Семинар во Романија со Игор Довезенски

Author koryuPosted on Categories Почетна

На покана од Каталин Сореану – водач на „Буџинкан Шинган Доџо“, шидоши Игор Довезенски ќе одржи семинар на тема: „Кенџутсу и Иаиџутсу“. 

Настанот ќе се одржи на 14-15 март, во преубавиот град Јаши, познат како „центар на културата“ во Романија. 
Семинарот има меѓународен карактер и на него можат да учествуваат сите заинтересирани, без разлика на нивото на знаење или на стилот. 
За повеќе информации, слободно обратете се на организаторот преку неговиот и-мејл: contact@shingan.ro
За да се запознаете со работата на „Шинган Доџо“, посетете ја нивната веб-страницата: www.shingan.ro

Повеќе информации за инструкторот Довезенски, можете да прочитате тука: биографија 

За градот Јаши (на Википедија)

и на (ЈуТјуб
)
Се гледаме наскоро!

Харагеи II - семинар во природа

Author koryuPosted on Categories Почетна

Хара ( 腹 ) е јапонски збор за стомак, додека Геи ( 芸 ) означува уметност. Меѓутоа, во боречките вештини зад овој збор се крие комплетен принцип на внатрешна и надворешна комуникација преку самоспознавање и навремено откривање на промените кои се случуваат наоколу. Учителите за Зен, со векови наназад подучуваат дека дишењето со Хара (стомак) го чисти умот од секакви мисли и овозможува поглед длабоко во себе. Токму тоа согледување на внатрешните и на надворешните промени, се верува дека на воинот ќе му овозможи навреме да ја препознае опасноста и истовремено да реагира. Ваквиот тренинг за култивирање на внатрешната енергија, познатиот зен-монах Такуан Сохо го нарекувал „вежба на неподвижниот ум“. 

Замислете ситуација, Вие и Вашиот противник сте одалечени два метра еден од друг со вперени катани во срцата. Тензијата се зголемува и само еден погрешен здив или едно трепкање со окото може да Ве дели од животот и смртта. Да го препознаете нападот, да го почуствувате моментот кога треба да се реагира, е од клучно значење. 
Минатата година, шидоши Игор Довезенски за прв пат „отворено“ го одржа овој семинар, кој досега беше достапен само за понапредните ученици. На нивно барање, истата тема повторно ќе биде обработена на 1 март, при што ќе бидат предавани и дополнителни вежби. Оваа можност им се нуди на сите наши членови кои сакаат да ги научат техниките за зголемување на будноста и да ја зголемат својата борбена вештина. 
Ден: 01.03.2015 (недела)
Место: Еленац
Програма:
08.00 часот – поаѓање од Скопје
09.00 часот – пристигнување
09.00 – 16.00 часот – теоретски и практичен дел
17.00 – враќање назад 
Семинарот е отворен  само за членовите на Пат кон Сонцето, но може да се присуствува на истиот и со препорака од инструктор кој негува пријателски односи со нашето доџо. Прашања и пријавување на и-мејл, на телефон, во доџо или на Форум.

Линк од минатогодишниот извештај за семинарот —–> тука

Успешно одржан гошинџутсу семинарот за Нинпо Не Ваза®

Author koryuPosted on Categories Почетна

Со полно доџо насмеани лица и по некоја модринка и гребнатинка на телото, вчера успешно се одржа семинарот за Нинпо Не Ваза. 

На настанот присуствуваа петнаесет членови на Буџинкан Македонија, кои беа поделени во две групи: почетници и напредни. Додека почетниците ги совладуваа основните техники на преминување од положба во положба на земја, како и базичните зафати, напредните имаа можност да се запознаат со техниките на ослободување од зафат со нозе, како и преминување во контра-напад со цел да се совлада противникот во што е можно пократок период. 
Како и секогаш досега, така и овој пат семинарот за Нинпо Не Ваза не остави никого рамнодушен и покрај тоа што на одредени моменти донесе тешкотии кај некои од учесниците, а пред се поради помалку грубата природа на самиот систем. Но, како што годините минуваат, се повеќе се забележува напредокот кај учениците кои покажуваат најголема упорност и желба за изучување на јапонските боречки вештини.  

