Категорија: Почетна

Категорија news

Одржан семинарот „Нихон но Канкаку“

Author koryuPosted on Categories Почетна

За време на семинарот насловен како „Нихон но Канкаку“, шидоши Игор Довезенски се обиде да пренесе дел од катите што тој ги научи од своите учители за време на неодамнешното усовршување во Јапонија. Покрај тоа, тој си зададе задача да пренесе малку и од личните чувства здобиени во текот на патувањето во Земјата на изгрејсонцето. 

Првиот ден од семинарот, помина во вежбање на техниките од богатото наследство на Такаматсу Тошитсугу, кои денес се дел од организацијата „Буџинкан Доџо“. Учесниците уживаа во тренингот со меч (катана), стап (бо), бодеж (кунаи) и ланец со тегови (кусари фундо). 
Вечерта, пак, беше резервирана за предавање за јапонската култура и традиција, поткрепено со многу фотографии и клипови кои инструкторот на „Пат кон Сонцето“ ги направи во земјата на самураите. 
Вториот ден беше резервиран за Даито рју Аикиџуџутсу, како и за кати од други класични боречки вештини кои Довезенски ги вежбал со познати и реномирани јапонски учители.
Веднаш по семинарот и дел од учесниците се обидоа да пренесат малку од своите чувства:
-Можам да кажам дека ова беше можеби еден од најкомплексните семинари на кој сум присуствувал во Хомбу Доџо и за кој беше потребна и физичка и ментална сила. Беше исполнет со многу техники, со и без оружје, а како бонус ни беше претставена и нова корју школа која сенсеи ја вежбал во Јапонија. Нејзините кати беа како играње танц со противникот, како мирна вода која те носи до водопат од кој ти нема спас. 
Саботата вечер имавме можност да се запознаеме со Јапонија преку слики, видеа и куден. Дефинитивно неверојатна земја која мора да се посети. (Владимир А.)
-Ова ми е втор семинар во Хомбу и морам да кажам дека супер си поминав. Од катите што ги изучувавме имаше по нешто за сечиј вкус. И грубо и нежно и елегантно… а за се останато тука е кунаи-то :))) Многу го сакам ова оружје и ми дојде добро што се потсетив. 
Вечерната презентација многу ми се допадна, иако бев изморена. Сенсеи толку беше внесен во раскажувањето, што успеа сите накратко да не пренесе во Јапонија. Се на се, одличен викенд семинар, 10 out of 10, would do it again 😀 (Благица С.)
-Сосема е различно да имаш тренинг во доџото во Скопје и во Хомбу. За овие два дена имавме околу 12ч тренинг + 4ч интерактивна презентација на патувањето на Сенсеи во Јапонија. Имаше толку многу кати, техники, оружја, паѓања и тркалања што едноставно добиваш чувство дека не би правел ништо освен да вежбаш. И нема друга облека освен кеико ги и нема друго место под Сонцето за тебе освен прекрасната природа таму и не ти треба друго друштво освен клубските другари. Сериозно!
Да се вежба со толку многу семпаи е прекрасно, им благодарам за се што споделуваат со нас помладите. Таму имаш време колку сакаш за повторно и повторно да пробаш, да прашаш некој од постарите. Сенсеи е цело време со нас и за разговор и за тренинг и за шега и смеа 🙂 За тие два дена паѓаш и стануваш над 1000 пати, јадеш ќотек квалитетно (си дојдов со воспаление на целиот рамен дел и грб), ама чувството е неверојатно, се осеќаш прочистен физички, ментално и духовно, ти се отвараат нови апетити за осознавање и разбирање на вештините, ти се зајакнува љубовта и потребата за соживот, се зајакнува телото и духот, имаш огромна благодарност кон животот затоа што едноставно дишеш, движиш, живееш…
Инаку многу ми се допаднаа кунаи и кусари фундо (прв пат ги пробав). Си ги гледаш слабостите, гледаш каде не си обрнал доволно внимание. Камае! Кузуши! Киаи! Новата корју школа ни подотвори поинаков прозорец, раскажувањето за Јапан беше магично, фасцинантно, но за тоа има уште што да се раскажува!!!
Се на се, концептот за двата дена беше одличен, мене лично времето ми помина многу брзо и не ми се враќаше во Скопје. Еден од најсодржајните семинари во најубавото друштво! 🙂 (Сања С.)
-Одличен семинар, одлични техники, одличен помин. Секој тренинг по три саати, исполнет со многу материјал. Имавме можност да видиме како изгледаат и некои други корју школи. Лично јас се соочив со многу нови оружја. Главата најдобро ми знае од стапот што го окркав :))) Ама се вредеше, навистина. Ви благодариме Сенсеи за добрите техники и за убавиот викенд. (Таки Г.) 
  

