Харагеи III - семинар во природа

Author koryuPosted on Categories Почетна
Хара ( 腹 ) е јапонски збор за стомак, додека Геи ( 芸 ) означува уметност. Меѓутоа, во боречките вештини зад овој збор се крие комплетен принцип на внатрешна и надворешна комуникација преку самоспознавање и навремено откривање на промените кои се случуваат наоколу. Учителите за Зен, со векови наназад подучуваат дека дишењето со Хара (стомак) го чисти умот од секакви мисли и овозможува поглед длабоко во себе. Токму тоа согледување на внатрешните и на надворешните промени, се верува дека на воинот ќе му овозможи навреме да ја препознае опасноста и истовремено да реагира. Ваквиот тренинг за култивирање на внатрешната енергија, познатиот зен-монах Такуан Сохо го нарекувал „вежба на неподвижниот ум“. 

Замислете ситуација, Вие и Вашиот противник сте одалечени два метра еден од друг со вперени катани во срцата. Тензијата се зголемува и само еден погрешен здив или едно трепкање со окото може да Ве дели од животот и смртта. Да го препознаете нападот, да го почуствувате моментот кога треба да се реагира, е од клучно значење. 

Оваа година по трет пат, инструкторот Игор Довезенски ќе ги подучува своите ученици како да ја зголемат будноста, а со тоа и да ја подобрат својата борбена вештина. 

Ден: 28.02.2016 (недела)
Место: Еленац
Програма:
08.00 часот – поаѓање од Скопје
09.00 часот – пристигнување
09.00 – 16.00 часот – теоретски и практичен дел
17.00 – враќање назад 
Семинарот е отворен  само за членовите на Пат кон Сонцето, но може да се присуствува на истиот и со препорака од личност што негува пријателски односи со нашето доџо. Прашања и пријавување на и-мејл, на телефон, во доџо или на Форум.

Одржан Зимскиот Нинџа Тренинг - Начини на Преживување во Природа VI

Author koryuPosted on Categories Почетна

Викендов што измина го одржавме првиот семинар во новата 2016-та година. Учесниците беа полни со импресии, а по завршувањето на настанот ги споделија чувствата на нашиот Форум, а со тоа го напишаа и овој Извештај.

„Секое наше ’корју патешествие’ си има своја приказна, а така беше и овој пат. Прво да кажам дека сум многу среќен што се продолжи традицијата на одржување на овој семинар и што секогаш сме во прилично голем број со просек од над 10 учесници. Посебно ми е мило што интерес почнаа да покажуваат и почетниците. Присуството го збогати и Косарче, која тргна по Патот и со помош на лекциите на Таки се пронајде и таа во активностите на групата.
Иако некои од работите што ги изучуваме секој пат се повторуваат,  сепак секоја година потребно е повторно да се повторат лекциите, а со цел техниките да усовршат подобро. Овој пат Сенсеи мене ми ја постави задачата околу изградбата за засолништето. Откако ги собрав сите и им објаснив што треба да се прави, почнавме со работа. Иако мислам дека успешно ја направивме колибата, сепак имам две замерки. Бевме премногу бучни и гласно се смеевме и зборувавме, а второ бевме спори во изградбата.
Ќе ги споменам и новите работи кои ги учевме: подготовката на јајце на око, печењето на тиква во земја, различните начини на одржување на огнот, правењето вратичка на колибата за заштита од животни, начините на засолнување на опремата од дожд и снег, како и низата други работи кои Сенсеи ги спомена низ предавањето.“ (Марко Опачиќ)
„Се напивме од изворот и научивме корисни ’финти’ за преживување во зимски услови. И тоа од прва рака, за разлика од гледањето секакви видеа на интернетов 🙂
Илјада пати сум гледал како се прави скривалиште за ноќевање по телевизиите, ама се е ’ветер и магла’ додека човек не види како тоа навистина се прави. Мило ми беше што бевме собрани сите на едно место и со нетрпение ја чекам летната верзија на истиот семинар. Кој да знае дека лијаните можат да бидат толку меки и удобни, а ’змиските соленки’ толку вкусни!“ (Мартин Петревски)
„Кога бев мал многу сакав да правам лудории во шума и да градам засолништа. Затоа овој семинар, заедно со ’Живот во Дивината’ за мене се прекрасни. И затоа велам дека Буџинкан Македонија ги прави моите детски сништа – реалност.“ (Таки Гаковски)
„Разбирање, топлина, љубов и насмевки се ширеа низ воздухот за време на целиот настан. Мора да ги споменам и највкусните соленки печени на стапче кои Сенсеи ни ги приготви, но и супер витаминската тиква на жар. За жал, денот мораше да заврши и да си појдеме дома. Со нетрпиение го чекам следниот семинар во природа. Ти благодарам Сенсеи за се!“ (Тамара Ѓоргиевска)
„Двеста тикви сум јадел до сега, а од одредени извори сум слушнал дека и јас сум една голема тиква, ама никоја досега ми нема останато во мислите, како таа од земја откопана. Можеби и поради константната мисла дека волци ќе ме изедат, но ова беше ден за паметење. Не се сомневав во ниту еден момент дека Сенсеи има големо знаење и искуство и дека лесно ќе се снајде во оваа околина, како и дека постарите од доџо-то се добро истренирани и обучени за вакви семинари. Се сомневав единствено дека ќе можам да научам нешто, или, пак, дека пак ќе бидам нешто повење од една подвижна пречка за останатите.
Сенсеи докажа дека негова цел не е ‘архивирање’ на знаењето за сопствени цели, туку дека секоја негова вештина е ставена на наше располагање, се разбира доколку имаме желба за учење.“ (Дамјан Серафимовски)
„За време на овој семинар научив многу работи, а особено ми се допадна дружбата со повозрасните членови од доџо-то. Посебен впечаток ми оставија спремањето на јајцето на око во лименка, како и печењето на тиквата закопана во земја. Многу беше убаво чувството да се учествува на еден ваков настан.“ (Косара Довезенска)

