Буџинкан Македонија

Author koryuPosted on ноември 5, 2013Categories Почетна

Единствениот нејапонски шихан за Даито рју Аикиџуџутсу, Антонино Черта, викендов што измина одржа семинар за учениците на Даито рју Македонија – Корју Доџо.

Настанот беше подржан од страна на Организацијата за изучување на јапонски борбени вештини „Пат кон Сонцето, а на него учествуваа вкупно девет нејзини членови.

Како и секогаш, сенсеи Черта несебично се трудеше да го пренесе своето знаење навлегувајќи во најситните детаљи од катите на Никкаџо. Учесниците цело време вежбаа напорно и не се штедее ниту за миг.

За време на семинарот, шиханот Черта и официјално ја додели дипломата за шодан и лиценцата за шибу чо на неговиот претставник за Македонија, Игор Довезенски.

На крајот, сакаме да изразиме голема благодарност до нашиот учител Антонино Черта и да му посакаме одлично здравје. Следната година се гледаме повторно во Македонија.

Author koryuPosted on октомври 28, 2013Categories Почетна

Вкупно 11 учеснички, од кои девет членови на Буџинкан Македонија и две гостинки, викендов ги совладуваа техниките на самоодбрана во Хомбу Доџо-то на организацијата Пат кон Сонцето.  

Во текот на саботата, се одржаа два тренинга. Првиот беше посветен на ослободување од зафати за раце и тело, додека на вториот се разработуваа техники на самоодбрана додека жртвата седи на стол.

Во неделата, се изучуваа борбени техники на земја, како и начини на справување со напад кога напаѓачот ќе ја притисне жртвата до ѕид.

За време на целиот настан, во доџо-то владееше неверојатно позитивна атмосфера, а насмевката ниту за миг не се симна од убавите лица. Иако на техниките им се пристапи со огромно внимание, сепак хуморот постојано се провлекуваше и дополнително ги мотивираше учесничките.

Слободното време, дамите го искористија за шетање низ убававата природа што се наоѓа околу доџо-то на Пат кон Сонцето, а инструкторот Довезенски се трудеше да им го направи секој миг посебен.

На крајот беше договорено од 2014-та да има два настани годишно кои ќе бидат посветени исклучиво на припадничките на понежниот пол.

Author koryuPosted on октомври 1, 2013Categories Почетна

На почетокот на 2008 година, Организацијата заизучување а јапонски борбени вештини Пат кон Сонцето, за прв пат во Македонија организираше работилница за самоодбрана за жени. Оттогаш, па наваму, многу клубови се обидоа да организираат некакви слични настани, меѓутоа квалитетот и посетеноста што ги постигнавме останаа недостижни.

Оваа година, на 26/27 октомври, ќе ја одржиме петтата по ред Работилница, со наслов: „Жените против насилството“.

Иако настанот се организира првенствено за нашите членки, добредојдени се сите припаднички на понежниот пол, без разлика на годините и на нивото на знаење.

Потребна опрема: тренерки и маица (без патенти и копчиња). Се вежба на душеци (боси). За сите учеснички обезбедено е бесплатно спиење во доџо-то.

Датум на одржување: 26/27 октомври, 2013

Место: Пат кон Сонцето – Хомбу Доџо

Дополнителни информации: 077 976 906 или на е-маил: daito_macedonia@yahoo.com

Author koryuPosted on септември 30, 2013Categories Почетна

Педесет и осум километри за 12 часа, изодеа учесниците на семинарот Патот на Шугенџа, што се одржа во текот на вчерашниот ден.
 
На
„Последното Патување“, се пријавија 13 членови на Буџинкан Македонија и
двајца гости од страна. За жал, на половина пат од предвидената рута,
едниот од нив поради појава на здраствени проблеми, предизвикани од
големиот напор, мораше да се откаже.  
Семинарот започна во
08.00 часот, кога по кратки подготовки, групата се упати кон падините на
Липац. По едночасовно искачување, се пристигна во Бељаковскиот
Манастир, а потоа учесниците се упатија во правец на југ, кон Пезово. На
половина пат до селото,  кај еден од учесниците на семинарот, почнаа да
се јавуваат здраствени проблеми, по што шидоши Довезенски мораше да го
забави темпото на движење. Со свртување кон југоисток, групата се упати
кон селото Татомир, каде што изнемоштениот беше испратен со автомобил во
Скопје. Поради непланираниот застој, дојде до мала измена на првичниот план, па наместо крајната точка да биде Скала, групата направи кружен лак кон север движејќи покрај западниот дел на Секулица. Со постепено намалување
на надморската висина, учесниците се спуштија кон коритото на Крива
река во селото Шопско Рударе. Движејќи се кон запад, преку Коњух, тие
навлегоа во селото Бељаковце. Пет километри пред стартната точка, во
чест на Последното Патување, членовите на Буџинкан Македонија направија
педесет склекови со полна опрема на себе, а потоа ги изодеа и последните
километри. По пристигнувањето на почетната точка од рутата, шидоши
Довезенски овој седумгодишен подвиг го прогласи за затворен.

