Буџинкан Македонија

Author koryu

Точно пет години од последниот официјален Суи Рен семинар во природа, водачот на „Пат кон Сонцето“ повторно го оживува овој некогаш редовно одржуван настан во Буџинкан Македонија. 

Велиме „официјален“, бидејќи последниве неколку години техниките на Суи Рен (Обука во вода), членовите на доџо-то имаа можност да ги вежбат за време на нашите летни нинџа кампови. 

Инаку, оваа вештина во минатото била задолжителна за сите Тогакуре рју шиноби воини, а се состоела од техники на бешумно пливање, тивко движење низ реките и езерата, преминување на водени површини со помош на неконвенционални средства, борба и дишење под вода итн. 

Author koryu

Нинџа Клинци-те на Буџинкан Македонија, во саботата по втор пат го освоија Хомбу Доџо-то на Организацијата за изучување класични јапонски боречки вештини „Пат кон Сонцето“.

Во освојувачката мисија овој пат учествуваа 22 дечиња од подмладокот на единствениот клуб во нашата земја каде што се негуваат традиционалните боречки уметности кои потекнуваат од Земјата на Изгрејсонцето. 

За време на настанот, што се одржува два пати годишно односно на пролет и на есен, најмладите ученици на Буџинкан Македонија имаа најразлични активности во текот на целиот ден. Под водство на инструкторите Тодор, Таки и Сања, им беше одржан час по вештината Гјокко рју при што се вежбаше Саншин но Ката-та, а слушаа и неколку предавања на тема: „Тогакуре рју Нинџутсу“.

Главниот инструктор на Буџинкан Македонија, Игор Довезенски им одржа час за кенџутсу (јапонско мечување), а претходно дечињата имаа можност детално да го разгледаат Хомбу Доџо-то кое истовремено претставува и мал музеј каде што можат да се видат најразлични предмети односно орудија кои биле користени од страна на средновековните јапонски нинџи и самураи.

За најмладите исто така беше организирана посета на фарма со овци, а беше подготвен и вкусен домашен ручек со свежи продукти директно од градината што се наоѓа веднаш до доџо-то. 

Слободното време беше искористено за најразлични игри, но и за јадење вишни кои клинците ги береа директно од дрвцата кои растаат насекаде во дворот на Хомбу-то. 

На крајот уште да споменеме дека за време на престојот, дечињата цело време беа под будното око на лекар што беше ангажиран од страна на Организацијата „Пат кон Сонцето“.

Следната освојувачка мисија на Нинџа Клинци-те во Хомбу Доџо-то ќе се одржи на есен.  

Author koryu

Вчера во месноста Млака во долината под планината Липац, се одржа еднодневен семинар во природа на тема: ЈумиЈа Џутсу (вештина на гаѓање со лак и стрела). На семинарот присуствуваа четворица членови на Буџинкан Македонија кои имаа можност одблиску да се запознаат со едно од најстарите оружја познати кај речиси сите народи на планетава.

Настанот започна со мало предавање за историјата на јапонскиот лак, а потоа се започна со гаѓање со таканаречениот Ханкју односно Полулак. Станува збор за скратена верзија на јапонскиот долг самурајски лак, инаку познат по своите одлични перформанси.

Покрај гаѓањето од неколку различни ставови, се вежбаа и разни техники на стрелање во движење, во трчање, но и техники на испалување на стрелата во далечина.

На крајот беше договорено овој семинар и понатаму да продолжи да се одржува, секогаш во исто време во годината односно во месецот мај.

Author koryu

Заврши и вториот од предвидените меѓународни семинари за 2016-та година со најдобрите европски кобудо мајстори, а организирани од страна на Организацијата за изучување традиционални јапонски боречки вештини – Пат кон Сонцето. 

На тридневниот настан учествуваа неколкумина ученици од Катори Шинто рју Македонија, како и еден ученик на шидоша Ерик Лоув од Холандија. 