Специјален Кенџутсу семинар за Буџинкан Шинган Доџо (Романија)

Author koryuPosted on Categories Почетна

Викендов што измина, шидоши Игор Довезенски одржа семинар организиран исклучиво за членовите на романското Буџинкан Шинган Доџо, на тема „Основите на класичното јапонско мечување“. Настанот беше реализиран во скопското доџо на Буџинкан Македонија, а во предавањето помогна и помладиот инструктор Марко Опачиќ.

Специјално за семинарот, од Романија допатуваа инструкторот Каталин Сореану, заедно со тројца негови ученици, кои во текот на саботата и неделата неуморно ги вежбаа и повторуваа основните техники на јапонското кенџутсу, при тоа прецизно следејќи ги лекциите и советите на инструкторот Довезенски. За време на настанот, учесниците од Романија покажаа голема страст и желба за совладување на вештината на самурајското мечување, така што ниту еден момент не подзастанаа со тренингот. 
Слободното време, кое заради интензитетот на семинарот овој пат навистина недостасуваше, беше искористено за посета на централното градско подрачје на Скопје, каде што Романците уживаа во убавините на градот. Тие ги испробаа и надалеку прочуените македонски специјалитети, по што самите изјавија дека нашата кујна е една од највусните што досега ги пробале. 
Задоволни од наученото, членовите на Буџинкан Шинган Доџо го поканија инструкторот Довезенски да одржи уште еден семинар, но овој пат во нивниот роден град Јаши, познат културен и универзитетски центар во Романија. 
Семинарот ќе се одржи во март и во оваа прилика ги покануваме сите заинтересирани, без разлика на нивото на знаење или на вештината, да земат учество на настанот и да се запознаат со основите на самурајското кенџутсу. 
За повеќе информации, можете да се обратите директно на инструкторот Каталин Сореану, преку неговата веб-страница: http://www.shingan.ro 

Нинпо Не Ваза® - Гошинџутсу Семинар

Author koryuPosted on Categories Почетна

Првиот Нинпо Не Ваза семинар во 2015-та година ќе се одржи на 1 февруари, на тема „Гошин Џутсу“. Како што самиот наслов кажува, овој пат вниманието ќе биде насочено кон можностите за самоодбрана од моментот кога противникот ќе не собори на земја, па се до повторното враќање во стоечка позиција.  

Семинарот е наменет за сите членови на Организацијата за изучување на традиционални јапонски борбени вештини „Пат кон Сонцето“, без разлика на нивното звање или вештина. 
Датум: 01.02.2015 (недела)

Место: Скопје (во доџо-то на Буџинкан Македонија)

Време: 11:00 – 15:00 часот
Тема: Нинпо Не Ваза Гошинџутсу (техники за самоодбрана на земја)
Котизација: симболични 300 денари кои ќе бидат донирани за хумантарни цели.

Повеќе информации за Нинпо Не Ваза ——> тука

  

Одржан петтиот „Зимски Нинџа Тренинг“

Author koryuPosted on Categories Почетна

Земјата и водата наоколу беа замрзнати поради ниската температура, но сончевата светлина даваше посебна магија за време на вчерашниот семинар, на кој членовите на Буџинкан Македонија по петти пат ги вежбаа техниките за преживување во природа во зимски услови. 

Како и секоја година, беше повторувано тоа што досега е научено, бидејќи тоа е единствениот начин да се зачува знаењето, но истовремено беа презентирани и вежбани нови техники, со чие познавање максимално се зголемуваат шансите за преживување во зимски услови кога природата делува многу сурово. 
За учениците, посебно беше интересен начинот на изработка на засолништето, познато под името „сандак“, но големо внимание предизвикаа и начините на ориентација, како и новите начини на палење оган и приготвување на храна. 
По завршувањето на еднодневната обука, дел од учесниците ги споделија следните впечатоци:

Марко Опачиќ – „Секогаш кога имаме семинар во природа, претходната вечер „окапувам“ до доцна во ноќтта поради возбуда, поради желба и мисла: како ќе биде утре, што ќе има ново, како ќе се снајдам во зададените ситуации, дали ќе биде убаво времето итн. И овој пат беше така. Најпрвин дека ми е јубилејно – петто по ред ’зимско преживување’, а потоа и затоа што знаев дека ќе учиме како да изградиме нов тип на засолниште.

