Категорија: Почетна

Author koryuPosted on април 20, 2010Categories Почетна

Во недела, Школото за класични борбени вештини Пат кон Сонцето / Буџинкан Македонија, организира семинар во природа на тема Боџутсу (вештина на борење со стап).

Станува збор за вештина која се изучувала во речиси сите класични школи и која отсекогаш била обврзна за изучување од страна на јапонските буши (воини).

На семинарот ќе се вежбаат положбите на телото како и ударите и блоковите со рокушако бо (стап долг околу 180 см.). Вежбањето на отворен простор, овозможува техниките и катите да се почуствуваат на начин како во времето на сенгоку џидаи (граѓанските војни во Јапонија) кога битките се воделе на бојните полиња.

Ден: 25.04.2010 (недела)

Место: Брестов Дол

Програма:
08.00 часот – поаѓање од Скопје
09.00 часот – пристигнување
10.00 -16.00 часот – теоретски и практичен дел
16.30 враќање назад

Семинарот ќе се одржи без разлика на временските услови.

Author koryuPosted on април 12, 2010Categories Почетна

Со многу смеа и позитивна енергија, во духот на Роккон Шоџо, овој
викенд се вежбаше во нашето доџо под водство на големиот нинџутсу
мајстор Свенерик Богсатер. Во неговата изведба и подучување уживаа 40
учесници од Србија (Белград, Нови Сад и Ниш), Црна Гора (Будва) и
Македонија (Скопје и Кавадарци).

Првиот ден, тренингот започна со
Тачи (боев меч), а потоа се премина кон вежбање на техники од Таиџутсу.
Беше импресивна неговата изведба на техниките од Кихон Хаппо кои успеа
да ги поврзе сите осум во една единствена ката. Потоа следеа техники со
кунаи, старојапонско оружје, кое кога се наоѓа во рацете на Свенерик
делува како да е продолжение на неговата дланка.

Вториот ден се
вежбаа техники кои одсекогаш биле омилени во нашето доџо. Одбрана од
нож. И тука, учесниците на семинарот имаа можност да се уверат во
квалитетот на сенсеи Свенерик.
Потоа преминавме на техники со ханбо, во кои исто така подеднакво уживавме.
Уште еднаш им се заблагодаруваме за учеството на нашите пријатели кои дојдоа од своите земји да учат заедно со нас.
Голема
благодарност за учениците на Буџинкан Македонија за подршката и помошта
при организирањето на овој семинар. Како и секогаш, бевте неверојатни
во секој поглед.
На крајот, благодарност до сенсеи Свенерик, за
честа и довербата што ни ја даде и што повторно го сподели со нас
своето знаење и искуство, а најмногу за усното предавање (куден) кое
нема никогаш да го заборавам, особено во моментите додека седевме на
падините на планината Водно во дворот на манастирот Свети Пантелејмон.

Поздрав до следниот семинар.

Author koryuPosted on април 6, 2010Categories Почетна

  

Најдоброто од светот на Буџинкан повторно во Македонија:

Таи Каи 2010 со еден од најреномираните нинџа мајстори на денешницата – Свенерик Богсатер.
Тема: Роккон Шоџо, Тачи, Ханбо и Кунаи
Нема потреба многу да се зборува за него.
Сите што знаат што е тоа Буџинкан, знаат и за сенсеи Свенерик.
Ве
покануваме да земете учество и да научите нешто повеќе за една од
најстарите боречки вештини во Јапонија. Семинарот е отворен за сите без
разлика на нивото на знаење. Ова е шанса да дознаете нешто повеќе за
оваа вештина која била мистерија дури и за самите Јапонци.

Датум: 10 -11 април, 2010 година

Распоред:

       Сабота                                                          Недела
10.00 до 13.00 тренинг                  10.00 до 13.00 тренинг
13.00 до 15.00 пауза за ручек        13.00 до 15.00 пауза за ручек
15.00 до 18.00 тренинг                  15.00 до 18.00 тренинг

Опрема: Бокен (Тачи), Ханбо, Кунаи (само дрвени оружја се дозволени)
Цена: 50 евра семинарска такса до 25.03.2010, потоа 60 евра

Доколку имате прашања не се воздржувајте да не контактирате.

Author koryuPosted on март 30, 2010Categories Почетна

Во периодот од 19 до 28
март, инструкторот на Буџинкан Македонија, Игор Довезенски, беше во посета и
тренинг кај својот учител по Даито рју Аикиџуџутсу и Оно ха Итто рју Кенџутсу
(Такеда ден), сенсеи Антонино Черта.

Инаку, сенсеи Черта, е
единствениот гаиџин (не-јапонец) кој во историјата на овие две самурајски
класични школи ја добил титулата шихан (највисоко признание во вештините). Тој
бил ученик на 36-тиот соке Токимуне Такеда, а подоцна и на Шигемитсу Като, наследникот
на Хомбу доџото на семејството Такеда-Даитокан во градот Абашири. Сенсеи
Антонино Черта е претседател и главен инструктор на Европската Даито рју
Аикибудо организација, како и единствен претставник на (јапонската) Нихон Даито
рју Аикибудо организација и учител задолжен за клубовите надвор од Јапонија.