За време на семинарот, учителот Лоув предаваше техники на симултано извлекување и сечење со јапонски меч (иаиџутсу/баттоџутсу), како и борба со катани (кенџутсу). Не изостанаа ниту техниките со долг стап (боџутсу), како и катите со нагината. 

Како и секогаш, учителот Лоув несебично и со многу внимание го предаваше своето знаење и тоа на само нему својствениот начин – со многу хумор и смеа.

Слободното време во паузите беше искористено за посета на Осоговскиот Манастир и на Крива Паланка, како и на локалитетот Куклица и на древниот град Кратово. 

До следното видување…

Author koryu

Во организација на Катори Шинто рју Македонија, а со подршка на Организацијата за изучување јапонски класични боречки вештини „Пат кон Сонцето“, утре вечер во Македонија ќе допатува нашиот ментор за Теншин Шоден Катори Шинто рју Буџутсу – Ерик Лоув од Холандија. Во следните неколку денови, тој ќе одржи семинар за оваа најстара документирана јапонска боречка традиција, а на настанот учество ќе земат неколкумина членови на нашето доџо.

Инаку, ова е трета посета на нашата држава од страна на учителот Лоув, кој инаку е еден од ретките носители на титулата Менкјо за Катори Шинто рју.

На семинарот ќе се вежбаат техники на извлекување на мечот од седечка (иаиџутсу) и стоечка (баттоџутсу) положба, како и техники на борба со стап (боџутсу) и со хелебарда (нагинатаџутсу).

Сите заинтересирани можат да не контактираат на нашиот и-мејл: daito_macedonia@yahoo.com

Повеќе информации за Теншин Шоден Катори Шинто рју Буџутсу во Македонија —->тука

За вештината, на Википедија —–> тука

И на You Tube —–> тука

Author koryu

Викендов што измина се одржа првиот од серијата интензивни курсеви за „Шиноби Таисо“, под водство на водачот на Организацијата „Пат кон Сонцето“ – Игор Довезенски. Тројца ученици на Буџинкан Македонија одлучија да го изучуваат овој систем во кој што се инкорпорирани многу традиционални јапонски методи создадени со цел да помогнат при разни физички дисфункции предизвикани поради нерамнотежа во мускулниот систем кај човекот, но и разни пореметувања на текот на енергијата во телото.

Веднаш по завршувањето на првиот дел од курсот, учесниците ги споделија своите импресии на интерниот Форум.

„Долго време сум во Буџинкан Македонија и сум присуствувал на многу тренинзи, семинари, како домашни, така и странски. Сум бил учесник и на летните кампови, сум доживеал и поминал низ секакви предизвици во доџо-то. Толку многу работи сум научил и сум запознал толку многу луѓе и зарем можам после сето тоа да се запрашам: ’Па добро бе, дали вреди? Дали е тоа загубено време, дали сум можел нешто попаметно да направам?’

Сенсеи во ова има навлезено максимално детално, прецизно дури и на академско ниво. Запознавање на системот кој го движи нашето тело, неговите природни положби и зошто доаѓа до повреди, понатаму зошто човекот се повеќе има дисбаланс на мускулната структура, каков е нашиот модерен начин на живот и кои се последиците од технолошките предности кои ги користиме секојдневно. На сите овие прашања добивме одговор, иако мислам дека два дена се премалку за да се помине сето тоа и понатаму потребно е секојдневно истражување и надградување. Една од најважните работи кои ги научив за време на курсот е дека човекот мора совршено да си го познава своето тело и да се грижи за него најдобро што може. Сметам дека се повеќе се отуѓуваме од себе и дека комплетно сме во некаков самоконфликт. Сите се залажуваме дека сме зафатени со некои важни работи, а во суштина тоа што е навистина важно го отфрламе на страна, го забораваме, ги игнорираме сигналите за помош кои телото ги праќа и на крајот заболуваме.