„Нихон но Канкаку“ семинар

Author koryuPosted on Categories Почетна

По враќањето од Јапонија, шидоши Игор Довезенски ќе одржи семинар на тема „Нихон но Канкаку“ (Чувството од Јапонија).
На семинарот ќе се обработуваат техниките што инструкторот ги изучувал за време на усовршувањето кај своите учители во Земјата на изгрејсонцето.

Покрај техниките од школите на Буџинкан и од Даито рју, инструкторот Довезенски ќе подучува и кати од други кобудо рју-ха кои ги вежбал за време на престојот во Јапонија. 

За време на вечерните часови, ќе бидат презентирани фотографии и снимки кои инструкторот ги направил во разните доџо-а, музеи и храмови, како и при посетата на гробовите на Иизаса Чоисаи Иенао (основачот на Катори Шинто рју) и на Оно Џироемон Тадааки (основачот на Оно ха Итто рју). 

На семинарот се поканети сите, без разлика на звањето или на стилот што го вежбаат.

Ден: 11/12 октомври (2014)

Место: Пат кон Сонцето – Хомбу Доџо

Потребна опрема: кеико ги и хакама (за јуданши), бокуто (катана и вакизаши), бо, ханбо, кусари фундо (од јаже) и кунаи (дрвено). Доколку на некого му недостасува дел од опремата, ќе може да ги користи тие на доџо-то.  

Програма:

-прв тренинг: 10.30-13.30
-втор тренинг 17.30-20.30
-видео презентација и предавање од 21.00

Недела:
-прв тренинг: 09.30-12.30
-втор тренинг 15.30-17.30

Пријавување и информации преку инбокс, телефон или на Форум.

Инструкторот Игор Довезенски на усовршување во Јапонија

Author koryuPosted on Categories Почетна

Во периодот од 11 до 28 септември, инструкторот Игор Довезенски престојуваше во Јапонија со цел уште повеќе да го надогради знаењето, учејќи директно од своите јапонски учители, како и од нивните најдобри шихани. 

