Буџинкан Македонија

Одржана „Работилницата за Самоодбрана за Жени® VII“

koryuоктомври 27, 2015Почетна

Учесничките на семинарот со споделување на своите импресии го напишаа извештајот за седмата Работилница за Самоодбрана за Жени:

Сања Симонова – „Првиот тренинг траеше два ипол часа. Сенсеи не воведе во овогодинешната тема, ни одговори на почетничките

прашања, по што веднаш се фрливме на тренинг. Сценаријата кои ги работевме се токму оние кои најчесто се случуваат во реалност и освен тоа што вежбавме како треба да се поставиме во случај на напад, Сенсеи ни објасни и кои ситуации и кои положби треба да ги избегнуваме по секоја цена. А ако веќе се случат и како треба соодветно да се реагира.

Времето брзо леташе, девојките се повеќе се остреа, стануваше жестоко.
Паузата помеѓу двата тренинзи ја искористивме за прошетка низ околината, посета на легендарната кооперација на Дацко, фотографирање на довезенската убавина, ручече, детски игри и брканици низ доџо-то.

Вториот тренинг траеше исто така два ипол часа. Се спуштивме на земја, ама духот и понатаму беше во висините. Сенсеи цело време вежбаше со нас и не подучуваше буквално со секој збор и контакт.
Вечерта имавме мала забава околу огнот, се разгракавме ко што само жени можат, се почестивме по една чашка домашен ликер и уморни и среќни се спремивме за спиење. Каминот светеше и не грееше, ноќта беше ведра и ветуваше убаво утро.

Вториот ден, Аничка ни запали огинче, се измкнавме од вреќите право на чајче и појадок со разговор за тоа кој што го боли од тренинг. Привремената болка никако не може да ја згасне или засени постојаната љубов. Набрзо дојде Сенсеи и почнавме со утринскиот тренинг. Утврдивме дел од она што го работевме претходниот ден, на забавен и многу практичен начин. Продолживме со нови и нови сценарија, а завршивме со едно толку убаво растегнување после кое се полниш со многу енергија и сила. Паузата ја искористивме за прошетка до Здравкин Камен. Сонцето светеше високо над нас, но никогаш не зајде во нас. Се беше толку убаво, магично и неповторливо убаво.

Последниот тренинг започна со помала динамика поради тоа што секоја од нас чувствуваше болка во одреден дел на телото, ама тоа само поради интензивните сесии претходно. По кратко загревање, ’испукавме’ уште два часа без проблем. Последниот тренинг во Хомбу е најтежок на почеток, а најубав при крајот. Има една точка на премин од тоа кога ти е многу тешко и кога одеднаш ти станува неподносливо лесно, а тоа е некое посебно чувство кое засега не знам како да го опишам.

Си го исчистивме доџото, се спакувавме, се изгушкавме неколку пати и заминавме. Испишавме уште една незаборавна страница на Патот, вградивме уште многу знаење, го зацврстивме пријателството, си посакавме уште многу години да ни трае и со радост ги очекуваме сите заеднички мигови кои ни доаѓаат.

За мене ова беше четврта Работилница во континуитет. Секоја си има свои убавини и мигови за паметење, ама годинава имаше невидено дружење, зезање и компактност. Сите, ама буквално сите бевме како едно. Организациски поспремни не сме биле, делење на храна, вода и се што сме донеле беше како една мајка за сите да спремила и ставила на средина. Секој за секого за помош се најде и таква единственост, обединетост, љубов, посветеност, почит и лојалност се стекнуваат само во клубот. Кога пред сето ова стои еден навистина голем и исклучителен човек, кого сите го сакаме од дното на срцето, кој толку безпоштедно се дава и во најситните детали, не може, а да не се разблика во нас тој извор на константно подобрување.
Благодарност до тебе Сенсеи и благодарност до сите што беа дел од овој прекрасен викенд!

