Буџинкан Македонија

Author koryu

Нинџа Клинци-те успешно ја завршија есенската „инвазија“ на Хомбу Доџо-то на Буџинкан Македонија, земајќи си со себе прекрасни спомени кои засекогаш ќе останат врежани во нивните срца.

Во неделата, најмладите членови на нашето доџо повторно имаа можност да бидат дел од прекрасната природа што го опкружува Хомбу-то и да го поминат денот во игра, вежбање и дружење меѓу себе.

Тренинзите се одржаа под водство на семпаи Тодор Ангеловски и на кохаи Таки Гаговски, а темата беше: Основите на боречките вештини Гјокко рју Кошиџутсу и на Даито рју Аикиџуџутсу. 

Во вториот дел од денот, главниот инструктор на Буџинкан Македонија, Игор Довезенски, одржа Џунан Таисо тренинг, на кој се обиде на дечињата да им ја објасни важноста и полезноста од правилниот секојдневен тренинг, а особено за придобивките од вежбите за растегнување на телото за нивниот правилен развој. 

Author koryu

Во Хомбу Доџо-то на Организацијата за изучување традиционални јапонски борбени вештини „Пат кон Сонцето“, во саботата се одржа специјален еднодневен семинар, на кој инструкторот Игор Довезенски ги подучуваше учесниците околу начините за стекнување трпение, дисциплина, дефинирање на целта, за успехот и неуспехот, како и за придобивките од тимската работа.

Настанот беше организиран на барање на кординаторите од CEED Macedonia кои процениле дека токму Довезенски е личноста од која младите што учествуваат во нивната програма ќе можат да научат нови техники кои ќе им помогнат понатаму да ги развијат своите претприемачки вештини.

Всушност, ЦЕЕД Едукација (ЦЕЕД ЕДУ) е програма која го доближува претприемачкиот дух до децата и младите преку пренесување, доживување и практикување успешни приказни од светот на бизнисот притоа хранејќи ги нивните уметнички и духовни потреби. Тоа е програма која е изградена врз основа на знаењата и искуствата на експерти од областа на едукацијата, како и на искуствата од разните претприемачи и менаџери. 

Освен предавањето на горе споменатите техники, но и за историјата и традицијата на јапонските витези, Довезенски доста време посвети и на хиреархијата што владеела во едно организирано општество какво што било јапонското. Потоа тој, заедно со своите ученици, демонстрираа и техники од вештините кои се вежбаат во „Пат кон Сонцето“, најпрвин од нинџа школите на Буџинкан Доџо, а потоа и од Даито рју Аикиџуџутсу и Теншин Шоден Катори Шинто рју Буџутсу.

Author koryu

Осмото издание на легендарниот семинар познат под името „Патот на Шугенџа“, создаде уште еден подвиг кој засекогаш ќе биде
запаметен и раскажуван од страна на следните генерации воини на Буџинкан Македонија. За 20 саати непрекинато марширање по различен терен, двајца од учесниците на настанот успеава да изодат пат од 100 километри.

Стартната точка почнуваше пред ТЦ Бисер во населбата Аеродром, додека крајната цел беше да се пристигне во Хомбу Доџо-то на Организацијата „Пат кон Сонцето“ во долината под планината Липац.
На семинарот беа пријавени вкупно 10 членови на Буџинкан Македонија, кои под водство на инструкторот Игор Довезенски точно во 07.00 часот го започнаа своето патешествие.

Првите 35 километри беа поминати речиси рутински, благодарение на добрата кондиција што членовите на доџо-то ја поседуваат, а секако постигната поради силните психо-физички тренинзи во текот на целата година.
При искачувањето на ридовите над селото Винце, кај неколкумина учесници почнаа да се појавуваат првите знаци на криза, а предизвикани најмногу поради недостатокот на вода за пиење.

За да биде појасно, станува збор за област која што е доста сува и безводна, а главната препрека до Хомбу Доџо-то е предизвикана од Градиштанската Планина која што е широка околу девет, а долга околу 30 километри. Познавачите на теренот во кумановската област, знаат дека иако станува збор за ниски планини, сепак искачувањето на нив е доста напорно поради терасестите ридови од кои што се составени планинските масиви. Или поедноставно кажано, зад секој изоден рид, се појавува нов, со редовно длабок и непрооден дол, а сето тоа исполнето со густа, ниска и боцкава непроодна вегетација, која што многу често предизвикува движење на сите четири екстремитети.