Author koryu

Водачот на Организацијата за изучување традиционални јапонски борбени вештини „Пат кон Сонцето“, инструкторот Игор Довезенски, учествуваше на меѓународниот семинар за Теншин Шоден Катори Шинто рју Буџутсу организиран од страна на шидоша Луиза Раини од Италија. Настанот се одржа во Милано, во траење од четири дена под водство на шиханот Нобутоши Отаке.

За време на семинарот, Сенсеи Отаке ги подучуваше сите кати од Омоте но Тачи, а секако до најситни детаљи ги објаснуваше и формите на борба со Бо (стап долг 180 см.), како и со Нагината. Напредните ученици имаа можност да ги изучуваат и техниките од повисокото ниво Гогјо но Тачи. 

Специјално за овој интернационален настан, допатуваа повеќе од 60 кобудоки од 14 земји од целиот свет, а тренингот како и дружењето меѓу учесниците беше на највисоко ниво.

Шиханот Отаке за време на последниот тренинг му ја предаде на Довезенски првата ката со Нагината, а детално му ги објасни и начините на користење на ова средновековно јапонско оружје.

До следниот интернационален настан, новиот материјал треба целосно да се проучи за да може да се продолжи понатаму по тешкиот Пат на оваа најстара јапонска боречка традиција. 

Author koryu

Семпаи Тодор Ангеловски, заедно со помладите ученици Владимир Антовски, Сања Симонова и Таки Гаковски, вчера беа гости во скопската телевизија ТВ21. Во емисијата со наслов „Урбан Таг“, тие го претставија нашето доџо, при што презентираа и дел од нинџутсу техниките кои што се вежбаат во Буџинкан Македонија. 

Самиот прилог започна со снимка од полагањето за нидан на шидоши хо Марко Опачиќ, што неодамна се одржа во Хомбу Доџо-то на „Пат кон Сонцето“, а потоа нашите членови одговараа на прашањата поврзани со нашата работа. На крајот, кохаи Сања Симонова и кохаи Таки Гаковски демонстрираа кати од школата Гјокко рју Кошиџутсу, како и техники од програмата за полагање за 5 кју.

Додека да обезбедиме подобра снимка од гостувањето, прилогот можете да го погледнете на ју тјуб каналот на ТВ21 —-> Тука

Author koryu

Помладиот инструктор на Буџинкан Македонија, Марко Опачиќ, во саботата во Хомбу Доџо-то на „Пат кон Сонцето“ успешно положи за нидан (II дан). На свечениот чин присуствуваа околу 30-тина сегашни и поранешни членови на Буџинкан Македонија кои специјално допатуваа за да искажат почит кон овој истакнат и почитуван член на нашето доџо.

Под водство на својот учител, шидоши Игор Довезенски, Опачиќ го започна својот Пат на 27.02.2007 година. Досега учествувал на шест летни кампови, на 13 меѓународни семинари организирани од страна на Буџинкан Македонија, потоа на 47 семинари во природа на кои предавал инструкторот Довезенски, како и на два меѓународни семинари надвор од нашата земја на кои предавал шиханот за Катори Шинто рју Буџутсу – Нобутоши Отаке Сенсеи. Покрај ова, тој ги изучувал класичните јапонски боречки вештини и преку учество на 23 интензивни семинари во Хомбу Доџо-то на Буџинкан Македонија, како и преку 24 еднодневни семинари одржани под водство на својот учител. Опачиќ е одговорен и за подучувањето на новозапишаните членови во доџо-то, преку раководење на почетната група (шошинша), а истовремено е единствен член на „Пат кон Сонцето“ кој истовремено ги вежба сите корју традиции кои се предаваат во нашата Организација (Буџинкан Такаматсу-ден, Даито рју Аикибудо и Теншин Шоден Катори Шинто рју Буџутсу).

На Марко му честитаме со сето срце за досегашниот успех и посакуваме и понатаму да продолжи со уште поуспешното градење на својата личност и на својот карактер како воин.