20 години Буџинкан Македонија (2 јули 1995 - 2 јули 2015)

Author koryuPosted on Categories Почетна

Со голема караоке забава, завчера беше одбележан 20-годишниот јубилеј од основањето на Буџинкан Македонија. Настанот се одржа во скопската винаријата „Картал“, а на него присуствуваа над четиреесет членови на доџо-то.

Учениците на инструкторот Довезенски, од сите генераци собрани заедно на едно место, имаа можност меѓусебно да си споделат спомени и импресии од поранешните и сегашните времиња минати во Буџинкан Македонија. Многу другарства, љубовни врски, деловни партнерства, па дури и бракови се „родиле“ за време на годините минати во тренинзи во единственото традиционално јапонско доџо во Македонија, а најголем дел од членовите на доџо-то се уште се многу благодарни поради тоа. 
Инаку, за тие кои не знаат, Буџинкан Македонија е основана на 2 јули, во 1995 година, од страна на Игор Довезенски, единствениот Македонец носител на неколку титули во неколку различни класични борбени школи (рју-ха). Од основањето, па до денес, организацијата работи без прекини и секојдневно одржува тренинзи за своите членови. Засега, тоа е единственото признаено доџо во нашата држава, од страна на поглаварот на Буџинкан, соке Масааки Хатсуми. Буџинкан Македонија се уште важи за еден од најдинамичните клубови во Европа, со многубројно и активно членство, што само зборува за квалитетот на знаењето што се добива во доџо-то.
На крајот на забавата, основачот Довезенски се заблагодари на сите свои членови и гости кои присуствуваа на јубилејната средба и кои дојдоа да одадат почит за макотрпната работа која од Буџинкан Македонија создаде почитувано доџо со врвно светско реноме, познато и признато од најдобрите интернационални организации за јапонски боречки вештини. 

Одржан меѓународниот Катори Шинто рју семинар под водство на Ерик Лоув

Author koryuPosted on Categories Почетна

Во организација на Доџо-то за класични јапонски боречки вештини – Катори Шинто рју Македонија, кое е дел од Организацијата „Пат кон Сонцето“, викендов што измина се одржа семинар за Теншин Шоден Катори Шинто рју Буџутсу. Покрај учесниците од Македонија, специјално за овој настан допатуваа и кобудоки од Холандија и од Романија, со што семинарот се здоби со меѓународен карактер.

Предавач на семинарот беше нашиот учител за оваа најстара документирана јапонска боречка вештина, Ерик Лоув, кој дојде придружуван од тројца свои ученици од Амстердам. Во петокот, тие одржаа специјален тренинг за водачот на Катори Шинто рју Македонија, Игор Довезенски, кој, пак, имаше можност да вежба со сите нив подинечно. Следниот ден, на официјалниот дел од семинарот, се придружија и останатите учесници, меѓу кои и нашите пријатели од Романија, кои неодамна организираа семинар на кој Довезенски ги подучи на основите на ракување со јапонски меч. 

За време на седумдневниот престој во Македонија, сенсеи Ерик, заедно со другите учесници, имаа можност да се запознат со културно-историските споменици, но и да уживаат во убавините на нашата прекрасна земја, која, како што тие велат, при секоја посета ги остава без здив. 

Одржан семинарот Јуми Ја Џутсу

Author koryuPosted on Categories Почетна

Уште еден успешен семинар во природа, овој пат на тема Јуми Ја Џутсу (вештина на ракување со лак и стрела). На настанот учествуваа петорица членови на Буџинкан Македонија, кој ги изучуваа основните начини на гаѓање со ова оружје. Пред почетокот на семинарот, на учесниците детално им беше покажан начинот на изработка на лак и стрела, во ситуација кога ќе се најдеме во природа, а од личната опрема со нас имаме само нож. 

На крајот од семинарот, учениците имаа можност да гаѓаат и со самострел, при што се уверија во неговата моќноста и прецизност. 
На следниот семинар за лак и стрела, ќе се вежба гаѓање со јапонски ханкју, така што ќе се добие уште една нова перспектива за ова древно, но се уште корисно оружје. 