За време на престојот, шидоши Довезенски вежбаше секојдневно по 8 часа, патувајќи во различни градови и посетувајќи различни доџо-а.
Најголем дел од своето време, инструкторот го помина во доџо-то Шимбукан, на легендарниот учител Рисуке Отаке.
Инаку, сенсеи Отаке е единствениот мајстор за традиционални боречки вештини во Јапонија кој од државата е прогласен за „живо национално богатство“. Неговото доџо Шимбукан е седиштето каде што се изучува најстаратата документирана јапонска боречка школа – Теншин Шоден Катори Шинто рју Буџутсу. Лично од сенсеи Рисуке Отаке, Довезенски беше подучуван на кенџутсу катите од нивото Омоте. Истовремено и најстарите членови на Шимбукан му пренесоа дел од своето големо знаење, преку корегирање на веќе научените техники. 
Игор Довезенски е првиот Македонец што вежбал во доџо-то Шимбукан и кој бил подучуван лично од учителот Рисуке Отаке.
За време на усовршувањето во земјата на изгрејсонцето, водачот на Пат кон Сонцето вежбаше и во Хомбу Доџо-то на Масааки Хатсуми, последниот жив нинџа мајстор и наследник на девет традиционални јапонски борбени школи. Истовремено, тој посетуваше и приватни часови кај неколку јапонски шихани, од кои имаше можност подетално да научи за некои аспекти и принципи на школите кои што се изучуваат во организацијата Буџинкан.
За време на еден од часовите во Хомбу, соке Масааки Хатсуми лично му додели хачидан (8 дан) на инструкторот Игор Довезенски, при тоа изразувајќи го задоволството од досегашната работа на македонскиот инструктор во ширењето на вештините на неговата организација. При тоа, соке Хатсуми се интересираше за Македонија, како и за моменталната ситуацијата што владее во неа.
Игор Довезенски е првиот Македонец од Република Македонија што вежбал во Хомбу Доџо-то на Буџинкан и засега останува единствениот претставник на организацијата за нашата земја, признаен лично од поглаварот Масааки Хатсуми. 
Покрај посетата на многубројните музеи и доџо-а, со цел уште подлабоко да навлезе во сржта на јапонските традиционални боречки вештини, вреди да се споменат и тренинзите за Даито рју Аикиџуџутсу, кои инструкторот Довезенски ги имаше со сенсеи Јонеда во градот Кавасаки. 
Инаку, овој учител за Даито рју е личен пријател на сенсеи Антонино Черта, со кого пред многу години заедно ја изучувале оваа вештина кај последниот наследник Токимуне Такеда. Искуството здобиено на овие тренинзи е од непроценлива вредноста за натамошното усовршување на вештината од страна на Довезенски. 
За да се опишат чувствата и за да се пренесат искуствата здобиени при престојот и тренинзите во Јапонија, би биле потребни илјадници страници, па затоа овој извештај ќе го завршиме со упатување на благодарност од страна на инструкторот Довезенски кон своите учители, ученици и пријатели за постојаната подршка за неговата работа во областа на боречките вештини. 

Уписи во Буџинкан Македонија и почеток на второто полугодие

Author koryuPosted on Categories Почетна

Иако Доџо-то за класични јапонски самурајски и нинџа вештини „Буџинкан Македонија“, врши уписи во текот на целата година, сепак месецот септември е најповолен момент за да отворите една нова страница од Вашата животна историја.

Ги известуваме сите заинтересирани дека првиот час за почетниците ќе се одржи на 2 септември, со почеток во 20:30 часот, додека напредната група продолжува со својата работа еден ден порано (во 20:00 часот). 

За тие што се уште не се запознаени со нашата работа, доџо-то е основано на 02 јули, 1995 година и засега тоа е единственото доџо во нашата држава признаено од страна на поглаварот на Буџинкан, соке Масааки Хатсуми.

Буџинкан Македонија важи за еден од најдинамичните клубови во Европа со многубројно и активно членство и со најмногу активности организирани во текот на целата година. 

Во рамките на доџо-то постојат повеќе секции за возрасни (од 13 до 113 години), но и за деца (од 5 до 12 години). 

Повеќе информации за нас можете да добиете на следниот линк http://hombu.koryu.mk/article/show/448

За инструкторот на Буџинкан Македонија http://hombu.koryu.mk/article/show/461

За термините и за локацијата http://hombu.koryu.mk/article/show/454

Ве молиме доколку имате прашања, не стеснувајте се да не контактирате преку daito_macedonia@yahoo.com или на 077 976 906.

Заврши шестиот по ред Летен Нинџа Камп

Author koryuPosted on Categories Почетна

Најголемиот годишен традиционален настан, познат под името „Летен Нинџа Камп“, на кој членовите на Буџинкан Македонија цели девет дена постојано вежбаат и изучуваат традиционални јапонски боречки вештини – заврши. 