Поради искуството од претходните години, можев да претпоставам како ќе изгледа тоа, но мојата замисла не беше ни од далеку толку добра колку што изгледаше таканаречениот ’сандак’. Многу интересен и вешт начин на градење, на пополнување на страничните делови, како и на покривање на кровот. Интересно е што секоја година се повторуваат работите од минатото, но и што секој пат се учи нешто ново. Оваа година дознавме за разликите на преживувањето во листопадни и зимзелени шуми, потоа за останатите начини за палење оган, за подготвувањето на храната, за заштитата од премрзнување на екстремитетите, за ориентацијата во просторот, опасностите од дехидратација, како и начините на одржување на оганот во текот на целата ноќ.
Сето ова беше испреплетено со насмевките на луѓето кои учествуваа, како и сонцето кое ѕиркаше преку крошните на големите дрвја“.
Михаил Дракалски – „Вчера ми беше четврти зимски нинџа тренинг и можам да кажам дека иако секоја година се учи по нешто ново, оваа имаше многу разлики како во типот на засолништето, така и во техниките на палење оган, во подготвувањето на храната, во ориентацијата и така натаму. Ова ми е еден од омилените семинари и мислам дека секој би требало да земе учество барем еднаш и да се увери во тоа. Голема благодарност до сенсеи, како и до останатите учесници кои постојано ми помагаа во извршувањето на задачите“. 
Сања Симонова – „Вчерашниот тренинг помина во одлична работна атмосфера, а секоја минутка беше максимално искористена и исполнета со многу љубов и посветеност кон задачите кои ги добивавме. Научив многу нови работи, а истовремено стекнав чувство на сигурност во она што веќе сме го учеле на некои претходни семинари во природа. Кој бара – ќе најде. Ако бараш со верба и со љубов во срцето, тоа по што си тргнал – истовремено тргнало кон тебе. Па дури и кога баравме суви гранки, мокри лисја, лијани или стебла. Ова беше одличен семинар, се гледаме на следниот во февруари посветен на харагеи. И за крај едно прашање: што е подобро од еднодневен семинар во природа? Епа – дводневен семинар во природа“!

Зимски Нинџа Тренинг - Начини на Преживување во Природа V

Author koryuPosted on Categories Почетна

Ниските температури што оваа година ја зафатија нашата земја се идеални за одржување на петтиот по ред „Зимски Нинџа Тренинг“. За време на овој настан, членовите на Буџинкан Македонија ги изучуваат техниките на преживување во природа во зимски услови. Деновиве, кога живата на термометарот се спушти и до -20 целзиусови, кога земјата е покриена со снежна покривка, а неретко дува и ветер, се како порачани за сите кои сакаат да се соочат со предизвиците предизвикани од ладното и сурово време.

Како што веќе знаете, воините на Буџинкан Македонија отсекогаш сметале дека вежбањето исклучиво во доџо, каде што постои една безбедна и пријателска атмосфера, можат од секого да направат добар „спортист“ и одличен „салонски нинџа“. Меѓутоа тоа што нас не разликува од останатите, се знаењето и сигурноста што ја чувствуваме кога сме соочени со најтешките предизвици додека се наоѓаме далеку од градовите во кои што живееме. Всушност, ние суровата природа ја доживуваме како наш природен хабитат каде што се чувствуваме како „риба во вода“ односно како да се наоѓаме во наша природна средина. 
Овој семинар е замислен според сценарио дека сме завеани или загубени далеку од нашиот дом, некаде на планина или во шума, и потребно е да ги преземеме сите мерки за безбедност за да можеме да ја преживееме ноќтта, со што ќе си ги зголемите шансите за преживување. На настанот, шидоши Игор Довезенски ги предава токму овие техники кои се неопходен арсенал за секој што сака сериозно да ја изучува вештината позната под името нинџутсу. 
Потребна опрема: нож, коноп и парче памук. Доколку некој има проблем со набавката на потребната опрема, слободно нека се обрати до доџо-ти за да му се излезе во пресрет.  
Предупредување: температурите најверојатно ќе бидат во минус. Теренот е отворен и ветровит. Присуство на диви животни во овој период од годината е нормална појава. Најмалку седум часа без престан ќе бидете изложени на екстремно ладно време. Секој доаѓа на сопствена одговорност.
Понесете со себе топла облека.
Ден: 11.01.2015 (недела)
Место: Млака
Програма:
08.00 часот – поаѓање од Скопје
09.00 часот – пристигнување
09.30 – 16.30 часот – теоретски и практичен дел
17.30 – враќање назад 
Оваа година семинарот е отворен само за членовите на Буџинкан Македонија / Пат кон Сонцето. Прашања и пријавување на и-мејл, на телефон, во доџо или на Форум.   