Јуми Ја (Лак и Стрела) - семинар во природа

Author koryuPosted on Categories Почетна
Вештината на ракување со лак и стрела била задолжителна за изучување од страна на јапонските воини и била една од најважните се до појавата на огненото оружје. За разлика од самурајскиот лак, кој се одликувал по својата големина и совршена изработка, шиноби воините користеле своја верзија на ова оружје кое било едноставно изработено и со многу помали димензии. 
На 26.04.2015 година (недела), инструкторот Игор Довезенски, после неколкугодишна пауза, повторно ќе одржи семинар на тема: Јуми Ја Џутсу (вештина на гаѓање со лак и стрела).
За време на настанот, учесниците ќе имат можност да научат како самите да си изработат лак и стрела и како да гаѓаат со неа. Ќе се изучуваат и разни стратегии и тактики на борба со ова оружје. Освен тоа, шидоши Игор Довезенски ќе одржи и краток курс за гаѓање со самострел, па така членовите на Буџинкан Македонија ќе имат можност да се запознат и со ова оружје. 
Семинарот е наменет исклучиво за членовите на Организацијата Пат кон Сонцето.  
Ден: 26.04.2015 (недела)
Место: Млака / Маренковац
Програма: 
08.00 часот – поаѓање од Скопје
09.00 часот – пристигнување
10.00 -17.30 часот – теоретски и практичен дел
18.30 враќање назад
п.с. Еден ден претходно, во Хомбу Доџо-то ќе се одржи тренинг за гаѓање со фукија. Доколку Ви се потребни повеќе информации, слободно контактирајте не преку нашиот и-мејл. 

Предавање и демонстрација на нинџутсу во градинката „Срничка Бамби“

Author koryuPosted on Categories Почетна

Членовите на Буџинкан Македонија, семпаи Тодор Ангеловски и кохаи Мартин Гачевски, на покана од педагогот Снежана Тодоровска, денес одржаа предавање и демонстрација на нинџутсу, наменета за дечињата од градинката „Срничка Бамби“ во општината Аеродром. 

На најмладите, најпрвин им беше одржано предавање за потеклото и улогата на нинџите и на самураите во средновековна Јапонија, а потоа им беа покажани некои основни техники на борба без и со оружје. На крајот, дечињата имаа можност да поставуваат прашања, како и одблиску да ги разгледаат реквизитите наменети за тренинг. 
Инаку, Доџо-то за класични јапонски борбени вештини „Буџинкан Македонија“, во секое време стои на располагање на сите заинтересирани институции кои сакаат да научат повеќе за боречките вештини кои доаѓаат од Земјата на изгрејсонцето.

Одржан семинарот „Силата на Јари VI“

Author koryuPosted on Categories Почетна
Имавме многу интензивен викенд, исполнет со одлична дружба и тренинзи. Иако временските услови воопшто не беа благопријатно наклонети, сепак ниту за миг не не поколебаа да го правиме тоа во кое што најмногу уживаме. 
Усовршувањето на јапонските традиционални боречки вештини започна во саботата наутро, со изучување и повторување на веќе научените техники на гаѓање со шурикени. Веќе следниот ден, започна семинарот за борба со копје, познат под името „Силата на Јари“, инаку настан кој редовно привлекува многу членови на Буџинкан Македонија. 
За тоа како поминавме, ги пренесуваме чувствата на шидоши хо Марко Опачиќ:
– Уште еден во низата незаборавни викенд-семинари во Хомбу Доџо. Самото присуство во таков „храм“, Ве прави да се чувствувате некако отуѓено од сите проблеми што ги имате, да се соживеете со околината и да ги смирите умот и телото.
Саботниот ден не се „погоди“ баш за тренинг, поради лошите временски услови кои ги имавме, но тоа беше само еден дополнителен тест за нашата изджливост, трпение и снаодливост. Мислам дека има мал напредок кај тие што ова им беше второ или трето фрлање. Сенсеи се погрижи да ни го предаде целото деншо, а најмногу го очекував фрлањето додека правиш каитен истовремено. Прекрасно!!!
Вечерта како и секогаш беше резервирана за разговор со Сенсеи покрај каминчето во Хомбу. Додека ни ги раскажуваше неговите искуства од неговиот боречки живот, удираше печати на деншо-ата кои ни ги предаде на мене, на Зоки и на Мони. И тоа на „стар јапонски начин“, кој за прв пат го имав видено во животот. Потоа го отворивме и распославме макимоното за Гјокко рју (кое беше долго околу 30 метри). Внатре беа сите ставови, кати и нивоа. Тоа беше ден во кој што имаше многу што да се види, слушне и научи.
Следниот ден „лудилото пристигна“. Копје! Оружје кое што го обожувам и за кое сум се трудел најмногу од сите семинари во природа. Тешко е за ракување и потребно е многу тренинг и пот за да се совлада. Деншо-то за Јари за мене има најголема тежина од сите што сум ги добил од Сенсеи. 
Што се однесува до самиот тренинг на Соџутсу и оваа година учениците навистина одлично извежбаа и сите се трудеа максимално да го совладат материјалот. Беа одлично мотивирани, никој не се откажа, и дефинитивно им се допадна, а тоа можеше да им се прочита на лицето. Среќен сум што и понатаму има ученици кои доаѓаат на семинари во природа, за време на викендите.
Сакам да го споменам и семпаи Зоки, кој секогаш ги корегираше помладите кога грешеа и секогаш ги караше ако не се трудеа доволно. 