Еден ден по заминувањето на учениците и спласнувањето на емоциите, слободно можеме да кажеме дека овој камп беше еден од најинтензивните и најуспешните досега. 
Учесниците на кампот, имаа можност да уживаат во вежбањето на џуџутсу техники за ослободување од разни зафати на телото, како и во усовршувањето на борбата со катана и вакизаши. 
Што се однесува до тренингот за зајакнување на телото, оваа година вежбите беа навистина напорни, со што кондицијата кај учениците уште повеќе се зголеми. 
Слободното време, кое што едвај го имаше, беше искористено за капење или тренинзи во блиската река, како и за посета на разни културно-историски споменици кои ги има во околината на Хомбу Доџо-то на Организацијата „Пат кон Сонцето“. 
Ноќните часови беа предвидени за ноќните нинџа акции, нешто по што исто така нашето доџо е надалеку познато. 
Како и секогаш, храната беше органска и здрава, прилагодена да обезбеди доволно калории и хранливи материи потребни за напорните тренинзи, а за тоа секогаш беа користени локални и свежи продукти набрани директно од градината околу нашето доџо.
Последната вечер, иако секогаш е резервирана за забава околу огнот, како и секоја година беше помалку и тажна поради разделбата на членовите која што ќе трае до почетокот на септември, за кога е закажан првиот час во доџо-то во Скопје.   

Летен Нинџа Камп VI

Author koryuPosted on Categories Почетна

Одбројувањето започна. За пет дена стартува шестиот по ред Летен Нинџа Камп во организација на доџото за класични јапонски борбени вештини – Буџинкан Македонија. 

Како и секоја година, кампот ќе се одржи во периодот од 4-ти до 12-ти август, во хомбу доџо-то на организацијата Пат кон Сонцето, а сместено во долината под планината Липац. 

Додека некои наши членови го користат август како единствен месец за одмор од напорните тренинзи, други му дават приоритет на Летниот Нинџа Камп на Буџинкан Македонија. Така, тренинзите продолжуваат со уште посилно темпо, „засилени“ со неверојатно добра забава и дружење.  

Настанот е отворен за сите, без разлика на стилот или степенот во одредена боречка вештина. Ова е шанса одблизу да се запознаете со нашата работа и да се дружите со членовите на Буџинкан Македонија. 

Остануваат уште неколку дена за пријавување.

Повеќе информации тука: http://hombu.koryu.mk/article/show/468



Одржан семинарот „Живот во Дивината“

Author koryuPosted on Categories Почетна

Со одржувањето на настанот „Живот во Дивината“, започна испишувањето на новата страница на историјата на Буџинкан Македонија, а која се однесува на семинарите во природа. 

Како што и претходно беше најавено, предвидено е овој настан да се одржува во текот на следните седум години, при што членовите на доџо-то ќе можат да научат како да се живее во заедница и во хармонија со природата, а според сценариото за некаква природна катастрофа или ситуација која бара од нас да се повлечеме далеку од цивилизацијата односно во дивината. 
Секоја година, семинарот ќе се одржува на различна локација која ќе овозможи учење на техники за живот во дивината во различни услови. Така, оваа година настанот се одржа во услови кои овозможуваат да се осети суровоста, но и благодетите кои ги нуди планината, додека следната година веќе е договорено да се изучуваат техниките на живеење во група – покрај река.
Но да се вратиме на семинарот што се одржа викендов. 
Уште во раните утрински часови, по пристигнувањето на локацијата во близина на врвот на планината Липац, учесниците на семинарот почнаа со изградба на камп. Инструкторот Игор Довезенски веднаш почна со предавање на техниките за преживување на поголема група луѓе, како и на организирање живот во дивината на подолг временски период.
Инаку, за тие што не знаат, шидоши Довезенски досега има одржано над 300 семинари во природа, така што неговото искуство на ова поле е навистина големо. Техниките на преживување во природа во најголем дел ги има научено од својот дедо, кој бил учесник во втората светска војна и одликуван со повеќе заслуги, меѓу кои и за ослободување на градот Скопје. За време на војната и после неа, тој бил извидник во тенковска единица и техниките на преживување во природа му помогнале да преживее во многу опасни ситуации. 
Во текот на саботата, шидоши Довезенски успешно ги предаде сите техники предвидени за првиот ден од семинарот и се течеше според планот, но во текот на ноќтта, точно во 03:50 часот, се случи природна непогода која како да сакаше да ја провери ефикасноста на техниките што се изучуваа во текот на денот. 
Речиси наеднаш, облаците ги прекрија ѕвездите и од сите страни на планината започнаа да удираат громови, а молњите стравично блескаа наоколу. Започна да врне пороен дожд, засилен со силен ветер, кој мократа облека уште повеќе ја лепеше врз телата на учесниците и им ја спушташе температурата на телото. Во такви услови, кога беше јасно дека кампот нема никакви шанси да го издржи овој налет, инструкторот Довезенски нареди итна евакуација од местото и барање на ново засолниште кое ќе овозможи подобра заштита. Веднаш се започна со спуштање во пониските делови на планината. Поради густата темнина и непроодниот терен, членовите на Буџинкан Македонија тешко се пробиваа низ густата вегетација, но по педесет минути, успејава да пронајдат стара руина од 18 век, која имаше зачувано еден дел од тремот што овозможи заштита од дождот. 
По пристигнувањето, инструкторот Довезенски кажа дека од овој момент почнува „војничка дисциплина“ која е непоходна за да можат сите здрави да си заминат дома. Потоа, нареди сите членови да ја соблечат мократа облека од себе, за веднаш потоа да се запали оган за затоплување и сушење на облеката. И покрај големата влажност, искуството на инструкторот се покажа како непроценливо бидејќи оганот беше брзо запален, а со тоа беше овозможено и загревање на телата. По неколку часа, веќе и облеката беше засушена, така што во текот на вториот ден, семинарот продолжи според предвидената програма. 