Извештај за 2014 година

Author koryuPosted on Categories Почетна

Нескромно можеме да кажеме дека годината што измина беше една од најуспешните во историјата на Буџинкан Македонија, како и на Организацијата за изучување на јапонски класични боречки вештини „Пат кон Сонцето“. Карактеристично беше „испливувањето на површина“ на некои помлади ученици, кои со својата пожртвуваност и посветеност, полека но сигурно си го заземаат своето место во нашето доџо. 

Да почнеме со меѓународните семинари. Во април организиравме неколкудневен семинар за Теншин Шоден Катори Шинто рју Буџутсу, под водство на нашиот ментор за оваа најстара борбена јапонска школа, шидоша Ерик Лоув. Со него, од Холандија допатуваа и шесторица негови постари ученици. Покрај нив, учество на настанот земаа и гости од Грција и Албанија, кои за прв пат имаа можност да се сретнат со оваа прекрасна вештина. 

Што се однесува до домашните семинари, оваа година ги имаше во изобилство. Така, од интензивните, во нашето Хомбу Доџо одржавме вкупно шест, додека од семинарите во природа, беа организирани и успешно реализирани вкупно седум. Во скопското доџо на Буџинкан Македонија, исто така беа организирани шест, со што се заокружува бројката од вкупно 19 семинари, на кои учителот Игор Довезенски несебично го предаваше своето знаење на членовите на нашата Организација. 

Како поспецифични настани за 2014-та година ќе ги издвоиме: традиционалниот семинар „Кенџутсу под ѕвездите на Липац“, каде што членовите на доџо-то повторно два дена ја вежбаа мечувалската школа „Оно ха Итто рју – Такеда ден“ под врвот на митската планина Липац и преспаа во конаците на преубавиот Бељаковски Манстир. Потоа, незаобиколно мора да се спомене новиот настан познат под името „Живот во Дивината“, кој оваа година за прв пат беше организиран и кој остави неверојатен впечаток кај учесниците. Секако тука е и „Работилницата за Самоодбрана за Жени“, која што традиционално се одржува секоја година во октомври и која што е наменета пред се за припадничките на понежниот пол. И на крајот, би го споменале најголемиот од сите настани, а тоа е деветодневниот „Летен Нинџа Камп“. 

Во нашето доџо за Даито рју Аикибудо, во 2014-та година беа организирани три интензивни семинари за Аикиџуџутсу. Еден од нив беше одржан во Хомбу Доџо-то на „Пат кон Сонцето“, додека другите два во доџо-то во Скопје. Вреди да се спомене дека последниот интензивен семинар беше во траење од цели шест дена. Веќе за пролет, следната година, договорена е посета на нашиот учител Антонино Черта.  

Оваа година ќе ја паметиме и по тоа што Буџинкан Македонија доби уште еден шидоши хо (помлад инструктор) односно нашиот долгогодишен член Зоран Тодоровски успешно положи за мајсторски степен шодан (прв дан), а шидоши Игор Довезенски ја напиша и ја објави првата книга во Македонија посветена на класичните јапонски боречки вештини, а со наслов „Разговор со учениците“.