п.с. Маја, толку многу ти се израдував што едвај чекам повторно да те видам во кимоно во доџо. Епа девојки, strong is the new sexy ;)“

Елена Ангеловска – „Ме боли млазот. Да, добро прочитавте. Не ме боли само секо мускулче кога се качувам по скали, ниту кога се наведнувам да си ги врзам патиките, ниту пак само кога се кревам на прсти да докачам нешто од креденецот. Ме боли и млазот. Да, млазот додека се туширам и секоја капка вода на моето тело боли, секоја клетка, секоја пора. И некој ќе рече, па зошто побогу секоја година упорно се пријавуваш на таа работилница за самоодбрана кога после неа патиш со денови? Е на тој некој, како да му објаснам дека секоја од тие капки што болат има во себе живост каква што нема ни реката што секојдневно упорно тече пред моите очи. Таа

капка има во себе топлина која лекува, која бара да се исправиш, да сакаш, и да постоиш. Е тоа е таа алхемија од два дена во волшебниот рај наречен доџо. Не обично доџо, туку она нашето, на Буџинкан Македонија.“

Тамара Ѓорѓиевска – „Прв семинар, први импресии. Баш било тешко да се опише како си поминал само во неколку реченици.

Чувството да си таму, во Хомбу Доџо е просто неверојатно. Кој бил – знае!

Во текот на двата дена Сенсеи ни ги предаваше техниките поврзани со темата. Времето ни помина многу бргу, не го почувствувавме воопшто. Тренинзи, прошетки низ селото, дружење со Косара и Ксенија, разговори на кои им нема крај.

Спиењето не се опишува. Сите стуткани една до друга, во вреќи и јамболии.

Вториот ден, после тренингот Сенсеи не прошета до Здравкин Камен. Се вративме на време за втората сесија, а кога дојде време да завршиме со Работилницата, со неверување гледам во часовникот и се чудам кога помина времето…

Не ми се одеше дома. Преубаво ми беше во доџо-то. Толку многу љубов и разбирање на едно место. Незаборавно дружење.

Ти благодарам Сенсеи за се!“

Работилница за Самоодбрана за Жени® VII

koryuоктомври 19, 2015Почетна

„Седум-те важни правила за самоодбрана“ ќе биде насловот на седмата по ред „Работилница за Самоодбрана за Жени“. Како и секоја година претходно, инструкторот на Буџинкан Македонија, Игор Довезенски, ќе ги едуцира припадничките на понежниот пол за тоа, како да се заштитат себеси во случај на напад или физичко злоставување.

Организацијата за изучување на класични јапонски борбени вештини „Пат кон Сонцето“, во 2008 година за прв пат во Македонија организираше ваков настан и оттогаш Работилницата стана синоним и место каде што девојките и жените можат да научат техники за самоодбрана при несакани ситуации.

Иако настанот започна да се организира првенствено за нашите членки, низ текот на времето се поголемо учество земаа сите припаднички на поубавиот пол, без разлика на годините или на нивото на знаење.

Потребна опрема: тренерки и маица (без патенти и копчиња). Се вежба на душеци (боси). За сите учеснички обезбедено е бесплатно спиење во доџо-то.

Датум на одржување: 24/25 октомври, 2015

Место: Пат кон Сонцето – Хомбу Доџо (62 км. од Скопје)

Дополнителни информации: 075 564 011 или на е-маил: daito_macedonia@yahoo.com

Ве молиме да не се стеснувате при поставувањето на прашањата.

Одржан Чигирики семинар во Хомбу Доџо-то на Буџинкан Македонија

koryuоктомври 14, 2015Почетна

Викендов што измина, во Хомбу Доџо-то на Организацијата „Пат кон Сонцето“ беше одржан семинар за Чигирики. За тие што не знаат, ова егзотично јапонско оружје се состои од стап или метална прачка на која што има закачено ланец со тег.

Инаку, последниот семинар за Чигирики, инструкторот Довезенски го одржа во далечната 2006-та година, така што ова беше вистинско освежување за членовите на Буџинкан Македонија. За време на настанот се вежбаа положбите на телото, како и девет техники кои се користеле за борба против напаѓач вооружен со меч.

По завршувањето на семинарот, кохаи Владимир Антовски напиша текст на Форум-от на Буџинкан Македонија, каде што ги споделува

своите импресии од викендот:

„Во петокот, дури во 16:00 часот конечно се организиравме и побаравме од Сенсеи да го одржи семинаров. Знам дека тој вложи многу и дека му оставивме многу малку време за да се подготви.