Пресметките
направени со помош на воените карти и со помош на сателитската
навигација, покажаа дека за точно 12 часа, се изминаа 58 километри по
ридско-планински и тешко прооден терен

Author koryuPosted on септември 11, 2013Categories Почетна

Воините од доџо-то за традиционални јапонски боречки вештини, Буџинкан
Македонија, оваа година за последен пат ќе појдат на духовното патување наречено „Патот
на Шугенџа“.

После седум години од првиот марш, шидоши Игор Довезенски одлучи дека е време и овој настан да замине во „историјата“ и да се придружи на останатите подвизи по кои Буџинкан Македонија е позната.

За што поточно станува збор?
Дваесетина ден пред одржувањето на настанот, инструкторот Довезенски постела географска карта на Македонија на земја, а потоа со заврзани очи посочува кон одредено место. Потоа со линијар се повлекува правец од почетната до крајната точка. Подоцна учесниците на семинарот се движат по таа патека, без разлика на условите на теренот. Во просек, рутата која што се изодува изнесува околу 50 километри, а рекордот беше поставен во 2009 година, кога членовите на Буџинкан Македонија изодеа 80 километри за 15 часа и 40 минути.

Шугендо
е древен јапонски метод кој ги истражува релациите
помеѓу човекот и
природата. Шугендо значи „Пат преку вежбање и
тестирање“, односно тоа е аскетска дисциплина која има за цел да
постигне самоусовршување преку повлекување во планина, медитација под
водопади и ладни реки, вежби за дишење на недостапни терени, се до
достигнување на неверојатни подвизи преку тестирање на телесната и
менталната издржливост. Тие кои го практикуваат овој метод, познати се
под името Шугенџа, а учењето се практикува во Јапонија се до денешни
дни.

За
основач на учењето се смета Ен но Гјоџа, кој живеел во близина на Кјото
во 7 век од нашата ера. Другото име, по кое овие следбеници биле
познати е Јамабуши или Планински Воини. Тие крстосувале по планинските
сртови на јапонските острови посетувајќи и заштитувајќи ги
многубројните храмови.
Некои учени веруваат дека токму овие луѓе, здружени со пребегнатите кинески генерали по падот на
династијата Танг, се сметаат за основоположници на вештината Нинџутсу.

Тема: Патот на Шугенџа / Духовно патување

Ден: 29 септември, 2013 (недела)

Место: Липац – Секулица (Скала*) – Липац

Програма:
07.00 часот – поаѓање од Скопје
08.00 часот – пристигнување и почеток на маршот
Враќање назад – само Господ знае!

Опрема: Земете се што сакате. Се е на Ваша одговорност и совест.

п.с. Не е исклучена средба со диви животни, дожд, невреме и останати непредвидени работи. Секој доаѓа на сопствен ризик. Пред да се пријавите, проверете ги информациите на нашата веб-страница од минатите години.

* на долната фотографија е најодалечената точка на патувањето, местото наречено Скала.

Author koryuPosted on август 17, 2013Categories Почетна

Школото за јапонски традиционални борбени вештини,
Буџинкан Македонија, од втори септември започнува со уписи на нови членови.

Тренинзите се одржуваат во вторник, четврток и сабота,
под водство на реномирани инструктори со долгогодишно искуство и лиценцирани
директно од водачот на меѓународната организација Буџинкан Доџо, д-р Масааки
Хатсуми.