Зимски Нинџа Тренинг - Начини на Преживување во Природа VI

Author koryuPosted on Categories Почетна
Во 2015-та, членовите на Буџинкан Македонија доживеаја многу авантури кои ја направија годината незаборавна. Неверојатното патување продолжува и во 2016-та, а првата дестинација е Млака. Оваа шумичка на брегот на Крива Река и оваа година ќе биде местото каде што нашите воини ќе ги учат и усовршуваат техниките на зимското преживување. Снегот кој деновиве падна, засилен со ниските температури, е одличен предизвик за ваков настан.

Како што веќе знаете, воините на Буџинкан Македонија отсекогаш сметале дека вежбањето исклучиво во доџо, каде што постои една безбедна и пријателска атмосфера, можат од секого да направат добар „спортист“ и одличен „салонски нинџа“. Меѓутоа тоа што нас не разликува од останатите, се знаењето и сигурноста што ги чувствуваме кога сме соочени со најтешките предизвици додека се наоѓаме далеку од градовите во кои што живееме. Всушност, ние суровата природа ја доживуваме како наш природен хабитат каде што се чувствуваме како „риба во вода“ односно како да се наоѓаме во наша природна средина. 

Овој семинар е замислен според сценарио во сме завеани или загубени далеку од нашиот дом, некаде на планина или во шума, и потребно е да ги преземеме сите мерки за безбедност за да можеме да ја преживееме ноќтта, со што ќе си ги зголемиме шансите за преживување. На настанот, шидоши Игор Довезенски ги предава токму овие техники кои се неопходен арсенал за секој што сака сериозно да ја изучува вештината позната под името нинџутсу. 
Потребна опрема: тие што биле знаат, тие што не биле ќе дознаат за следната година на лице место.  
Предупредување: температурите најверојатно ќе бидат во минус. Теренот е отворен и ветровит. Присуство на диви животни во овој период од годината е нормална појава. Најмалку седум часа без престан ќе бидете изложени на екстремно ладно време. Секој доаѓа на сопствена одговорност.
Понесете со себе топла облека.
Ден: 10.01.2016 (недела)
Место: Млака
Програма:
08.00 часот – поаѓање од Скопје
09.00 часот – пристигнување
09.30 – 16.30 часот – теоретски и практичен дел
17.30 – враќање назад 
Оваа година, освен за членовите на Буџинкан Македонија / Пат кон Сонцето, семинарот е отворен за сите заинтересирани. Прашања и пријавување на и-мејл, на телефон, во доџо или на Форум.  

Извештај за 2015-та година

Author koryuPosted on Categories Почетна

Токму кога помисливме дека минатогодишната година, со вкупно 19 одржани семинари нема никогаш да ја повториме, во оваа буквално ги надминавме сите наши можни очекувања. Дами и господа – 29 семинари во 2015-та !!!

Да ги распоредиме со цел транспарентно да имате на увид што точно сме сработиле во текот на целата година. 