Силата на Јари VI

Author koryuPosted on Categories Почетна
Шестиот по ред традиционален семинар за Соџутсу (борба со копје), оваа година ќе се одржи на 29 март (2015). За време на овој настан, членовите на Буџинкан Македонија ги изучуваат и ги усовршуваат тајните на борба со Јари (копје).

Како и секоја година, така и оваа инструкторот Игор Довезенски ќе предава нови техники, но и начини и стратегии за што поефикасно користењето на ова оружје.
„Школото Шинден Фудо рју Дакентаиџутсу ги користи следниве оружја: Јари (копје), Оно (воена секира), О Тсучи (голем чекан), Тачи (меч) и Нагината. Легендата вели дека една вечер демон (Тенгу) му дошол на сон на основачот на вештината и го научил како да се бори со Јари. Овие техники и ден-денес се сметат за најголема тајна на школата.“
На семинарот можат да учествуваат сите заинтересирани ученици на доџо-то Буџинкан Македонија / Пат кон Сонцето, без разлика на искуството или звањето.
Потребна опрема за вежбање: бокуто и јари (хакама за јуданши)
Тема: Силата на Јари
Ден: 29.03.2015 (недела)
Место: Слепо Коло
Програма:
08.00 часот – поаѓање од Скопје
09.00 часот – пристигнување
10.00 -16.00 часот – теоретски и практичен дел 
17.00 враќање назад
Претходниот ден (сабота), за сите заинтересирани ќе се одржи тренинг во Хомбу Доџо-то на „Пат кон Сонцето“ на тема: шурикен џутсу. 

Пријавување и информации преку инбокс, телефон или на Форум.

Одржан семинарот во Романија со Игор Довезенски

Author koryuPosted on Categories Почетна

Викендов што измина, инструкторот Игор Довезенски одржа семинар во градот Јаши – Романија. Настанот беше организиран од страна на Каталин Сореану, водачот на „Буџинкан Шинган Доџо“. На семинарот учествуваа околу 30-тина учесници од неколку романски градови, практичари на различни боречки вештини, како и еден учесник од нашата земја кој допатува во Јаши специјално за овој настан. 

За време на првата сесија во саботата, инструкторот Довезенски се задржа на основните положби на телото, како и на основните сечења и блокови со меч. Втората сесија беше резервирана за иаи џутсу, а потоа и за вежбање на основните форми на кенџутсу. 
Во текот на вториот ден, тренингот започна со баттоџутсу, а потоа се пристапи кон повторување на целиот материјал што се изучуваше за време на семинарот. 
Тоа што беше многу впечатливо за шидоши Довезенски е одличниот напредок на Каталин Сореану, стекнат во времето од последната средба во Македонија, па до сега. Едноставно не можеше, а да не се забележи дека во сето претходно научено, Сореану вложил многу љубов и труд, а со тоа и резултатите испливаа на површина. Исто така, не можеше да не се забележи и желбата на останатите учесници да навлезат подлабоко во тајните на традиционалното јапонско мечување. Многумина од нив, по завршувањето на семинарот изразија желба за повторна средба и за повторно изучување на кенџутсу.
На крајот, инструкторот Игор Довезенски сака да се заблагодари за поканата да предава, како и за одличната организација од страна на домаќините. Гостопримливоста на Каталин остави без зборови, а упатуваме благодарност и до неговите ученици Мариус, Нику, Ромео и Надја за љубезноста и за помошта околу организацијата на семинарот.