Ја известуваме јавноста, дека во последно време во
Република Македонија се појавија многу лажни клубови кои тврдат дека ги
предаваат вештините на Буџинкан. Пред да почнете да вежбате во некои од нив,
задолжително побарајте од инструкторот да Ви ја покаже лиценцата (шидоши
менкјо) за подучување, дипломата за 5-ти дан, како и годишната картичка за
членство во организацијата. Задолжително пребарајте на интернет и видете како
истите изгледаат. Без тие документи, никој не смее да отвори нинџутсу доџо и да
го користи името на организацијата Буџинкан. Секој изговор за недостатокот на
споменатите документи, претставува обид на „инструкторот“ да Ве излаже и да
побегне од вистината.

Школото за борбени вештини Буџинкан Македонија е
единствениот претставник во нашата држава за Буџинкан (Нинџутсу), а доџо-то
непрекинато работи уште од 1995 година. Инструкторот Игор Довезенски (шидоши) е
единствениот лиценциран учител со 25-годишно искуство во класичните јапонски
борбени вештини, а
соработува и членува во повеќе реноморани корју организации.

Покрај титулите во Буџинкан, шидоши Довезенски е носител
и на звања во Даито рју Аикиџуџутсу (шидоин), а од неодамна започна да ја
изучува и најстарата јапонска борбена јапонска школа – Катори Шинто рју
Буџутсу.   

Иако уписите во доџо-то траат во текот на целата година,
сепак најидеално е да се отпочне со тренинг во септември, бидејќи тогаш се
формира компактна група на почетници.

Сите идни членови можат да добијат повеќе информации преку
нашата електронска пошта: daito_macedonia@yahoo.com или на телефон: 071 277 457.

Ве очекуваме.

Author koryuPosted on август 15, 2013Categories Почетна

Токму по фанатичниот тренинг и прекрасното дружење ќе бидат
запаметени деветте дена на петтиот по ред Летен Нинџа Камп, организиран од
страна на Школото за класични јапонски борбени вештини Буџинкан
Македонија.

И овој пат, место извештај, ќе Ви пренесеме дел од
импресиите на учесниците:

– Јас сум воодушевен од
кампот и од активностите. Многу работи ми оставија одличен впечаток, но ќе ги издвојам екпедицијата низ реката, ноќните акции и последната ноќ помината со смеење. Да не заборавам, голем „позитивен“ впечаток остави и еден
бокен на мојата глава :). Школата што ја работевме многу ми се допадна, а знаењето ќе ми помогне за моето следно полагање за 9 кју. (Таки Г.)

– Секој ден ми беше многу убав и позитивен. Не можам да ги опишам ноќните тренинзи, кои беа неверојатно добри, а исто така, водопадот на браната и капењето во реката ми оставија добар впечаток. Последната ноќ беше одлична, а особено пченката на скара, смеата, пивото и дружењето. (Михаил Д.)

– Ова е
мој 5-ти камп и на сите сум си поминал одлично. Но овој ми беше најуспешен досега. Дадов се од себе и извежбав со максимални 100%.
Храната беше одлична како и секогаш, а следствено на тоа и одењето во „кабината“ задоволителна. Ти благодарам сенсеи за мотивацијата, за несебичноста при предавањата и на лекциите и подршката. Благодарност и на сите што гинеа за нашите стомаци да бидат полни. Се гледаме следната година!!! (Тоше А.)

– Ова беше мојот прв камп, но
дефинитивно нема да биде последен. Поминав девет незаборавни денови и осознав многу нови работи за животот. Тренинзите беа одлични, школата беше перфектна, а посебно ми беа интересни ноќните акции. Храната беше неверојатно вкусна и
со душа го чекав секој оброк. А за последната ноќ немам што да
кажам…релаксирање покрај оган со печена пченка и пивце под отвореното
звездено небо под Липац. Совршено!!! 
И на крај, голема благодарност до Вас сенсеи за подршката, но најмногу за критиките кои ми ги напишавте на едно мало парче хартија. Се надевам дека нема да ве разочарам. (Драгана Л.)

Author koryuPosted on јули 31, 2013Categories Почетна

Уште само четири дена не раздвојуваат од стартот на петтиот по ред Летен Нинџа Камп во организација на Школото за класични јапонски борбени вештини – Буџинкан Македонија.

Како и секоја година, кампот ќе се одржи во периодот од 4-ти до 12-ти август, во хомбу доџо-то на организацијата Пат кон Сонцето, а сместено во долината под планината Липац.