Секој семинар во Хомбу Доџо си е приказна за себе, а тие што биле знаат точно зашто. Чигирики е едно специфично и доста егзотично оружје. Вежбањето со него е истовремено забавно, но и опасно. Тоа е оружје наменето за борба со противник вооружен со меч. Сенсеи, како и секогаш одлично запознаен со оружјата, најпрвин пристапи кон објаснувањето за историјата на Чигирики, за тоа како се користело и зошто било толку ефикасно против меч. Објасни и во кои школи се изучува и од каде потекнува. Тренинзите беа како игра. Си играш со противникот на неколку нивоа. Си играш на психолошко ниво, со дистанцата помеѓу противникот и тебе, како и со неговиот живот.
Сакам да ги споменам и браќата Неделковски кои овој месец покажаа огромен интерес за ова што ние го работиме. Иако и двајцата се почетници, тие се многу активни кога станува збор за семинарите во Хомбу. Мислам дека сите од нивната група треба да земат пример и да се активираат повеќе. Тоа што се вежба во доџото во Скопје е само гребење на површината на класичните боречки вештини. Не знам дали нашите членови се свесни што пропуштаат кога не учествуваат на семинарите во Хомбу. Тоа е едно огромно богатство од знаење кое Сенсеи го поседува и без резерва го пренесува на сите кои доаѓаат таму. Жално е тоа да не се искористи. Тоа е нешто што останува за цел живот, додека излегувањата во град или одењето на скара-излети нема да ви го збогатат духот. Освен тоа, на семинарите во Хомбу се зближувате со тие што вежбаат со вас, станувате подобри другари и уживате во прекрасната природа и околина која е неверојатна во било кој период од годината. Размислете убаво што во суштина сакате да вежбате и што сакате да научите“.

Нинџа Клинци-те го освоија Хомбу Доџо-то

koryuоктомври 7, 2015Почетна

Место класичен извештај за посетата на Хомбу Доџо-то од страна на Нинџа Клинците на Буџинкан Македонија, ќе го објавиме текстот на кохаи Сања Симонова, што таа го напиша на нашиот Форум.

„Верувајте дека чувствата од тој ден никогаш не можат да избледат или да се заборават. Колку само им верувам на дечињата кога кажуваа дека тоа им бил најубавиот ден од кога се деца, бидејќи и мене ми беше најубав ден од кога не сум дете.

Сите беа на зборното место во договореното време. Којзнае и дали спиеле ноќта. По патот се чувствуваше неверојатно позитивна енергија и детски џагор (од нетрпение) да стигнат побрзо.
Кога стигнавме, по кратка пауза, Таки одма ги прошета низ дворот околу доџо-то и им раскажуваше за историјата на Пат кон Сонцето. Јас се зачудив со каква енергија, знаење и внимание им се обраќаше на клинците. Мислам дека секој сантиметар од доџото го познава, точно знае кога и што треба да каже или да покаже, со што го имаше нивното целосно внимание.
Додека бевме внатре, им раскажуваше за оружјата, за сликите, за се што може да се види на ѕидовите и се беше до тој степен магично, што мене на момент ми заличи на документарна емисија за деца.
Тренинзите поминаа одлично. Децата се златни, прекрасни… не знам како да кажам, многу ги сакам сите.
Не можеш да подучуваш, а истовремено да не бидеш подучен. Полека ми станува малку од малку јасно, како е да се работи со толку многу деца на таква возраст и навистина тоа е особено важен процес за сите нас.

Во летниковецот беше права занимална. Си мацкаат од манџата, сркаат од гравчето, се фотографират. Едно бара репете, друго вика ’ова е најубавиот патлиџан во мојот живот’…
Слободното време беше искористено за прошетки, запознавање со природата и со животинскиот свет.

Ги слушам се прашуваат меѓу себе: ’Денес ќе си одиме во Скопје’? Другото одговара: ’Да’. И првото му вели: ’Аааа, море јас ќе си заспијам тука, па да видиме’…

Беше многу убав сончев ден, исполнет со многу љубов и радост, ден во кој се оствари еден сон на многу дечиња, а мене ми е бескрајно мило што имав можност да бидам дел од тоа. Огромна е благодарноста кон Сенсеи и кон Таки, бидејќи благодарение на нив можев да се ’завртам на рингишпилот’ во тој прекрасен детски свет.

Нека растат децата. Нека расте секцијата на Нинџа Клинци-те, а ние сме тука да ги подржиме максимално на Патот. Кој еднаш ќе го пронајде Патот, нема скршнување“.

