Буџинкан Македонија

Author koryuPosted on јули 15, 2009Categories Почетна

Нинџутсу Сојузот Буџинкан Македонија, како еден од најактивните
клубови за борбени вештини на Балканот, прв во регионот на југоисточна
Европа изгради нинџутсу тренинг центар во природа од камп тип и тоа на
свое приватно земјиште.

Првично, кампот е предвиден како место на кое ќе се врши обука на
членовите на Буџинкан Македонија за време на месецот август
(единствениот месец кога школите на Сојузот не работат). Тренингот во
кампот ќе се разликува од оној во доџо-ата, бидејќи во него, ќе може да
се вежбаат таиџутсу техники (со тело) и буки ваза (со оружје) кои
вообичајно е невозможно да се вежбаат во затворен простор (лак и стрела
на пример).

Истовремено, кампот ќе служи и како тренинг центар за обука,
дополнителна обука или кондициски подготовки на лица кои се занимаваат
со боречки спортови, а на кои, нинџутсу тренингот може да им допринесе
постигнување на подобри резултати. Вратите на кампот се отворени и за
тие што сакаат да ги намалат вишокот на килограми или да ја  зголемат
својата мускулна маса, на природен начин преку вежбање и здрава
исхрана. Центарот ќе служи и за рекреација и релаксација на умот и
телото преку различни видови на медитација и вежби.

На летниот нинџа камп, што ќе се одржи од 04 до 12.08.2009, можат да
учествуваат и лица кои не се членови на Буџинкан Македонија, но сакаат
одблизу да се запознат со нас и со нашата вештина. За таквите учесници
тренинзите не се обврзувачки и тие самите си ги организираат своите
активности (или во соработка со нас), односно уживаат во благодетите на
чистиот воздух, органската храна и речните плажи, исто како кога се на
летување.

Најпосле, нашиот тренинг центар е место што изобилува со услови за
самоусовршување преку разновидни физички и ментални вежби на забавен
начин.  

Постепено се предвидува Летниот Нинџа Камп, да прерасне во Хомбу
(стожер) доџо на Нинџутсу Сојузот Буџинкан Македонија, со изградба на
зграда која ќе ги има сите погодности и карактеристики на едно
вистинско јапонско доџо. 

За неколку дена ќе исфрлиме нова веб локација наменета само за Летниот Нинџа Камп.

Author koryuPosted on јули 13, 2009Categories Почетна

Обилните дождови во изминатите денови и надојдената Крива Река, беа
причина темата Суи Рен да биде заменета со Јуми Ја Џутсу (вештина на
користење на лак и стрела).
Како и секоја година, учителот Довезенски најпрвин ги запозна
учесниците со историјатот и употребата на ова оружје, а потоа им го
демонстрираше и начинот на изработка на истото.
Откако учениците ја совладаа вештината за изработка на лак и стрела, со
краток, но силен марш, групата се упати кон местото Кршче, во близина
на Еленачкиот Кладенац. Тука, започна основната обука на гаѓање во мета
со користење на различни камае (положби на телото).
Освен со техничките детаљи и карактеристики на Јуми Ја Џутсу,
учесниците беа запознаени и со филозофијата и стратегијата потребна за
успешно совладување на вештината.
Последниот дел од семинарот, беше посветен на гаѓање со самострел.
Како и секогаш, учениците имаа можност да го збогатат и докомплетираат
своето знаење преку повторување на старите техники, но и учење на нови,
кои долго време ќе ги тераат да размислуваат повеќе за оваа древна
вештина.  

Author koryuPosted on јули 7, 2009Categories Почетна

На 12 јули, 2009 година, Буџинкан Македонија го организира традиционалниот семинар во природа на тема Суи Рен (обука во вода).
Ова ќе биде уште една одлична можност за сите наши членови да научат
повеќе за оваа вештина која е една од 18 основни боречки вештини (Ninja
Juhakkei), што секој нинџа морал да ги совлада за време на својата
обука.

Тема: Суи Рен / средства за преминување преку вода, бешумно влегување
во вода, водата како оружје, алатки за дишење под вода, невидливост во
водена средина, преживување преку обезбедување храна и вода за пиење
итн. 