Додека некои наши членови го користат август како единствен месец за одмор од напорните тренинзи, други му дават приоритет на Летниот Нинџа Камп на Буџинкан Македонија. Така, тренинзите продолжуваат со уште посилно темпо, „засилени“ со неверојатно добра забава и дружење. 

Овој настан е отворен за сите, без разлика на припадноста, стилот или степенот во одредена боречка вештина. Ова е шанса одблизу да се запознаете со нашата работа и да се дружите со членовите на Буџинкан Македонија.

Остануваат уште неколку дена за пријавување.

Повеќе информации тука:

http://camp.bujinkan.mk/index.php?p=camp&lang=

Author koryuPosted on јули 29, 2013Categories Почетна

Ја преживеваме последната битка со природата и со тоа ставивме крај на едно прекрасно дружење и себеспознавање. Ставивме крај на едно екстремно тестирање за кое ќе раскажуваат и следните генерации на нашето доџо.

Седум години по ред, воините на Буџинкан Македонија ја ставаа на тест својата издржливост и упорност преку невиден подвиг, познат под името „Преживување во природа“. Но се што е убаво има свој крај, па така го завршивме и ова патешествие.

За среќа повторно успешно!

Викендов што измина, за последен пат, единаесет членови на доџо-то земаа учество во „последната битка“  со природата и со самите себе. Од нив осуммина успеава да „преживеат“ и да ја добијат борбата со својот ум и со своето тело. Тројца од пријавените и покрај огромната желба, не успеава да ја издржат голготата под врелото сонце. Нивното тело попушти и мораа да се откажат пред време.

Семинарот започна во 08.00 часот во саботата, кога групата се упати кон местото викано С’мкнено. Станува збор за природно свлечиште сместено меѓу два речиси голи ридови, каде нема никаква сенка односно заштита од жешкото сонце. Целиот терен изобилува со песок, камења и карпи, а самата средина е примамлива единствено за некои видови инсекти и диви животни.

По пристигнувањето веднаш се започна со тренинг и средување на логорот и така наизменично до 23.00 часот, со цел да не се дозволи негативните мисли да преовладаат, а истовремено телото и духот да се стават под огромен притисок.
Првиот ден од семинарот, се откажаа двајца од пријавените. Напорниот тренинг и високата температура на воздухот, која изнесуваше 37 целзиусови степени, но и дехидрација поради малата дозволена количина на вода за пиење, си го направија своето. Кај нив се појави притисок во градите проследен со силно срцебиење, неконтролирано потење и нарушување на срцевиот ритам.

Ноќта помина во најдобар ред, со чување стража и со тричасовно спиење, кое всушност е единствениот одмор каде е дозволено целосно седнување односно залегнување.

Во неделата во 05.00 часот пред изгрејсонце, воините веќе будни се упатија на ближниот рид каде се започна со кенџутсу тренинг. Околу 05.30 часот, учесниците го поздравија изгревањето на сонцето, а потоа продолжија со тренингот.
Во 09.00 часот, тие започнаа со медитација во коритото на исушениот водопад, а потоа со силен марш групата се упати кон местото „Стари Лозја“, каде што продолжи со вообичајните активности.

Вториот ден температурата на воздухот беше за еден степен помала (36 целзиусови), но заморот беше видно зголемен, па така уште еден член мораше да се откаже поради сончаница која почна да предизвикува проблеми со ориентацијата, а подоцна предизвика силна главоболка проследена со повраќање.

Во 16.00 часот, водачот на Буџинкан Македонија прогласи крај на семинарот, по што учесниците се вратија на стартната точка каде што добија вода и овошје со цел да ја повратат силата назад.

Така, заврши овој голем настан за Буџинкан Македонија, кој седум години по ред го организиравме и на кој секогаш со задоволство и гордост ќе се сеќаваме.

На сите учесници кои „преживеава“ им честитаме што станаа дел од историјата на доџо-то, а на останатите кои се откажаа, исто така им честитаме за покажаната храброст да земат учество на настанот.

Нинпо Иккан!!!

Author koryuPosted on јули 4, 2013Categories Почетна

Стигнавме до крајот. Дојдовме до последниот семинар (седми по ред) „Преживување во природа“ што ќе биде организиран од страна на организацијата Пат кон Сонцето и Буџинкан Македонија.