Нинџа Клинци-те во посета на Хомбу Доџо-то

koryuоктомври 2, 2015Почетна

Инструкторите на Буџинкан Македонија од секцијата „Нинџа Клинци“, во соработка со главниот инструктор на Организацијата за изучување на јапонски класични боречки вештини „Пат кон Сонцето“, организираат еднодневна екскурзија со тренинг во Хомбу Доџо-то на Буџинкан Македонија, лоцирано во долината под планината Липац (62 км. Од Скопје).

Датум: 03 октомври (сабота)

Програма:
– 08:00 поаѓање од Скопје
– 09:00 пристигнување
– 10:00 – 12:00 тренинг во Хомбу Доџо-то
– 12:00 – 12:30 ручек
– 13:00 – 14:00 посета на селско домаќинство со фарма
– 14:00 – 15:00 тренинг со меч (гумиран)
– 15:00 – 16:00 прошетка покрај река
– 17:00 враќање назад

Децата треба да си понесат опрема за вежбање, резервна маичка, вода (за по пат), грицки или банана за ужина, а за ручекот ќе се погрижат луѓето кои се одговорни за работата на Хомбу Доџо-то. За време на екскурзијата, децата постојано ќе бидат придружувани и под надѕор на двајца инструктори (Таки Гаковски и Сања Симонова).

За повеќе информации, обратете се кај инструкторот Таки Гаковски (тел: 071 358 226).

Нова група за најмладите - Нинџа Клинци II

koryuсептември 28, 2015Почетна

На барање на родителите чии деца не се во можност да вежбаат во вторник и во четврток поради учество на други активности (англиски јазик, балет, музичко училиште), Буџинкан Македонија од октомври отвора уште една група „Нинџа Клинци II“, која што ќе работи во понеделник и среда од 18:00 до 19:00 часот.

Се надеваме дека на овој начин ќе можеме да им излеземе во пресрет на сите дечиња кои се заинтересирани за изучување на вештините на јапонските самураи и нинџи.

За повеќе информации, слободно обратете се на инструкторот кој ќе биде задолжен за водење на новата група – семпаи Тодор Ангеловски (071 510 593).

Нинџа Клинците на Буџинкан Македонија - гости во националната Македонска Телевизија

koryuсептември 17, 2015Почетна

Детската секција на Буџинкан Македонија односно Нинџа Клинци-те, вчера достоинствено го претставија нашето доџо за време на гостувањето во емисијата „Голем Одмор“ што секојдневно се прикажува на МТВ1.

Предводени од инструкторите одговорни за нивната работа, семпаи Тодор Ангеловски и кохаи Таки Гаковски, нашите најмлади членови ги демонстрираа техниките од Саншин но Ката и основните зафати од Кихон Хаппо.

Покрај добиените пофалби од страна на вработените во националната телевизија, во текот на денешниот ден добивме и многу мејлови во кои се искажува подршка кон нивната упорност и трудољубивост, како и честитки за добрата демонстрација на вештините кои ги узучуваме во Буџинкан Македонија.

Веруваме дека дечињата и понатаму ќе продолжат да работат вредно како и досега и дека секогаш подготвено ќе ги „бранат боите“ на нашето доџо.

Јапонските класични боречки вештини во Македонија се издигнуваат на академско ниво

koryuсептември 15, 2015Почетна

На 14 септември, 2015 година, на седницата на Стручниот совет на Институтот за етнологија и антропологија, членовите на колегиумот едногласно го одобрија предлог-проектот на Игор Довезенски за отворање на „Лабораторија за Источни Култури“ во рамките на Институцијата, со што за прв пат во Македонија класичните јапонски боречки вештини се издигнуваат на академско ниво.
Со тоа, студентите кои студираат на ИЕА, во рамките на предметите „Етнологија на Азија“ и „Етнологија на Јапонија“ задолжително ќе посетуваат настава при што за време на вежбите ќе ја изучуваат теоријата, но и техниките на вештините кои што се предаваат

во Организацијата „Пат кон Сонцето“.

Инструкторот Игор Довезенски, ја користи оваа прилика да ја изрази својата огромна благодарност кон Раководителот на Институтот за етнологија и антропологија, д-р Љупчо Ристески, како и кон сите останати колеги за безрезервната подршка во остварувањето на идејата.

Истовремено ги информираме сите средношколци во Република Македонија кои се интересираат за источните култури, но и сите љубителите на културата и традицијата на „Земјата на Изгрејсонцето“, дека со запишувањето и студирањето на Институтот за етнологија и антропологија, ќе имаат можност да се стекнат со знаења од областа на материјалната, социјалната и духовната култура на Јапонија.