Ден: 12 јули, 2009 (недела)

Место: Глушчево Ѓерме на Крива Река
Програма:
08.30 часот – поаѓање од Скопје
09.30 часот – пристигнување
10.00 -16.00 часот – теоретски и практичен дел
16.30 враќање назад

Цена: 1.000 денари (во цената е вклучено: семинарска такса и превоз)
Семинарот ќе се одржи без разлика на временските услови.

Author koryuPosted on јули 6, 2009Categories Почетна

Драги боречки пријатели,
пред Вас е новата (редизајнирана) веб-страница на Нинџутсу Сојузот Буџинкан Македонија. Се надевам дека ќе Ви се допадне.
Најпрвин, сакам да му се заблагодарам за досегашната соработка на Игор Савиќ, инаку член на нашиот сојуз. Тој ги постави стандардите на нашата веб-страница. Истовремено, ја користам оваа прилика да му се извинам за постојаното „малтретирање“ кое мораше да го трпи со цел да одговори на моите чести барања. Станува збор за одличен пријател и неверојатно добар програмер, на кого му ја доделувам титулата „Чикушоу“ (на јапонски-Ѕвер) 🙂
Новиот редизајн е дело на нашиот истакнат член Дарко Божиновски. Отсега тој ја презема одговорноста за развој и одржување на нашата веб-страница. Даре, спреми се за „малтретирање“.
Гамбате Кудосаи !!!                                          
                                                                            сенсеи Игор Довезенски

Author koryuPosted on јуни 19, 2009Categories Почетна

Во Хомбу доџо-то на Школото за борбени вештини Пат кон Сонцето, вчера
во рамките на Нинџутсу Сојузот Буџинкан Македонија се одржа полагање за
кју (ученички) степени.
За 9 кју, тестот успешно го положија учениците Маја Илиевска, Елена
Ангеловска, Стефан Робески, Перица Давитков, Билјана Тасева и Дамјан
Стојановски, додека со 7 кју се „закитија“ учениците Дарко Божиновски,
Благица Стојаноска и Кристијан Антовски.
На сите, од се срце, им честитаме за направениот напредок.
Следното полагање ќе се одржи во текот на месецот декември, 2009 година.

Author koryuPosted on јуни 8, 2009Categories Почетна

За овој Готон По може да се каже дека беше продолжување на минатогодишниот.
Тренингот започна на местото викано Еленачки Карпи, каде што учениците
на Буџинкан Македонија учеа како да се качуваат и симнуваат по карпи
без никаква заштитна опрема односно само со помош на обично јаже и меч
(бокен). Потоа се изучуваа техники на качување со помош на два ножа, но
и со помош  со партнер.
По ова, со помош на инструкторот Игор Довезенски, постарите ученици ги
подучуваа помладите како се подготвува стапица, а најдобар момент на
семинарот беше договорената акција за изненадување на „непријателските
гонители“.
Следуваше објаснување и изработување на таканаречената Огнена Топка, со
која на некој следен семинар уште подетално ќе се позанимаваме.
Освен овие вештини, на учениците им беше посветено големо внимание при
запознавањето со лековитите билки и користењето на опкружувањето во
случај на преживување во природа.
Семинарот беше успешен и покрај топлото и спарно време, кое се трудеше
да влијае врз телесните и умствените способности на учесниците.  

Author koryuPosted on јуни 1, 2009Categories Почетна

 Традиционалниот семинар во природа на тема: Готон По (користење на
петте природни елементи), оваа година ќе се одржи на 07.06.2009.
Готон По е составен дел од легендарната вештина на Тогакуре Рју
Нинџутсу, Интон Џутсу, односно вештина на сокривање, избегнување и
камуфлирање. Според тоа, учесниците на семинарот ќе имат можност да
научат како да ги користат природните елементи: земја, вода, дрво, оган
и метал, со цел да можат да се сокријат, камуфлираат и да ја избегнат
опасноста која им се заканува.

Ден: 07 јуни (2009)

Место: Млака и Еленачки Карпи

Програма:    08.00 часот – поаѓање од Скопје
                     09.00 часот – пристигнување
                     10.00 -16.00 часот – теоретски и практичен дел
                     16.30 – враќање назад

Цена: 1.000 денари (во цената е вклучено: семинарска такса и превоз)

Овој пат ќе се работи во мала група. Пријавување до петок.