Почнуваме со меѓународните семинари организирани во Македонија од страна на Организацијата „Пат кон Сонцето“.
 
Во април, нашиот учител за Даито рју Аикиџуџутсу, шиханот Антонино Черта го одржа својот редовен семинар во нашето доџо каде што ни пренесе нови „тајни“ од оваа древна самурајска традиција. 
Следниот месец, во Хомбу Доџо-то на „Пат кон Сонцето“, заедно со своите ученици од Холандија допатува и Сенсеи Ерик Лоув. За време на еднонеделната посета тој се потруди да ни пренесе колку што е можно повеќе од своето богато искуство во Теншин Шоден Катори Шинто рју Буџутсу. На семинарот допатуваа и нашите пријатели од Романија, членовите на Шинган Доџо-то од Јаши.
За време на летото, го одржавме и нашиот надалеку познат Летен Камп, каде што овој пат покрај инструкторот Довезенски, во улога на предавач се појави и неговиот пријател од Русија – Сергеј Бабкин. Инаку, Бабкин покрај тоа што е инструктор за Катори Шинто рју и за Јога, истиот е претставник во неговата земја за класичната јапонска боречка вештина Кукамишин рју Хјохо. Токму таа вештина имавме можност да ја изучуваме за време на овој настан.

Што се однесува до семинарите на кои предаваше инструкторот Довезенски, листата изгледа вака: шест одржани семинари во природа, осум во Хомбу Доџо-то под Липац, исто толку во доџо-то во Скопје, како и на два во Романија во доџо-то „Шинган“ во градот Јаши. Исто така, во 2015-та Довезенски зеде учество на неколку меѓународни семинари под водство на неколку реномирани учители за класични јапонски боречки вештини. Да ги споменеме и нив по редослед: февруари во Атина (Грција) на семинар за Катори Шинто рју со Ерик Лоув; во јуни во Градара (Италија) на семинар за Оно ха Итто рју Кенџутсу со Сасамори Такеми Соке; во септември во Цариград / Истанбул на семинар со шиханот за Катори Шинто рју – Нобутоши Отаке. На последниов споменат настан, заедно со Довезенски отпатуваа и Марко Опачиќ и Дарко Божиновски, при што последниов даде и крвна заклетва (кеппан). 

Во оваа прилика сакаме да го изразиме нашето задоволство за воспоставената соработка со „Шинган Доџо-то“ од градот Јаши во Романија. Имено, нивниот водач Каталин Сореану го избра токму инструкторот Довезенски како семпаи (постар ученик – ментор) кој ќе му помага во изучувањето на најстарата традиционална јапонска боречка вештина Теншин Шоден Катори Шинто рју Буџутсу, а секако под водство на заедничкиот ментор Ерик Лоув. Така, членовите на романската секција оваа година на два пати ја посетија Македонија со цел да ги научат основите на школата, а исто така тие на два пати го поканија Довезенски да одржи семинари во нивното доџо.

Покрај овие настани, вредат да се споменат и следниве: семпаи Тодор Ангеловски и кохаи Мартин Гачевски одржаа предавање за дечињата во градинката „Срничка бамби“ во населбата Аеродром; отворивме уште една детска нинџутсу секција (Нинџа Клинци II); прославивме 20 години од постоењето на „Пат кон Сонцето“ и Буџинкан Македонија; нашите најмлади членови од детската група гостуваа во Македонската Национална Телевизија каде што успешно ги презентираа вештините на Буџинкан, а подоцна го посетија и нашето Хомбу Доџо каде што ја изучуваа школата Кото рју Коппоџутсу, како и основите на јапонското мечување; Игор Довезенски се здоби со втор (нидан), а Марко Опачиќ со прв дан (шодан) во Даито рју Аикиџуџутсу.

Како еден од најважните настани слободно можеме да го истакнеме основањето на „Лабораторијата за Источни Култури“. Имено, на предлог на Игор Довезенски, на 14-ти септември Стручниот совет на Институтот за етнологија и антропологија при Универзитетот „Свети Кирил и Методиј“, донесе одлука за основање на Лабораторијата, со основна цел да се проучува материјалната, социјалната и духовната култура на народите од далечниот исток, со посебен нагласок на Јапонија. 