Истата можете да ја набавите во kupikniga.mk         

Доколку треба да го издвоиме најважниот настан во изминатава одина, тоа дефинитивно е патувањето на учителот Игор Довезенски во Јапонија. За да не се повторуваме повторно, повеќе информации за тоа можете да прочитате —-> тука

Во однос на присутноста во медиумите и оваа година се појавивме во неколку медиуми „со душа“, како што Игор Довезенски ги нарекува „малите“ списанија и портали. Ќе ги издвоиме интервјуата дадени за „Теа Модерна“, потоа за рубриката „БукБокс“ на офф.нет.мк, како и интервјуто дадено за бизнис порталот bi.mk

Наспроти тоа, повторно беше одбиена соработката со сите големи и гломазни медиумски машинерии кои безобразно, вулгарно и нападно и сервираат на македонската јавност патетични играни серии и шунд-забавни емисии наменски продуцирани во некои соседни земји, а на штета на македонската култура и традиција. 

На крајот, сакаме да им честитаме на сите наши членови кои на завчерашното полагање покажаа одлично знаење и се здобија со повисоки звања. Особено сме горди на нашите членови кои се стекнаа со Пофалници за нивниот труд. Во текот на целата година, Тодор А. и Кристијан М. не пропуштија ниту еден редовен час одржан во нашето доџо, додека Таки Г. имаше само еден изостанок. 

Темата за 2015-та година во Буџинкан Македонија ќе биде „Џиссен Гата“.

На сите наши членови им посакуваме уште поголем успех во годината што следи.

Нинпо Иккан! 

Одржан семинарот „Тогакуре рју Нинџутсу - Кихон ваза Кеико хо“

Author koryuPosted on Categories Почетна

Во саботата што измина, беше одржан последниот семинар за оваа година насловен како: „Тогакуре рју Нинџутсу – Кихон ваза Кеико хо“. 

На задоволство на членовите на Буџинкан Македонија што учествуваа на настанот, шидоши Игор Довезенски најмногу внимание посвети на деталите од кери ваза (ножни удари). Покрај основните техники на удирање напред, назад, во страна и во скок, се вежбаа и некои помалку подзаборавени ножни удари, кои на почетокот на деведесетите години на минатиот век беа многу користени од страна на големите мајстори во организацијата Буџинкан. 
За време на семинарот, не изостанаа ниту техниките на тркалање (таихенџутсу), а се вежбаа и напади со кусари фундо, потоа одбрана од ханбо (стап), како и техники на голорака борба. 
Првиот семинар во новата 2015 година, ќе се одржи во природа, на тема:„Зимски Нинџа Тренинг – Начини на Преживување во Природа“.  
Код: 3110

Тогакуре рју Нинџутсу - Кихон ваза Кеико хо

Author koryuPosted on Categories Почетна

Како што самиот наслов кажува, на овој еднодневен семинар ќе се вежбаат основните техники на нинџутсу школата Тогакуре рју. Според планот за работа, за време на настанот предвидено е инструкторот Игор Довезенски да ги запознае своите ученици со начинот на кој Тогакуре рју се вежбаше во организацијата „Буџинкан“ кон крајот на осумдесетите односно на почетокот на деведесетите години на минатиот век, поточно во времето кога водачот на Буџинкан Македонија го започна патешествието кое што се уште трае до денешните дни. 

На настанот, шидоши Довезенски ќе ги предава основните техники на тркалање (таихенџутсу), удирање со нозе (кери ваза), техники на прикрадување и напад со ланец (шиноби аруки то кусари фундо), како и одбрана од голорак напад, но и од вооружен напаѓач (таиџутсу). 

Потребна опрема: кеико ги и оби, јаже (кусари), дрвен нож и ханбо. Доколку некој нема реквизити, нека не извести на време и ќе може да ги користи тие од доџо-то.  

Датум: 20 декември (сабота) 2014

Место: Скопје (во доџо-то на Буџинкан Македонија)

Време: 11:00 – 15:00 

Тема:
-Тогакуре рју Нинџутсу – Кихон ваза Кеико хо

Овој „никако да не се пропушти“ семинар ќе биде последен за Буџинкан Македонија за оваа година.   
п.с. Фотографијата од 1993 година со шидоши Игор Довезенски е снимена за време на семинар во природа на тема „Гјокко рју Кошиџутсу“