Токму за време на искачувањето на претпоследниот рид во атарот на селото Колицко, при совладани 43 километри, кај еден од учесниците се појавија грчеви на мускулатурата, по што движењето на групата беше доста успорено. Во тој момент, водачот на Буџинкан Македонија – Игор Довезенски, мораше да донесе навидум необична одлука односно да го смени движењето на запад или поточно во широк лак да се врати назад кон најблиското село каде што има превоз до најблискиот град.

По кратко информирање за причината за ваквата одлука, групата се спушти до селото Пчиња, од каде што патот го продолжија тројца учесници: Игор Довезенски, Сања Симонова и Таки Гаковски. Со силен марш, за неколку саати тие пристигнаа во Куманово, каде што Симонова мораше да го откаже понатамошното патување поради силните болки во мускулите и треската предизвикана од огромниот напор.

Во 03.00 часот наутро, изнемоштени, но со ведар дух, по 20 часа непрекинато пешачење, на целта пред вратата на Хомбу Доџо-то пристигнаа Игор Довезенски и неговиот близок ученик Таки Гаковски. Истовремено тие го срушија претходниот рекорд од поминати 80 километри, поставен за време на „Патот на Шугенџа III“ во 2009 година.

На крајот, сакаме да им честитаме на сите учесници на семинарот, без разлика што не го завршија до крај, за храброста да се пријават односно да бидат дел од еден ваков необичен настан, кој е речиси неверојатен за поголемиот дел од популацијата на земјината топка.

Author koryu

На барање на членовите на Буџинкан Македонија, по тригодишна пауза, водачот на доџо-то Игор Довезенски одлучи да го оживее легендарниот подвиг „Патот на Шугенџа“. 

Шугендо е древен јапонски метод кој ги истражува релациите помеѓу човекот и природата. Шугендо значи „Пат преку вежбање и тестирање“, односно тоа е аскетска дисциплина која има за цел да постигне самоусовршување преку повлекување во планина, медитација под водопади и ладни реки, вежби за дишење на недостапни терени, се до достигнување на неверојатни подвизи преку тестирање на телесната и менталната издржливост. Тие кои го практикуваат овој метод, познати се под името Шугенџа, а учењето се практикува во Јапонија се до денешни дни.

Настанот ќе се одржи на 24 септември, а маршрутата е веќе определена:

Скопје – Хомбу Доџо „Пат кон Сонцето“

Должина: 62 км (сметано според должината на патот наменет за патнички сообраќај) 

Тргнување: сабота во 07:00 часот.
Пристигнување: само Господ знае 🙂

Важно: пред учество секој од учеснициите во сопствена режија треба да си направи соодветни лекарски прегледи.

Повеќе за настанот: http://hombu.koryu.mk/article/show/469

Author koryu

Веќе 21-ва година по ред Организацијата „Пат кон Сонцето“ ги отвора вратите на доџо-то за новите кандидати кои имаат желба да навлезат во светот на јапонските нинџи и самураи.

Иако Доџо-то за класични јапонски самурајски и нинџа вештини „Буџинкан Македонија“, врши уписи во текот на целата година, сепак месецот септември е најповолен момент за да отворите една нова страница од Вашата животна историја.

Ги известуваме сите заинтересирани дека првиот час за почетниците ќе се одржи на 1 септември, со почеток во 20:30 часот, додека напредната група продолжува со својата работа еден ден подоцна (во 20:00 часот). 

За тие што се уште не се запознаени со нашата работа, доџо-то е основано на 02 јули, 1995 година и засега е единственото во нашата држава признаено од страна на поглаварот на Буџинкан, соке Масааки Хатсуми.

Буџинкан Македонија важи за еден од најдинамичните клубови во Европа со многубројно и активно членство и со најмногу активности организирани во текот на целата година. 

Во рамките на доџо-то постојат повеќе секции за возрасни (од 13 до 113 години), но и за деца (од 5 до 12 години). 

