеме
дека – остваривме.

Според насоките на соке Масааки Хатсуми, 2011 беше посветена на основите на
Будо-то, преку принципите на Кихон Хаппо. Бидејќи основите се нешто што во
нашето доџо постојано се вежбаат, ние си зададовме дополнителна интерна тема:
Такаги Јошин рју Џутаиџутсу.
Навистина уживавме проучувајќи ги и вежбајќи ги сите кати на оваа самурајска
школа во текот на целата година.

Што се однесува до организирањето на меѓународни семинари, оваа година
поканивме само еден мајстор да подучува во нашето доџо. Бевме навистина
пресреќни што го имавме сенсеи Антонино Черта, единствениот нејапонски шихан за
Даито рју Аикиџуџутсу и Оно ха Итто рју Кенџутсу (Такеда ден).

Сенсеи Черта е учител на инструкторот Игор Довезенски, за двете класични
јапонски боречки школи, а нивниот однос е навистина посебен. Во текот на
петдневната посета на овој голем мајстор, се одржа дводневен семинар, додека
останатото време инструкторот Довезенски го искористи за приватни часови со
учителот.

Во изминативе години секогаш организиравме по најмалку два меѓународни
семинари, но оваа година учениците на Буџинкан Македонија одлучија да направиме
пауза, со цел повеќе да се посветиме на нашите активности кои навистина ги има
многу.

Од друга страна, шидоши Игор Довезенски учествуваше на неколку меѓународни
семинари организирани од страна на нашите пријатели.
Годинава започна со посета на семинарот со шиханот Педро Флеитас во Србија,
каде што учество зема и семпаи Марјан Прошев.
Во април, Довезенски учествуваше на семинарот во Белгија одржан под водство на
еден од првите шихани на соке Масааки Хатсуми, канчо Унсуи Манака, а истовремено
уживаше и во тренинзите одржани од страна на останатите инструктори на
организацијата Џиненкан. Шидоши Довезенски беше единствениот претставник на Буџинкан доџо кој зема учество на последниот семинар на Манака сенсеи надвор од Јапонија.
Во јуни, шидоши Довезенски учествуваше на семинарот БуЈу Каи во Германија,
каде што пред 20 шихани на Буџинкан Доџо го положи тестот за годан (5 дан).
Десетдневниот престој беше искористен за многу тренинзи, а посебно во сеќавање
се оние кои беа одржани во доџо-то на нашиот голем пријател, шиханот Штефен
Фролих.
Покрај сите овие, учествувавме и на неколку семинари од други боречки вештини,
се со цел подобро да ги разбереме класичните јапонски школи (рју ха) што ги
изучуваме во нашето доџо.
На сите нив беше прекрасно да се видат старите, но и да се запознат нови
пријатели.

Годинава што измина, ќе ја паметиме по рекордот на одржани семинари во
природа. Како што веќе знаете, тие се заштитен знак на нашето доџо и ние строго
веруваме дека единствениот начин да се вежба нинџутсу е да се „загази“ длабоко
во природата и да се биде во хармонија со неа.

Така, организиравме 12 семинари во природа, а посебно ќе ги истакнеме
традиционалните „Патот на Шугенџа“ и „Преживување“ кои претставуваат заштитен
знак на нашето доџо.

Во текот на месецот август, се одржа надалеку познатиот Летен Нинџа Камп, на
кого учествуваа 20 ученици од нашето доџо. Како и секогаш, спомените и лекциите
научени за време на кампот остануваат засекогаш врежани во срцето.

Покрај другите активности, би ги споменале уште и одржувањето на
традиционалната „Работилница за самоодбрана за жени“, каде што нашите куноичи
покажаа одличен напредок. Нивната техника толку многу напредува, што во иднина
можеби настанот ќе го прекрстиме во „Работилница за самоодбрана од жени“ 🙂

Семпаи Марко Опачиќ и семпаи Марјан Прошев одржаа семинар во Градско, а
истовремено успешно ја преземаа работата во нашето второ доџо во Скопје кое се
пренамени во место за вежбање на новозапишаните членови (почетници).