Во рамките на Лабораторијата, се организираат разни Работилници и Семинари на најразлични теми, а реализаторот на наставата Довезенски секојдневно во неа одржува и часови за Даито рју Аикиџуџутсу и за Џунан Таисо (вежби за растегнување и балансирање на мускулите во телото). Со тоа, јапонските класични јапонски боречки вештини во Македонија се издигнаа на академско ниво и конечно го заземаа местото што им припаѓа.

На крајот, сакаме да се заблагодариме на сите членови на Организацијата „Пат кон Сонцето“, а особено на нашите ученици од Буџинкан Македонија кои со својата макотрпна работа овозможија и оваа година да уживаме во прекрасното патување низ светот на традиционалните јапонски боречки традиции (Корју Буџутсу). Не можеме да ветиме дека следната година ќе постигнеме уште подобри резултати од оваа, но можеме да гарантираме дека се додека дишеме воздух на земјава, нема да ја намалиме љубовта кон борбените класични вештини наследени од генерациите пред нас.

Пат кон Сонцето. Едно доџо – едно семејство. Буџинкан Македонија. Моја приказна – мој живот.

Нинпо Иккан!!!     

Одржан последниот семинар за 2015-та на тема Ханбо Гошинџутсу

Author koryuPosted on Categories Почетна

Со вчерашниот семинар на тема Ханбо Гошинџутсу (самоодбрана со употреба на краток стап), речиси ги завршивме сите обврски во Буџинкан Македонија од програмата за оваа година. 

Остануваат уште два редовни тренинзи, како и полагањето кое ќе се одржи во среда (30 декември). 
За моментите на семинарот и овој пат ќе ги споделиме импресиите на кохаи Сања Симонова што таа ги искажа на нашиот Форум:

„На моја голема радост, ’книгата’ на семинари за оваа година ја завршивме со ханбо. Љубовта кон ова оружје ми е од деновите кога вежбавме на паркет со дрвено и се сеќавам колку многу беше болно и каков звук создаваше кога ќе паднеше на подот. Неговата убавина според мене е во тоа што е ’скриено’ во многу предмети кои ние ги именуваме со други имиња: чадор, бастум, планинарски стап, сукало…
Како што кажа Сенсеи, ханбо-то е сосема легално, можеме да го носиме со нас секаде и во секое време. Да се владеат техники со вакво оружје е голема предност. Прво затоа што е доволно големо за да направи голема штета на агресивниот напаѓач, која не мора да биде видлива за око, а истовремено е доволно мало за да може да се ’спакува’ за носење со нас. Ханбо-то е мало, а големо нешто.
 
На семинарот бевме осуммина и поминавме осум кати – која од која поубава. Иако првично мислев дека ќе започнеме со основните ставови и форми со кои веќе сум се сретнала, Сенсеи не изненади со тоа што ни кажа дека ќе вежбаме конкретни сценарија за одбрана од различни последователни удари, фатови за дел од облеката, или, пак, обиди оружјето да ни биде одземено. Катите беа ’со карактер’, што би рекол семпаи Марко. Можеше да се почувстува експлозивниот потенцијал на оружјето, а болката при контактот се чувствуваше постојано. Тоа беше најверниот доказ за неговата ефикасност.

Атмосферата за време за целиот семинар беше одлична и секој се потруди да го даде најдоброто од себе. Интензитетот на тренингот допринесе постојано да се менува бојата на лицето кај почетниците, а кај постарите ја зголемуваше сигурноста, брзината и владеењето на ова оружје. Многу е убаво чувството кога за нешто што го сметаш за познато, ќе откриеш некое ново движење кое прави голема разлика и ќе се почувствуваш воодушевено што повторувањето на одредена ката ти открива уште еден нејзин бисер, а ти создава уште поголема глад за понатаму!“

 

Игор Довезенски одржа семинар за Нинпо Не Ваза®

Author koryuPosted on Categories Почетна

Водачот на Буџинкан Македонија, Игор Довезенски, одржа уште еден неделен семинар во скопското доџо на Буџинкан Македонија. Овој пат, тема на проучување беа борбените техники на земја односно Не Ваза. 

За време на настанот, шидоши Довезенски несебично го сподели своето знаење од овој борбен систем, а учениците неуморно ги впиваа сите детали, истовремено покажувајќи висок степен на интерес за начините на борење на земја. Повеќето од учесниците беа почетници, кои со голема љубопитност пристапија кон учењето, додека искусните ветерани се обидуваа да го извадат максимумот од нив. 
Покрај положбите на телото и начините на контрола на противникот, Довезенски подучуваше и техники за давење, како и за контрола на потенцијалниот агресивен напаѓач. 
Задоволни од наученото, учесниците на семинарот на крајот изјавија дека со задоволство ќе присуствуваат и на следниот настан посветен на истата тема.  