Одржан семинарот „Харагеи II“

Author koryuPosted on Categories Почетна

На врвот на ридот Еленац, членовите на Буџинкан Македонија вчера го одржаа вториот по ред семинар посветен на техниките за Харагеи односно чувствувањето на промените кои се случуваат околу нас. Шибањето на ладниот ветер ниту за миг не претставуваше пречка да се навлезе уште подетално во тајните на медитацијата и самоспознавањето.

Наместо извештај, ќе ги пренесеме чувствата на учесниците споделени на нашиот Форум, веднаш по завршувањето на семинарот.

Марко О. – „Неможам да го опишам чусвтвото на мирисот од билките на Еленац, на воздухот што доаѓа од недопрената природа на Липац, од потта што тече предизвикана од нашиот труд додека се качуваме нагоре на „сите четири“. Од ветерот што ви ја надразнува кожата и од сонцето што ја буди енергијата. Од луѓето кои со своето присуство ве прават да се чувствувате убаво и среќно. Харагеи е посебна приказна. Техниките треба да се практикуваат секој ден и да одат паралелно со физичкиот тренинг, бидејќи тоа што Сенсеи денеска ни го раскажа, предаде и објасни е школо за животот воопшто. Учевме како да дишиме, како да бидеме здрави. Се сретнавме со четири нови вежби, за кои треба многу часови тренинг. Мислам дека сите бевме импресионирани од денешниот семинар и ова ќе ’не држи’ со денови, па и со недели. Едно искачување на Липац е квалитетна терапија за душата и телото. Замислете си за 10-15 години, сите повторно собрани на истото место, но со дечиња во раце на кои ќе им раскажуваме за прекрасните денови минати со подучувањата на Сенсеи“

Владимир А. – „Јас само на кратко ќе заклучам дека многу повеќе разбрав сега, кога ги повторуваме по втор пат вежбите, отколку кога ги вежбавме првиот пат“.
Тодор А. – „Не знам од каде попрво да почнам. Иако времето не не послужи комплетно како што се надевавме, мислам дека може да се каже дека семинарот е повеќе од успешен. Почнувајќи од искачувањето на Еленац, кое што повеќе те полни со енергија отколку што те празни, па се до спуштањето кон Еленачки Кладенац. Тука е и движењето низ мракот, проследено со најразлични дискусии. Што се однесува до тренингот, морам да признам дека не можам сите техники да ги разберам и веднаш да ги применам. Но тие што можам, ги вежбав со поголемо разбирање и по продлабочено сфаќање, за разлика од минатата година. Забележав и дека концентрацијата беше многу поголема кај вежбачите што учествуваат по втор пат, со исклучок на Сања, бидејќи на неа овие техники и ’легнаа од прва’. Третиот пат очекувам да биде уште подобро, но само ако до тогаш ги практикуваме вежбите и по дома, како што ни напомена сенсеи. На крајот за храната за време на паузата. Мојата беше посна, но ми беше поубава и повкусна од било која друга бидејќи ја јадев во друштво со вас“.

Катори Шинто рју Буџутсу семинар со Сенсеи Ерик во Грција

Author koryuPosted on Categories Почетна

Викендов што измина, инструкторот Игор Довезенски и ученичката Моника Ш., учествуваа на меѓународниот семинар за Теншин Шоден Катори Шинто рју Буџутсу, што се одржа во Атина – Република Грција. На настанот, покрај домаќините и преставниците од нашата земја, учествуваа и членови од Катори Шинто рју Холандија.

Инаку, семинарот беше предводен од Ерик Лоув, шидоша од Амстердам и ментор на нашиот огранок во Македонија и учител за оваа вештина на Игор Довезенски.

За време на петочниот тренинг, сенсеи Ерик предаваше кати од Омоте но Тачи, каде што се задржа на неколку детаљи во однос на изведбата и движењето на нозете. Во саботата, поголем акцент беше ставен на изведбата на техниките на извлекување на мечот од стоечка положба (Тачи аи Баттоџутсу), додека во неделата најмногу се вежбаа катите од Омоте но Иаи.
Последните два дена, Сенсеи Ерик, на Игор Довезенски му ги предаде и првите две кати од Омоте но Бо, со што се отвори уште „една врата“ во македонскиот огранок за Теншин Шоден Катори Шинто рју.

Се разбира, слободно време кое што го имаше малку, беше искористено за прошетка низ Атина и посета на некои културно-историски споменици во овој град.

Следната средба со Сенсеи Ерик, ќе биде во мај, кога учителот ќе одржи меѓународен семинар во Македонија, секако во организација на Катори Шинто рју Македонија.