Ви пренесуваме мали делови од импресиите на учесниците, кои во целост ги објавија на нашиот Форум:

Зоран Тодоровски – Наеднаш ме разбуди една голема капка дожд која ме погоди во капакот на окото. Како да сакаше да предупреди дека оваа ноќ нема да биде обична како и секоја друга. Го свртев погледот околу себе, насекаде молњи и татнежи. Во тие моменти само на кратко ми се сретна погледот со Сенсеи Довезенски. Тој веќе беше буден. Од очите си прочитавме само едно нешто. Дека мораме веднаш да го напуштиме местото. 

-Станувај, облекувај чизми и земете го со вас само неопходното, си одиме одовде! Ајде, ајде, СТАНУВАЈ, викаше сенсеи.
Беше 03:50 часот. Во истиот момент почна дожд и ветер со невиден интензитет. Почна да беснее жестока бура. Формиравме колона, светнаа неколку батерии и тргнавме да бараме засолниште. Се нурнавме во темнината. Бевме сите одлучни да го сториме тоа. Напред беше Сенсеи.Тргнавме. Осуммина луѓе се најдоа токму во центарот на невремето, а молњите и громовите како да го стегаа обрачот околу нас и маваа се поблиску и поблиску! Како некое чудовиште да ни се приближуваше, рикајќи на нас.
Марко Опачиќ – Ова беше семинар на кој на виделина излезе целиот труд што Сенсеи го вложуваше во нас во текот на изминативе години, особено на „преживувањата“ (зимски и летни). Дојде моментот кога сите тие показни вежби и техники требаше да ги искористиме сега, за да преживееме. Се разбира, сето тоа беше успешно изведено. Не се ни сомневав дека утрото кога не зафати невреме ќе најдеме некакво засолниште. Имав потполна доверба во Сенсеи каде не носи и прашање на време беше кога ќе стасаме на сигурно.
Научиме дека Учител не подразбира само покажување техника во доџо, туку многу повеќе. Учител е тој што секогаш гледа прво за вас, тој што со сигурност ќе ве води низ цело патешествие и кој ниту една секунда нема да се посомнева во тоа што го прави. Тој што ќе ви посочи каде грешите и каде треба да се подобрите. Тој што има големо познавање од многу области и кој несебично го пренесува на учениците. Тој што не смее да покаже никаква слабост и емоција пред нив, а полн е со чувства за секој од нас.
Таки Гаковски – Прв пат чував стража. Првите 30 минути ми беа исполнети со страв, мислејќи дека во секој момент може да ме нападне нешто. Но потоа се навикнав и веќе се беше друго. Последните половина час, бев под голем замор, па почнав дури и да халуцинирам.
Небото кое беше полно со ѕвезди за кратко се прекри со многу облаци. Само што си легнав, за кратко време ме разбудија и тука започна ново доживување. Започна евакуација, а со тоа и вистинското преживување. Брзо се одалечивме од местото каде престојувавме и почнавме да трагаме по некоја напуштена куќа. Паѓаше силен дожд, придружуван со молњи и громови. Тие беа нашите непријатели од кои бегавме за да си ги спасиме животите. После долгото пешачење низ калта, најдовме засолниште.
Владимир Антовски – Прекрасен семинар исполнет со прекрасни лекции и прекрасни луѓе. Додека го пишувам ова, ми се враќаат слики од предходните два дена и сеуште не ми се верува за колку кратко време, колку многу работи ни се случија и колку многу проживеавме. 