Оваа година воведовме и систем наречен Шиноби Таисо кој има за цел да ја подобри кондицијата потребна за секојдневните тренинзи на класичните јапонски боречки вештини. Инструкторот Довезенски
одржа предавање на таа тема, кое предизвика огромен интерес. Се надеваме дека
во годините што следат, системот ќе ги покаже резултатите на дело.

Што се однесува до јавниот интерес за нашата работа, ние и понатаму ги одбиваме повеќето покани за гостување во медиумите. За нас најважно е традиционалните боречки вештини да останат за малку одбраните луѓе кои треба самите да не пронајдат. Така, оваа година
прифативме само една покана од „Лајф Магазин“ каде што двајца членови од
нивната редакција направија репортажа за нашиот зимски семинар.

За наше најголемо достигнување во 2011, слободно можеме да го прогласиме
почетокот на изградбата на нашето хомбу доџо. Го градиме на наша земја, по наш
вкус. Се состои од 100 м2 површина за вежбање, и 100 м2 простор за престој на
нашите ученици. Според плановите, доџо-то ќе биде целосно завршено до јули,
2012 година.

Во нашата организација Пат кон Сонцето, покрај доџо-то Буџинкан Македонија,
успешно работи и доџо-то за Даито рју Аикиџуџутсу и Оно ха Итто рју Кенџутсу
(Такеда ден). Остануваме целосно посветени на вежбањето и на овие две корју
школи, а како нивни преставници, во следниот период очекуваме зголемување на
активностите поврзани со нив.

Во моментов, доџо-то на Буџинкан Македонија брои околу 40 редовни, додека
во секцијата за почетници вежбаат 12 ученици. Во секцијата во Градско редовно
тренираат околу десетина ученици. Сите тие имаат цел да се самоусовршат на
секое поле од животот.

На крајот, неколку статистички податоци за нашата веб-страница. Од
1 јануари 2011, па заклучно со денес, нашата веб-страница ја посетиле над 20.000 души, од вкупно 84 држави,
а оваа година најредовните посетители се од САД, Србија, Словенија, Германија, Италија и Хрватска (подредени според бројот на посети, не сметајќи ја Македонија од каде што секогаш имаме најмногу „удари“).

Извештајот го завршуваме со единствената лоша работа што ни се случи, а тоа
е тешката повреда на шидоши Игор Довезенски при падот од седумметарска карпа.
Имено, до несреќата дојде за време на слободното качување на Еленачки Карпи. Иако
докторите дават лоши прогнози за развојот на повредата во иднина и му забранија
секаква физичка активност, Игор Довезенски останува доследен на својата љубов (корју
буџутсу) и не пропушта ниту еден ден без тренинг.

Author koryuPosted on декември 10, 2011Categories Почетна

На 17 декември (2011), со почеток во 17.30 часот, шидоши Игор Довезенски ќе го одржи првото предавање, а воедно и вовед во системот „Шиноби Таисо“.

Што е Шиноби Таисо?

Шиноби е назив за високо обучена личност во времето на феудална Јапонија која што била специзализирана за разни неконвенционални начини на војување.
Таисо е генерички назив за кондиционирање на телото составен од зборовите: Таи (тело) и Со (зацврстување).
Под кондиционирање на телото се подразбира: зголемување на здравствената и работната способност, зголемување на телесната
извежбаност и издржливост за поднесување на извесни напори.

Шиноби Таисо е систем создаден од водачот на Буџинкан Македонија, Игор Довезенски, со цел да ја подобри сопствената кондиција потребна за секојдневните тренинзи за класичните јапонски боречки вештини. Системот се состои од разни вежби за растегнување, како и вежби за зајакнување и зголемување на мускулната издржливост.  