Интензивниот тренинг
(кој се одржува еднаш годишно) во хомбу доџо-то на европската Даито рју
Аикибудо организација, инаку сместено во Зерболо (меѓу Павија и Виџевано), е
многу ригорозен и напорен. Тренингот започнува во 07.00 наутро, а завршува во
19.30 навечер (со паузи за доручек и ручек). За време на вежбањето, кое се
одвива постојано под водство на шиханот Черта, техниките и катите се учат
детаљно, на ист начин како што се вежбало во доџото Даитокан. Се работи во мала
група од одбрани ученици, кои за да присуствуваат на интензивниот тренинг треба
да имаат најмалку 2 дан во некоја јапонска боречка вештина или, пак, да се
членови на организацијата. Модриците, раните и болката се постојано присутни за
време на тренингот, а животот во доџо-то се одвива постојано на татамите (тука
се спие и се вежба).

Постарите ученици на инструкторот
Игор Довезенски, веќе одамна се запознаени со неговата дамнешна желба да ја
изучува вештината Даито Рју Аикиџуџутсу. Таа желба, конечно му се исполни со
тоа што е прифатен за личен ученик на шиханот Антонино Черта и што стана претставник
(секција) на неговата организација во Македонија.

Со тоа, во нашата држава
(како и на територијата на Балканот и на Југоисточна Европа), за прв пат се
отвора можност за изучување на прекрасниот свет на Даито рју Аикиџуџутсу и Оно
ха Итто рју Кенџутсу, две класични јапонски самурајски школи. За почеток, во
нашата секција ќе можат да вежбаат само членовите на Школото за борбени вештини
Пат кон Сонцето-Буџинкан Македонија, а за во иднина е предвидено отворање на
школата за целата заинтересирана јавност.

Името на нашата секција
за Даито рју Аикибудо е: Даито Македонија Корју Доџо, според желбата на нашиот
учител Антонино Черта.  

Отворањето на секцијата
за Даито рју, воопшто не значи намалување на активностите во делот на Буџинкан
школите, туку напротив, тие биле секогаш, а и во иднина остануваат императив на
инструкторот Игор Довезенски. Изучувањето на Даито рју Аикиџуџутсу и Оно ха
Итто рју Кенџутсу, само ќе допринесе за уште подобро разбирање на јапонските
класични боречки вештини, кои се голема страст на сите членови на Школото за
борбени вештини Пат кон Сонцето-Буџинкан Македонија.

Author koryuPosted on март 14, 2010Categories Почетна

Позитивна атмосфера, преполна сала, одлично дружење и напорна работа го окарактеризираа семинарот што викендов се одржа во Кавадарци, под водство на инструкторот на Буџинкан Македонија, Игор Довезенски, а во организација на Благој Таневски.

Првиот ден се вежбаа основните удари со раце и нозе, блоковите, како и катите од нивото Кураи Дори, на класичната јапонска борбена школа Кото Рју Коппоџутсу. Вториот ден беше резервиран за школата Гјокко Рју Кошиџутсу, каде што покрај основите, инструкторот Довезенски детаљно ги објасни и ги подучуваше катите од Ки Гата-та.

На семинарот учествуваа над 50 учесници, респектабилна бројка за Буџинкан. Половината од нив беа дојдени од Скопје, додека останатите беа од второто нинџутсу доџо во Македонија односно Буџинкан Кавадарци. Големата заинтересираност за семинарот, само говори за квалитетот и нивото на подучувањето на инструкторот Довезенски.

Домаќинот Благој Таневски, водачот на Буџинкан Кавадарци, се покажа како одличен организатор. Целиот семинар помина беспрекорно, благодарение на неговата заложба да им угоди на гостите да се чуствуваат убаво. Во саботата, околу полноќ, сите учесници на семинарот беа на забава во дискотеката К7, каде што се журкаа до раните утрински часови, но тоа не ја намали концентрацијата на тренингот во текот на следниот ден. Беше прекрасно да се гледа како учениците од двата клуба меѓусебно се дружат.

По завршувањето на саботниот тренинг, инструкторот Довезенски, одржа џуџутсу тренинг за борба на земја специјално за најдобриот UFC борец во Македонија (до 73 кг), Оливер Петровски. Станува збор за неверојатно талентиран натпреварувач, пред кого лежи одлична иднина. За време на тренингот, Оливер уживаше во техниките кои му беа покажувани и за многу кратко време ги совладуваше истите. Скромен и вреден, едвај чекаше да ја испроба следната техника, при што во тоа му помагаа учениците на Буџинкан Македонија, Марјан Прошев и Зоран Тодоровски. На крајот беше договорена и понатамошна соработка, се со цел да се овозможи подобар тренинг на овој наш претставник во UFC. Воедно ги повикуваме сите луѓе кои што можат финансиски да го помогнат Оливер да се јават на телефонскиот број на Благој Таневски.

Што повеќе да се каже. Ваквите настани, ваквите дружења остануваат засекогаш запаметени. Со нетрпение го очекуваме следнотот дружење со нашите пријатели од Кавадарци.