Повеќе информации за нас можете да добиете на следниот линкhttp://hombu.koryu.mk/article/show/448

За инструкторот на Буџинкан Македонија http://hombu.koryu.mk/article/show/461

За термините и за локацијата http://hombu.koryu.mk/article/show/454

Ве молиме доколку имате прашања, не двоумете се да не контактирате преку daito_macedonia@yahoo.com или на 075 564 011.

Author koryu

Според зборовите искажани од страна на учесниците на Летниот Корју Камп, се добива впечаток дека секој следен настан, од година на година, станува се поинтересен и се подобро организиран. Тоа е само поттик и понатаму да го одржуваме и да го подигнуваме нивото на квалитетот на овој величенствен настан.  

Оваа година тринаесет учесници повторно го почуствуваа на своја кожа динамичниот тренинг карактеристичен за Буџинкан Македонија и за Организацијата „Пат кон Сонцето“, а двајца од нив, допатуваа дури од Романија, со цел барем на кратко да го осетат жестокиот ритам што го наментуваме за време на Летниот Камп.

Темата на овогодинешниот настан беше самурајската боречка школа Такаги Јошин рју Џутаиџутсу, како и најстарата документирана јапонска борбена вештина Теншин Шоден Катори Шинто рју Буџутсу. Можеме слободно да кажеме дека учесниците на кампот целосно се предадоа и уживаа во откривањето на тајните на двете рју-ха, но и во личната телесна транформација предизвикана од силниот Шиноби Таисо тренинг, организиран од страна на водачот на Буџинкан Македонија – Игор Довезенски. 

Слободното време кое едвај го имаше беше искористено за капење во блиската река, како и за истражувачки експедиции на златните ридови на Орљак. Дружењето и меѓусебното поврзување на членовите на доџо-то секогаш е дополнителен мотив за учество на Летниот Камп, бидејќи ништо толку добро не придонесува за зацрвстувањето на врските помеѓу учесниците како заедничкиот деветодневен тренинг во долината под планината Липац.

Следната година ветуваме уште подобра организација и уште поквалитетни тренинзи. Темата е веќе позната, а за тие кои сакаат да дознаат повеќе, можат да ја посетат нашата веб-страница www.koryu.mk

Author koryu

Откако претходно ги совладавме техниките на организирано живеење во заедница на ниски планини и покрај реки, оваа година се посветивме на изучување на вештините за преживување на поголема група луѓе во шума. А викендов што измина, докажа дека некои од членовите на Буџинкан Македонија незапирливо го впиваат сето знаење што со години се таложело во инструкторот Игор Довезенски, а кој секогаш несебично се обидува колку што може повеќе да пренесе дел од сопственото искуство и на своите ученици.

Семинарот се одржа во шумата Млака, во долината под планината Липац и тоа на две различни локации. За чувството да се биде дел од овој настан, ќе споделиме дел од импресиите на некои од учесниците.

„Пристигнавме во Хомбу Доџо-то во 08.00 часот, а Сенсеи веќе не чекаше подготвен. Пред да тргнеме кон шумата, рече дека од возбуда не можел да заспие и дека едвај не дочекал. Потоа дознав дека еден ден претходно го ’фатило’ стомачен вирус, но јас не забележав од негова страна ниту еден знак на слабост во текот на целиот семинар. 

Кога ја пронајдовме бараната локација, Сенсеи најпрвин ни одржа предавање и ни ги кажа најважните работи кои треба да ги знаеме кога ќе се најдеме во ситуација да мора да организираме живот во шума на подолг период. На нашите прашања ни беше одговорено многу детално. Откако Сенсеи ни подели задачи, се фативме за работа. Ги спремивме леглата, го подготвивме огништето, а го расчистивме и целиот терен каде што требаше да логоруваме со следните два дена. Потоа почнавме да го подготвуваме ’ручекот’. Ископавме поголема дупка до огништето и ја наполнивме со компири кои потоа ги покривме со жар од сите страни. Само што се најадовме, веднаш почнавме со подготовката на следниот оброк. Како што секогаш не учи Сенсеи, обидите за преживување многу често се претвараат во борба за калории. Кога се стемни, почнавме да се подготвуваме за спиење. Стражата беше поставена, а од сите страни почнаа да ’доаѓаат’ звуците на шумата. Изгреа сонцето и Влатче веќе почна да не буди. Откако завршивме со утринската хигиена, го растуривме логорот и се преместивме на нова локација. Сенсеи и Таки отидоа да уловат по некој ’протеин’, а останатите повторно почнавме да ја средуваме опремата и местото. Ги исчистивме ’протеините’ од изнутрици, ги зготвивме и ги ’внесовме’ во себе. Потоа Сенсеи ни покажа како со примитивни алати можеме да направиме лакови и стрели за лов. 