Ноќта беше толку мистична и полна со изненадувања. Ни се случи брза евакуација бидејќи бевме соочени со големо невреме, проследено со грмотевици. Во тие мигови од нас извираше се што е скриено длабоко и не соочи со вистината за тоа какви луѓе сме. 
Велат, несреќата ги зближува луѓето. Тоа е точно, а истовремено и многу жално. Среќен сум што во Буџинкан Македонија, ние сме зближени и пред и после несреќата.
Додека голи, по гаќи, ги сушевме алиштата, се смеевме на ситуацијата и знаевме дека сите заедно сме многу посилни и дека може да поминеме преку се.
Сања Симонова – По преспиениот ден, можам да заклучам дека „Живот во Дивината“ беше едно исклучително важно искуство, полно со лекции кои ќе останат вградени засекогаш во мене. Се што Сенсеи ни покажа беше многу корисно и јасно расчленето до детали. Пред се мислам на опремата што треба да се понесе во вакви околности, начинот на кој што се прави логор и колку е важна одлучноста кога ќе се случи нешто непредвидено.
Се што разговаравме и правевме во текот на првиот ден, поради невремето, практично го применивме во текот на вториот. Има ли поголемо школо од тоа кога ќе ти се случи нешто, кога најмалку очекуваш? Кога мора да се соочиш самиот со себе и нема бегање од тоа, освен да преживееш?
Голем дел од тоа што Сенсеи не подучуваше го гледав со изненадување и воодушевување. 
Луѓето кои те опкружуваат на семинарот се твое семејство и секој за секого се би направил. Кој и да те замоли за било што, чест е да му помогнеш, колку и да си ментално или физички на работ. 
Довербата што ја имаме во Учителот е бескрајна и се надевам дека ќе можеме да му возвратиме со барем половина од тоа што тој за нас го прави. Никогаш нема да заборавам на наредбата „ЛИНИЈА“ кога стапнавме во таа стара куќа и како се организиравме потоа…
Ви благодарам на сите за се. Уште сега знам дека ќе го чекам со нетрпение следниот „Живот во Дивината“, а ќе се потрудам до тогаш да не пропуштам ниту еден семинар во природа.

„Живот во Дивината“ - дводневен семинар во природа

Author koryuPosted on Categories Почетна

После седум години непрекинато одржување на легендарниот семинар „Преживување во Природа“, инструкторот на Буџинкан Македонија, Игор Довезенски, го создава новиот проект наречен „Живот во Дивината“. 

Со овој нов семинар, водачот на Организацијата за изучување на јапонски класични борбени вештини – „Пат кон Сонцето“, не се труди да најде соодветна замена за претходниот, туку да отвори едно ново поглавје во историјата на доџо-то, кое се надева, дека како и претходното, ќе трае барем во следните седум години. 

Дводневниот семинар насловен како „Живот во
Дивината“, претставува настан на кој членовите на Организацијата ќе учат техники
на живеење во заедница во дивина односно далеку од цизилизацијата. Потенцираме „техники на живеење“, а не на преживување, бидејќи второво значи постојано
движење се до напуштање на состојбата на опасност.

„Живот во Дивината“ ќе се раководи според сценарио
на природна катастрофа или друга несреќа која бара повлекување на некое
непристапно место и организирање живот на подолго време за одредена група на
луѓе. Со совладувањето на тие вештини, членовите на доџо-то ќе бидат способни да
го згрижат своето семејство и да му обезбедат основни услови за живеење во
дивина во случај на опасност. 