Самиот систем претставува збир на традиционални начини на тренинг за растегнување и зајакнување на телото користени во класичните боречки школи. Во различни рју-ха, начините се познати под имињата: Џунан Таисо, Џунан Ундо, Рју Таи Ундо, Ки Ундо и Аики Таисо.
Искуството на Довезенски собрано за време на 23-годишниот тренинг на корју буџутсу, заедно со истражувањето на најновите научни сознанија од полето на кондицискиот тренинг, како и изучувањето на човечката анатомија и биомеханиката (наука што ги проучува механичките појави и процеси во живите организми), допринесе за создавање на Шиноби Таисо®.

Која беше потребата за создавање на системот?

За време на долгогодишното водење на доџо-то, инструкторот Довезенски забележал дека некои вежби за загревање на телото воопшто не одговарат и не допринесуваат за зголемување на кондицијата кај одреден тип на вежбачи. За таа цел, тој почнува да истражува и да соработува со лица кое се занимаваат со слична проблематика, почнувајќи од кондициони тренери, па се до физиотерапевти. Така, тој ја увидува потребата дека секоја градба на телото е уникатна и дека има потреба од различен пристап при кондиционирањето.

Првобитно развиен за себе и за своите ученици, Игор Довезенски се одлучи овој систем да го понуди на сите кои се заинтересирани да ја зголемат својата физичка кондиција.

Темата на предавањето во сабота ќе биде: Болките во долниот дел на ’рбетот и вежби за нивно отстранување.

Author koryuPosted on ноември 28, 2011Categories Почетна

Како што и самиот наслов кажува, овој настан е предвиден за постарите ученици на Буџинкан Македонија односно за оние кои наскоро ќе полагаат за шодан (прв дан-мајсторско звање).

На семинарот, шидоши Игор Довезенски ќе го пренесува своето знаење преку три аспекти на трансмисија:

-таиден (телесна – борбена стратегија)
-шинден (духовна – обединување на умот и телото)
-куден (усмена – совети за практична ефикасност)

Ден: 04.12.2011 (недела)

Место: познато за учесниците

Цена: бесплатно

За овој семинар нема да објавиме никаков извештај на веб-страницата поради природата на неговата содржина. 

Author koryuPosted on ноември 20, 2011Categories Почетна

Драги
пријатели,
сакам да Ве информирам дека пред девет дена доживеав незгода при што ги
повредив рбетот и карлицата. После седумдневно лекување, можам да кажам дека се
чуствувам подобро и дека најлошото помина.
Повредата ја здобив при пад од карпа за време на слободното качување на ридот
Еленачки Карпи.
Слободното качување е нешто што во последните неколку месеци редовно го правам,
како дел од одржувањето на мојата физичка и ментална кондиција потребна за
напредокот во боречките вештини. Како што знаете, јас сум од оние кои веруваат
дека секој воин треба да има голема сила и кондиција доколку сака да биде успешен.

Прогнозата на докторите е дека повредата ќе ми остави трајни последици, а со
текот на годините може и да напредува до степен на инвалидитет. Само еден од
нив, ми даде мал зрак на надеж бидејќи ми рече дека со одредени вежби можно е
тој процес да се сопре односно да се забави.

Верувам дека многумина од Вас ќе се запрашат дали ми требаше вакво нешто. Во
моментов и јас сум малку разочаран, но не од друго, туку од мојата желба да се
качувам по карпи без никаква заштита.
Тоа што со сигурност го знам е дека ниту еднаш не сум зажалил што тоа го правев
поради мојата голема љубов-боречките вештини. Можеби звучи глупаво, но јас не
се каам поради тоа. Го правев тоа во што отсекогаш сум верувал и сум уживал.

Сакам да Ве информирам и дека воопшто немам намера да ја почитувам забраната на
лекарите за прекин на било какви физички активности. Им кажав и на нив дека
побрзо би останал инвалид (духовен) доколку прекинам со вежбањето отколку кога
би продолжил.

После испуштени три часа во текот на неделава, утре доаѓам во доџо на тренинг.
Иако ќе носам стегач со метални шипки околу половината и многу од движењата ќе
ми бидат ограничени, продолжувам со редовното подучување и вежбање како ништо
да не било.