Одличен семинар за Наге Ваза во скопското доџо на Буџинкан Македонија

Author koryuPosted on Categories Почетна

Уште еден успешно одржан семинар од серијата на зимските настани во Буџинкан Македонија. И овој пат, бројката на учесници не се спушти под десет, што значи дека се уште се негува високиот борбен дух меѓу членовите на Организацијата „Пат кон Сонцето“.  

За време на семинарот, учениците на доџо-то ги вежбаа основните фрлања што се користат во класичните јапонски боречки вешини, но секако, инструкторот Игор Довезенски подучуваше и некои нови техники кои наидоа на одличен прием кај учесниците. Особено ефективна беше изведбата на фрлањето Хараи Гоши, кое учениците одлично го прифатија и за кратко време научија како да го применат. 
Останува и понатаму да се усовршуваат Наге Ваза техниките, кои отсекогаш важеле за многу ефикасни и лесно применливи при борба со агресивен противник кој сака да ни наштети односно да ни нанесе физичка повреда.  

За следната недела закажан е семинар за борба на земја (Не Ваза). 

Успешно одржан семинарот за Џунан Таисо

Author koryuPosted on Categories Почетна

Во организација на Буџинкан Македонија, во скопското доџо денес беше одржан семинарот за Џунан Таисо (вежби за растегнување на телото). На настанот присуствуваа 15-тина учесници, од кои повеќето беа членови на Организацијата за изучување класични јапонски борбени вештини „Пат кон Сонцето“, или, пак, нивни блиски роднини и пријатели.   

За време на семинарот, шидоши Игор Довезенски предаваше вежби кои служат за воспоставување телесна рамнотежа преку истегнување или зајакнување на одредени мускулни групи. Покрај тоа, се вежбаа и специјални техники за зголемување на подвижноста во зглобовите, а секако, неизбежни беа и техниките за медитација.

За време на целиот настан, инструкторот Довезенски ја истакнуваше важноста на Џунан Таисо во развојниот пат на секој кобудока (личност што практикува класични јапонски боречки вештини), а особено ја нагласуваше потребата од флексибилност на сите оние кои вежбаат нинџутсу вештини.

Одржан семинарот со инструкторот Довезенски во Романија

Author koryuPosted on Categories Почетна

Викендов што измина, во романскиот град Јаши беше одржан семинар на кој инструкторот Игор Довезенски подучуваше техники на борење со меч (кенџутсу), како и начини на борба со стап (боџутсу). Настанот беше организиран од страна на водачот на Шинган Доџо, Каталин Сореану, а на негово барање беше од затворен тип односно наменет само за напредните членови на неговото доџо. 

Во текот на првиот ден, Довезенски ги предаваше техниките на брзо извлекување и симултано сечење со јапонски меч (иаиџутсу) од седечка и од стоечка положба, како и основите на борба со катана.
Следниот ден, главно се вежбаа основите на борба со стап, а при крајот на семинарот Довезенски подучуваше и некои понапредни техники на боџутсу. 
Како и секогаш, домаќинот Каталин Сореану се покажа како одличен организатор кој внимава дури и на најситните детаљи, а исто така и неговите ученици се погрижија целиот семинар да помине во неверојатно одлична атосфера. 
  
На крајот, инструкторот Игор Довезенски сака да се заблагодари на сите учесници од Шинган Доџо за добриот тренинг и за времето поминато во смеење и дружење. 
До следниот пат… 

Втор семинар во Романија со Игор Довезенски

Author koryuPosted on Categories Почетна
Водачот на „Буџинкан Шинган Доџо“, Каталин Сореану, повторно го покани шидоши Игор Довезенски да одржи семинар, овој пат на тема: „Кенџутсу и Боџутсу“. 
Настанот ќе се одржи на 07-08 ноември, во преубавиот град Јаши, познат како „центар на културата“ во Романија. 
Семинарот има меѓународен карактер и на него можат да учествуваат сите заинтересирани, без разлика на нивото на знаење или на стилот. 
За повеќе информации, слободно обратете се на организаторот преку неговиот и-мејл: contact@shingan.ro
За да се запознаете со работата на „Шинган Доџо“, посетете ја нивната веб-страницата: www.shingan.ro
Повеќе информации за инструкторот Довезенски, можете да прочитате тука: биографија 
Се гледаме наскоро!