За време на семинарот, дружењето на членовите ќе
им овозможи подобро запознавање и проширување на пријателството меѓу нив.

Бидете дел од новата историја која ќе почне да се пишува на 26/27 јули, 2014 година. Не пропуштајте ја можноста да ги научите техниките на живеење во природа, кои во случај на природна катастрофа или друга незгода ќе ви бидат и повеќе од потребни. 

На семинарот можат да учествуваат сите членови на доџо-то Буџинкан Македонија / Пат кон Сонцето, без разлика на нивното звање.

Потребна опрема: се што може да послужи за преживување во природа и што ќе го собере во вашиот ранец.

Ден: 26/27 јули (2014)

Место: во околината на Липац

Програма:

сабота 07.00 часот – тргнување од Скопје

недела 18.00 часот – враќање назад

Пријавување и информации преку инбокс, телефон или на Форум.

п.с. Престојувањето во природа носи одредени опасности. Сите учесници доаѓаат на сопствен ризик. Направете ги потребните лекарски испитување пред да се пријавите за учеството.

Одржано јунското полагање во Буџинкан Македонија

Author koryuPosted on Categories Почетна

На вчерашното полагање за ученички степени што се одржа во доџо-то на Буџинкан Македонија во Скопје, вкупно 15 ученици успешно го поминаа тестот. 

За 10 кју положија Јован Г., Јане Н., Мартин П. и Филип Т., додека за девети: Кристијан А., Мартин Г., Софија Д. и Даниела Г. 
Учениците Таки Г. и Кристијан М. успешно го поминаа тестот за осми, а Ристо Ч. и Сања С. за седми кју.
За шести кју положи Михаил Д., а за пети Владимир А. 
Буџинкан Македонија доби и нов семпаи, а тоа е Тодор А. кој успешно го помина тестот за втори кју. 
На сите членови кои се здобија со повисок степен им честитаме на нивната упорност и им посакуваме уште поголеми успеси во иднина.

Излезе од печат првата книга во Македонија за класични јапонски боречки вештини

Author koryuPosted on Categories Почетна

Во просториите на скопската винарија „Картал“, вчера се одржа промоција на првата книга во Македонија посветена на класичните јапонски боречки вештини. На настанот присуствуваа речиси сите сегашни, но и многу поранешни членови на Буџинкан Македонија односно на Организацијата за изучување на традиционални јапонски борбени школи – Пат кон Сонцето. 

Автор на книгата „Разговор со учениците“ е шидоши Игор Довезенски, кој досега се има потпишано на неколку книги и документарни филмови од областа на етнологијата, но ова е прв проект кој се однесува на старите јапонски борбени школи.

Промотор на „Разговор со учениците“ беше Александар Вучковски, долгогодишен член на Буџинкан Македонија и другар од детството на Довезенски, кој се наврати на почетоците на Пат кон Сонцето, но и даде кратко објаснување за содржината на книгата.

За време на настанот, атмосферата беше фантастична, а собата за дегустации на винаријата, претесна за да ги прими сите заинтересирани. Некои од учениците на шидоши Довезенски побараа од него да продолжи со пишување книги со слична тематика и во иднина. 


„Ова е прва книга посветена на класичните јапонски боречки вештини во Македонија. Во народната универзитетска библиотека Свети Климент Охридски досега имаше само категоризација за БУДО (модерни јапонски боречки вештини), но сега специјално за нас се направи нова подкатегоризација за БУЏУТСУ. Со ова, се испиша уште една страница во македонската историја и се отвори патот и за некои други автори. Пред повеќе од дваесет години, јас ги донесов класичните боречки вештини во Македонија, но сега сум пресреќен кога гледам дека многу од моите ученици се подготвени да ја продолжат традицијата понатаму и да ги пренесат на следните генерации“, истакна Довезенски на промоцијата.

По повод издавањето на книгата, многу пријатели на нашето доџо од земјите ширум светот упатија честитки до авторот, а некои од нив побараа истата да биде преведена и на англиски јазик.