Можеби повеќе нема да бидам „стариот“ сенсеи кој правеше салта наоколу, но Ви
давам збор дека ќе се потрудам воопшто да не го забележите мојот хендикеп.

На крајот, сакам да ги известам сите мои ментори и пријатели од Буџинкан, сите
пријатели од Џиненкан, сите соработници од другите корју организации, како и
мојот учител по Даито рју Аикиџуџутсу и Оно ха Итто рју Кенџутсу, дека
останувам посветен на боречките вештини.
Сите закажани семинари и средби ќе се одржат во предвидените датуми.

За тие кои планираат во иднина да се запишат во нашето доџо, ги охрабрувам да
го направат тоа. Слободното качување по карпи не е дел од нашата редовна обука,
туку тоа е чисто моја приватна иницијатива. Што се однесува до тренингот, тој
останува пеколно тежок како и до сега.

Останува уште да Ве замолам да не ми се јавувате и да не ми искажувате
сожалување на било кој начин. Јас не сум човек кој сака или бара сожалување.
Освен тоа, немам време да зборувам на телефон или да одговорам на Вашите
мејлови. Ве има многу и би требало цела вечер да ја потрошам на тоа. Затоа, Ве
молам уживајте во денот како ништо да не се случило.“

Искрено Ваш,
Игор Довезенски шидоши
Доџо Чо
Буџинкан Македонија
Даито рју Македонија (Корју Доџо)

Author koryuPosted on ноември 6, 2011Categories Почетна

Митовите и легендите поврзани со невидливото движење на јапонските нинџа воини се целосно разјаснети за учесниците на семинарот што денес се одржа во прекрасната шума Млака во подножјето на планината Липац.

Учениците кои присуствуваа на овој настан, имаа можност да учат три техники наменети за тивко движење преку различни површини односно суви лисја, дрвени подови и тесни премини.

Инструкторот Довезенски, на многу детаљен начин ги објаснуваше сите техники, а потоа на импровизирани полигони, истите беа вежбани од страна на неговите ученици.

Особено внимание, но и многу мака, им зададе последната вежба која се состоеше од дискретно движење преку старо стебло, a на кое, шидоши Довезенски постави влажна хартија. Потоа на хартијата беа поставени тетсубиши, кои учениците требаа да ги почуствуваат под нозете и да ги истуркат со специјален чекор надвор од патеката на движење.
За време на демонстрацијата изведена од инструкторот, учениците едвај чекаа да ја направат техниката, но после неколкуте неуспешни обиди, сфатија колку многу тренинг е потребно за да успеат.

Инаку, за време на семинарот, временските прилика беа и повеќе од добри, со оглед на тоа што изминува претпоследниот месец од годината.

Author koryuPosted on октомври 30, 2011Categories Почетна

На 06 ноември, ќе се одржи претпоследниот семинар во природа за 2011 година, на тема: шиноби арукихо (начини на невидливо движење).

На семинарот можат да учествуваат сите ученици на
доџо-то Буџинкан Македонија / Пат кон Сонцето.

Потребна опрема за вежбање: цврсти нозе и таби (тие што немаат, патики со мек ѓон)

Тема: Шиноби Арукихо (начини на невидливо движење)

Ден: 06.11.2011 (недела)

Место: Млака

Програма:

08.00 часот – поаѓање од Скопје

09.00 часот – пристигнување

10.00 -15.00 часот –
теоретски и практичен дел

16.00 враќање назад

Author koryuPosted on октомври 17, 2011Categories Почетна

Семинарот со наслов „Силата на Јари – тактика и стратегија“, што вчера се одржа на падините на ридот Орљак, отвори нови видици за учениците што учествуваа на настанот.
Имено, ако минатата година уживаа откривајќи ја силата и моќтта на копјето, овој пат стопроцентно се уверија во неговата ефикасност и надмоќ во однос на противникот вооружен со друго оружје.

Семинарот започна со предавање и тренинг на основните техники на удирање и блокирање со катана (сабја) и со јари (копје). Потоа се продолжи со увежбување на различни борбени сценарија (кати) и тоа: копје против меч и копје против копје.
На крајот, се вежбаа техники на формациска борба, а како и минатата година, така и оваа, учениците на Буџинкан Македонија уживаа во разновидноста на тактитата и на стратегијата на овој начин на војување.