Author koryuPosted on мај 18, 2009Categories Почетна

На покана од Нинџутсу Сојузот Буџинкан Црна Гора, Нинџутсу Сојузот
Буџинкан Македонија учествуваше на првиот меѓународен будо таиџутсу Таи
Каи семинар во оваа пријателска земја. На семинарот, кој се одржа во
градот Будва и кој беше беспрекорно организиран, учество земаа околу 60
учесници од неколку земји.
Во текот на двата дена, шиханот Едвард Мартин (Папа Сан) ги подучуваше
учесниците на техники на одбрана од нож, но и на голорака борба (таи
џутсу).  
Како и секогаш, покрај техничкиот дел, учителот Едвард Мартин оддели
време за подучување и на менталниот апсект на борбата ( преку куден)
илустрирајќи го тоа со најразлични примери од неговото богато искусто
како будока.
Беше убаво да се видат и нашите стари пријатели од клубовите со кои Буџинкан Македонија веќе со години негува одлични односи.
Во времето предвидено за пауза помеѓу двете сесии, нашата седумчлена
„екипа“ ја посетуваше градската плажа во овој туристички центар и се
капеше во морето, додека вечерите беа резервирани за забава во стариот
дел од градот.
На затворањето на настанот, организаторот на семинарот Предраг
Лазаревиќ, на представникот на Буџинкан Доџо за Македонија Игор
Довезенски, му додели специјално признание за Развојот на Буџинкан
Нинџутсу во Црна Гора.
Им посакуваме на нашите пријатели и понатаму да организираат вакви прекрасни семинари.
Гамбате !!!

Author koryuPosted on април 27, 2009Categories Почетна

Под водство на Игор Довезенски, главен инструктор на Нинџутсу Сојузот
Буџинкан Македонија, вчера на ридот Еленац се одржа семинар на тема
Кенџутсу Кихон на кој учесниците имаа можност да ги проучуваат
основните техники на ракување со јапонски меч. 
Пред започнувањето на техничкиот дел, учителот Довезенски преку Куден
(усно предавање) ги запозна учениците со некои важни правила кои се
однесуваат за оваа вештина, но исто така, им укажа на важноста на
психичката подготвеност за време на изведување на самите техники на
борба со меч.
Потоа, се вежбаа основните положби на телото (камае но ката) при што
беа објаснувани начините на напад односно сечење од соодветното камае.
Тренингот продолжи со демонстрација и вежбање на осумте начини (правци)
на сечење со меч (хаппо гири), како и реалната борбена апликација на
истите (шинкен гата).
Учителот Довезенски на доста високо ниво и со многу детаљи ја
објаснуваше секоја техника, а на крајот ги подучи учениците на
посебниот начин на движење (таи сабаки) при борба со меч, по што
движењето беше проучувано преку ставот Ичи но Камае и техниката Тсуки
(прободување).
На крајот беа искажани пофалби за учесниците од почетната група на
доџото Пат кон Сонцето Скопје, кои покажаа задоволителни резултати на
семинарот.
Голема благодарност до Природата (читај Господ) за прекрасниот сончев
ден, кои ни овозможи да ги наполните ќелиите во телото со благодатна
енергија. 

Author koryuPosted on април 22, 2009Categories Почетна

На 26 април (недела), Нинџутсу Сојузот Буџинкан Македонија ќе одржи
семинар во природа на тема Кенџутсу Кихон (основни вештини на користење
јапонски меч).
На семинарот ќе се обработуваат основните положби на телото (камае),
основните техники на сечење (хаппо гири), но и користење на мечот во
борбени ситуации (шинкен гата).
Семинарот е предвиден за сите ученици, без разлика на нивото на нивното
знаење, но е посебно важен за почетниците кои досега не ја изучувале
оваа вештина.

Тема: Кенџутсу

Ден: 26 април, 2009 година

Место: Еленац

Програма:

08.00 часот – поаѓање од Скопје
09.00 часот – пристигнување
10.00 -16.00 часот – теоретски и практичен дел
17.30 часот – враќање назад

Цена: 1.000 денари – во цената е вклучено: семинарска такса и превоз 

Пријавете се на време на е-маил или во доџо.
Семинарот ќе се одржи без разлика на временските услови (…и да врне и да вее и бура да коси…)