Минатата година шидоши Игор Довезенски пред учесниците на настанот изјави дека нема намера повеќе да организира семинар на кој се појавуваат исти ученици, кои се веќе докажани. Тој спомена дека во последните неколку години не гледа причина да организира настан на кој подмладите ученици немаат предизвик или храброст да учествуваат. Само вака, според инструкторот Довезенски, семинарот ќе се зачува во спомените како нешто недостижно за повеќето „обични луѓе“. 

За што станува збор? Пред седум години, Довезенски го создаде семинарот со наслов „Преживување во природа“ на кој членовите на Буџинкан Македонија требаше да ја тестираат својата воља и издржливост до крајните граници. Како што годините изминуваа, така секоја година стандардите и предизвиците беа поголеми, но истовремено и се помалку ученици се пријавуваа за учество. Во последните две-три години, само мала група на членови останаа доследни и бестрашно влегуваа во оваа авантура (и најчесто) успешно ја совладуваа. 

Шидоши Игор Довезенски отсекогаш велел дека Будо може да вежба секој и секаде. Дека сигурноста што ја овозможува атмосферата во доџо-то воопшто не дозволува некому за да се нарече воин. И најважно од се, Довезенски отсекогаш велел дека нинџутсу може да се вежба само со близок контакт со природата и преку тестирање на издржливоста (физичка и ментална) до крајните граници.

Епа, ова е последна прилика за тоа:

За храбрите, за одважните.

Два пеколни дена, далеку од цивилизација, без храна и само литар ипол вода, без дополнителна облека и хигиенски средства. Два дена вежбање, медитација и голо преживување.  

Место: С’мкнено (26 км. до најблискиот град и болница / пустински услови)

Време: 27 и 28 јули, 2013 година
Пријавување најдоцна до 18 јули, со цел да се избегне калкулирање со временските услови. 

Почеток: 07:00 часот (сабота)

Враќање: само Господ знае

Прочитај убаво и размисли!!!

Maкедонија е позната по пеколните летни температури предизвикани од таканаречените „африкански бранови“. Најтопло е во последните денови од јули, кога температурата се искачува и над 45 целзиусови, а индексот на сончевото зрачење е на максималното ниво.

Пред семинарот, секој учесник во сопствена организација треба да си направи соодветни лекарски прегледи и да добие усмена или писмена потврда од лекар дека е психофизички здрав и целосно подготвен за дводневен екстремен напор (под врелото летно сонце), без храна и вода, а проследен со тежок тренинг и тричасовен сон. 

Секој учесник доброволно се пријавува на семинарот и сноси сопствена одговорност за евентуалните последици настанати по неговото здравје или живот!

Настанот е отворен за сите и на него можат да учествуваат сите граѓани на Македонија (и од надвор) со наполнети 18 години.

Дозволена опрема: вреќа за спиење, шаторско крило, војничка униформа (панталони и кошула), една маица, капа, еден пар гаќи (широки), еден пар чорапи, јаже, нож и шише од литро ипол (празно).

Важно: забрането носење храна, вода и останати работи кои не се наведени погоре. Пред поаѓање, ќе има задолжителна проверка.  

Најважно: семинарот е предвиден само за цврсти момци и девојки. Условите за тренинг ќе бидат исклучително тешки, а дисциплината ќе биде железна. Тие кои не се чуствуваат психофизички спремни за да „влезат во пеколот“ и кои не се подготвени да го убијат сопственото его, ги молиме да не се пријавуваат на семинарот. Имајте во предвид дека температурата на воздухот може да се искачи над 45 целзиусови. Забрането седнување на задник за време на семинарот (во текот на двата дена) и потпирање на сите четири екстремитети истовремено. Само три часа спиење, останатото време тренинг.

Забрането жалење, изговори и плачење за време на семинарот.

Појаснување: Дозволена количина на вода за пиење за двата дена: 1.5 литри.
Неколкупати досега сме слушнале дека „чим е дозволено литар ипол вода и не е толку страшно“. Должни сме да Ви појасниме дека таа количина на вода, под врелото сонце, се губи во првите неколку часови од тренингот. Течностите од Вашето тело испаруваат преку потење, дишење и зборување. Вие во текот на двата дена постојано имате активности кои предизвукуваат потење, а при тоа не смеете да седнете ниту за миг и да се одморите. Нема сенки, нема дополнителни количини вода. Размислете добро!!!

Се гледаме наскоро во „дупката“.