Што се однесува до временските услови, во текот на денот постојано се менуваше од сончево на облачно и обратно, но температурата на воздухот на моменти беше исклучително ниска, додека ветерот што дуваше од север неуспешно се трудеше да ја намали вољата кај учесниците. По завршувањето на семинарот, некои од нив побараа овој семинар следната година да биде дводневен.

Author koryuPosted on октомври 6, 2011Categories Почетна

По минатогодишниот многу успешен семинар „Силата на јари-то“, оваа година одлучивме да одржиме уште еден сличен. Разликата ќе биде во тоа што овој пат нема да се изучуваат кати, туку ќе се работат само техники на одбрана од меч, одбрана од копје, како и формациско борење.
За таа цел, ќе се вежба на специјално подготвени кукли за да може да се почуствува духот на минатото, но и да се добие пореална представа за тоа како изгледала борбата со копје.

„Школото Шинден Фудо рју Дакентаиџутсу
ги користи следниве оружја: Јари (копје), Оно (воена секира), О Тсучи (голем
чекан), Тачи (меч) и Нагината. Легендата вели дека една вечер демонот (Тенгу) му
дошол на сон на основачот на вештината и го научил како да се бори со Јари.
Овие техники и ден-денес се сметат за најголема тајна на школата.„

На 16 октомври, инструкторот Игор
Довезенски ќе го одржи 10-тиот семинар во природа за оваа година.
Семинарите во природа се заштитен знак на доџо-то Буџинкан Македонија и се одржуваат уште од самото основање на организацијата Пат кон Сонцето.
Ние веруваме дека тренингот во урбан и затворен простор никогаш не може да ни ги доближи условите на борбата што се одвивала на бојните полиња, па затоа редовно одиме во природа и се обидуваме да го осетиме духот на минатото.

На семинарот можат да учествуваат сите ученици на
доџо-то Буџинкан Македонија / Пат кон Сонцето.

Потребна опрема за вежбање: бокен и
јари

Тема: Силата на Јари-то

Ден: 16.10.2011 (недела)

Место: Слепо Коло

Програма:

08.00 часот – поаѓање од Скопје

09.00 часот – пристигнување

10.00 -16.00 часот –
теоретски и практичен дел

17.00 враќање назад

Author koryuPosted on септември 26, 2011Categories Почетна

Сите 11 учесници кои беа пријавени за овогодинешниот „Патот на Шугенџа“, успешно го завршија семинарот поминувајќи 50 километри за дванаесет ипол часа.

Настанот започна во 08.00 часот наутро, кога членовите на Буџинкан Македонија се упатија кон крајната цел – местото Камена Свадба во селото Куклица.
При тоа, како и секоја година, ги посетивме сите попатни свети места кои зрачеа со својата енергија наоколу и позитивно делуваа на нас.
Околу 15.00 часот, стигнавме до крајната цел, по што, после полчасовен одмор, се упативме назад кон почетната точка.
Во 20.30 часот, се вративме под Липац, од каде што и тргнавме.
Во текот на целиот ден, ги поминавме селата Бељаковце, Коњух, Шопско Рударе, Вак’в, Куклица и Димонце, при тоа завртувајќи голем круг околу предвидената рута.
Најголем впечаток ни остави селото Куклица, кое беше толку големо и со толку многу маала, што изобилуваше со навистина прекрасни пејсажи. Некои негови делови беа толку многу таинствени и сокриени од цивилизацијата, така што буквално видовме места каде што човечка нога не стапнала со години.
Учесниците покажаа навистина силен дух, иако на неколку пати намерно беа провоцирани и тестирани од водачот на Буџинкан Македонија, шидоши Игор Довезенски.

Уште еднаш, се покажа дека семинарот Патот на Шугенџа е еден од најтешките, но истовремено и најпривлечни семинари во организација на нашето доџо.