Author koryu

По двата одржани семинари на тема „Живот во Дивината“, на кои членовите на Буџинкан Македонија ги изучуваа техниките на организирано живеење во заедница во дивина, време е за третиот.

На првите два настани инструкторот Довезенски ги подучуваше своите ученици како можат подолг период да преживеат во група доколку се засолнат на планина пониска од 1000 метри, како и на организирано живеење покрај река. 
За време на „Живот во Дивината III“, членовите на Буџинкан Македонија ќе имат можност да ги научат техниките на групно преживување во шума. 

Како што и беше најавено уште на првиот семинар, воините од доџо-то секоја година ќе се соочуваат со различен терен односно со разнобразни географски услови за живот. 

Семинарот ќе се раководи според сценарио на природна катастрофа или друга несреќа која бара повлекување на некое непристапно место и организирање живот на подолго време за одредена група на луѓе. Со совладувањето на новите вештини, членовите на доџо-то ќе бидат способни да го згрижат своето семејство и да му обезбедат основни услови за живеење во дивина во случај на опасност. 

Пред минатата година почнавме да го пишуваме новото поглавје на историјата, а оваа продолжуваме со третата глава. Не пропуштајте ја можноста да ги научите техниките на живеење во природа, кои во случај на природна катастрофа или друга незгода ќе ви бидат повеќе од потребни. 

На семинарот можат да учествуваат сите членови на доџо-то Буџинкан Македонија / Пат кон Сонцето, без разлика на нивното звање или знаење.

Потребна опрема: се што може да послужи за преживување во природа и што ќе го собере во вашиот ранец.

Ден: 23/24 јули (2016)

Место: Млака – во долината под Липац

Програма:

сабота: 07.00 часот – тргнување од Скопје

недела: 18.00 часот – враќање назад

Пријавување и информации преку инбокс, телефон или на Форум.

п.с. Престојувањето во природа носи одредени опасности. Сите учесници доаѓаат на сопствен ризик. Направете ги потребните лекарски испитување пред да се пријавите за учеството.

Author koryu

Шидоши хо Марко Опачиќ и овој пат го „напиша“ извештајот на веб-страницата преку споделувањето на импресиите од завчерашниот семинар на нашиот Форум.

„Знам за една приказна што ја кажа Сенсеи додека бил во Јапонија кога посетил едно свето место и одненадеж почнал неконтролирано да се смее од среќа. Зборувам за онаа насмевка, кога и душата и срцето Ви треперат како да сте доживеале нешто натприродно. Истото некако го чуствувам и јас. Можеби некои ќе помислат: ’Обична река, тренинг во вода и тоа е тоа’. Но Суи Рен го доживувам некако многу емотивно, а се уште неможам да откријам зошто е тоа така. Можеби затоа што се одржува точно после пет години од последниот, а тогаш бев помлад и се ми изгледаше некако нереално. Можеби затоа што Суи Рен е метод што нинџите го развиле до совршенство, па сето тоа можеби ме импресионира. Можеби затоа што е во вода, а сето тоа е предизвик да се издржи седум саати во таква средина. Многу од Вас нема никогаш да разберат дека во една обична река можат да се направат толку многу вежби. Да се ’измислат’ толку многу начини на криење. Неверојатни беа сите тие приказни што Сенсеи ни ги раскажа за време на семинарот, но и сите овие години додека сме минувале покрај таа легендарна река. Тоа што семинарот секоја година се одржува на различна локација, уште повеќе придонесува и внесува дополнителна возбуда. Младоста ја оставивме на таа река и горд сум и не се каам ниту една секунда за тоа – напротив. Му благодарам на Сенсеи што ме ’заглави’ оваа вечер да пишувам ’деншо’ со саати.