Author koryuPosted on февруари 22, 2010Categories Почетна

На покана од нашиот пријател од Нови Сад, Срѓан Црногорац, викендов што помина учествуваме на семинар со мајсторот Кацем Зугари од Франција. Тема на семинарот беше Кото Рју Коппоџутсу и Џо Џутсу, но се работеа и техники од школата Гјокко Рју Кошиџутсу. Покрај инструкторот на Буџинкан Македонија, Игор Довезенски, на семинарот учествуваше и неговиот учи деши Марјан Прошев, како и нашите пријатели од клубот Буџинкан Кавадарци.
Како и секогаш на семинарите со Кацем, импресиите се на високо ниво, баш како и начинот на кој тој ги презентира школите на Буџинкан.

Author koryuPosted on февруари 12, 2010Categories Почетна

Во
организација на Благој Таневски, водач на доџо-то Буџинкан Кавадарци,
на 13 и 14 март, 2010 година, инструкторот на Буџинкан Македонија Игор
Довезенски ќе одржи дводневен семинар.

Сите заинтересирани ќе
имат можност да се запознат со основите на класичните јапонски школи за
борбени вештини Кото Рју и Гјокко Рју.

Цената на семинарот
изнесува 450 денари. Повеќе информации на нашиот е-маил или на
телефонскиот број на организаторот: 070 545 131.  

Author koryuPosted on јануари 27, 2010Categories Почетна

Во денешниот број на најчитаниот македонски неделен магазин, „Теа модерна“, излезе статија посветена на девојките од нашето доџо Буџинкан Македонија.

Како што знаете „Теа модерна“ е магазин посветен на културата, уметноста и модата и има тираж од над 100.000 продадени примероци неделно. Тоа значи дека за Буџинкан Доџо оваа недела ќе прочитаат најмалку 500.000 илјади Македонци, што е речиси една четвртина од населението во нашата земја.

Инструкторот на Буџинкан Македонија, Игор Довезенски, преку своето доџо веќе 15 години го „шири“ гласот на организацијата предводена од соке Масааки Хатсуми и досега се има појавувано во многу пишани и електронски медиуми, каде што секогаш предизвикувал голем интерес за јапонските класични борбени вештини.

Author koryuPosted on јануари 24, 2010Categories Почетна

Во Хомбу доџо-то на Буџинкан Македонија, под водство на инструкторот Игор Довезенски, викендов се одржа семинар на тема Гокуи Не Ваза (Тајните на борба на земја).
На семинарот присутвуваа 21 учесник, кои два дена обработуваа техники на голорака борба во седечка и лежечка положба.

Семинарот започна со мини предавање за историјата на техниките на Не Ваза, за веднаш потоа да продолжи со изведување на различни Таисо вежби, по што се пристапи кон изучување на Атеми Кју Шо, Укеми Таихенџутсу и Камае.
Втората сесија од првиот ден беше посветена на техниките на задржување и контролирање на противникот Осае Ваза.

За време на првата сесија на вториот ден, учениците имаа можност да научат шест техники на „заклучување“ на зглобовите на противникот односно Кансетсу Ваза, како и многу варијанти на истите.
Последната сесија на семинарот беше посветена на техниките на давење односно Шиме Ваза. Инструкторот Довезенски демонстрираше и детаљно објасни девет техники од оваа група, но и неколку варијанти на истите.

И покрај големата болка предизвикана од реалниот начин на тренинг, но и од тврдиот паркет во нашето доџо, учениците (речиси сите) успешно го завршија семинарот презадоволни од техниките вежбани во текот на двата дена.

Author koryuPosted on јануари 19, 2010Categories Почетна

 

Нинџутсу Сојузот Буџинкан Македонија

најавува дводневен семинар на тема:

Гокуи Не Ваза (Тајните на борба на земја)

со инструкторот Игор Довезенски 

Како што веќе Ви е познато, во нашето доџо се посветува големо внимание на борбата на земја. Во школите на Буџинкан овие техники постојат во Такаги Јошин Рју, Шинден Фудо Рју и Кукишинден Рју. Многу од катите на Такаги Јошин Рју, завршуваат со техники на давење или лост на земја. Иако не се организирани во кати, во минатото било неопходно секој Буши (воин) да посвети внимание на тренингот на Не Ваза.

 
Ги покануваме сите вљубеници во боречките вештини да присуствуваат на семинарот и да научат повеќе за тајните на борба на земја. Семинарот е отворен за сите – без разлика на нивото на знаење, или, пак, на стилот.
Ова е можност за сите да го зголемат своето знаење за вештината која со векови била мистерија дури и за самите Јапонци.

Време: 23 и 24 јануари, 2010 год.

Распоред:
     
       Сабота                                         Недела

11.00 до 13.00 тренинг               11.00 до 13.00 тренинг
13.00 до 15.00 ручек-одмор        13.00 до 15.00 ручек-одмор
15.00 до 17.00 тренинг               15.00 до 17.00 тренинг

Место: Хомбу доџо Пат кон Сонцето – Скопје – Македонија
Опрема: Ги (горно и долно), појас и танто.