Уписи во Буџинкан Македонија и почеток на второто полугодие

koryuавгуст 31, 2015Почетна

Иако Доџо-то за класични јапонски самурајски и нинџа вештини „Буџинкан Македонија“, врши уписи во текот на целата година, сепак месецот септември е најповолен момент за да отворите една нова страница од Вашата животна историја.

Ги известуваме сите заинтересирани дека првиот час за почетниците ќе се одржи на 1 септември, со почеток во 20:30 часот, додека напредната група продолжува со својата работа еден ден подоцна (во 20:00 часот).

За тие што се уште не се запознаени со нашата работа, доџо-то е основано на 02 јули, 1995 година и засега е единственото во нашата држава признаено од страна на поглаварот на Буџинкан, соке Масааки Хатсуми.

Буџинкан Македонија важи за еден од најдинамичните клубови во Европа со многубројно и активно членство и со најмногу активности организирани во текот на целата година.

Во рамките на доџо-то постојат повеќе секции за возрасни (од 13 до 113 години), но и за деца (од 5 до 12 години).

Повеќе информации за нас можете да добиете на следниот линк http://hombu.koryu.mk/article/show/448

За инструкторот на Буџинкан Македонија http://hombu.koryu.mk/article/show/461

За термините и за локацијата http://hombu.koryu.mk/article/show/454

Ве молиме доколку имате прашања, не стеснувајте се да не контактирате преку daito_macedonia@yahoo.com или на 077 976 906.

Одржан Интернационалниот Летен Корју Камп VII

koryuавгуст 15, 2015Почетна

Седмиот по ред Летен Нинџа Камп кој оваа година беше одржан под името Интернационален Корју Камп – успешно заврши. Преименувањето беше сосема оправдано ако се земе предвид дека покрај гостинот-предавач од Русија, Сергеј Бабкин, оваа година за прв пат имавме и учесник од Полска.

Деветдневниот настан кој се смета за еден од најважните и најинтензивните во Буџинкан Македонија, според зборовите на

партиципиентите и оваа година беше беспрекорно организиран. Тренинзите беа поделени меѓу инструкторите Игор Довезенски и Сергеј Бабкин, така што деновите изобилуваа со активности од утро, па до мрак.

Секој ден започнуваше со утринско трчање и истегнување на телото, а после доручекот учесниците ги изучуваа тајните на борење со долг стап (Боџутсу) на вештината Кукамишин рју. За ова беше задолжен инструкторот Сергеј Бабкин, кој исто така, секојдневно „држеше“ тренинзи и за начините на рехабилитација на телото преку специјални начини на истегнување на мускулите (Џунан Таисо).

Шидоши Игор Довезенски ја предаваше вештината на борење со тело Шинден Фудо рју Џутаиџутсу, а беше одговорен и за кондиционата подготвеност на учесниците односно за зајакнување на мускулите на телото преку специјални вежби (Џунан Ундо). Освен ова, инструкторот на Буџинкан Македонија не ги запостави ниту таканаречените „Ноќни Нинџа Акции“, кои секоја година го прават овој настан толку примамлив и познат.

Што се однесува до другарувањето, како и секоја година тоа беше на највисоко можно ниво. Деветдневното дружење создава неверојатно длабоки врски меѓу членовите на нашето доџо кои стануваат темел за уште поголема соработка во периодот кои следи во иднина.

За храната, организаторите и оваа година добија највисоки оценки. Природна и свежо набрана директно од бавчата што се наоѓа пред Хомбу Доџо-то. Внимателно одбрана и сервирана за да ги надополни сите загубени материи во телото, а истовремено да даде сила за тешките и напорни тренинзи.

На крајот останува да се пренесат импресиите на учесниците кои секоја година нагласуваат дека легендарните Кампови на Буџинкан Македонија не само што стануваат синоним за тежок и напорен летен тренинг, туку се повеќе служат како патоказ на останатите клубови во Европа за тоа како треба да се организира настан со сличен формат. Ние и понатаму ќе продолжиме да го подигнуваме стандардот на Буџинкан во светски рамки, а секако ќе го зголемуваме и квалитетот на нашите Летни Кампови.

Следниот Интернационален Летен Корју Камп VIII ќе се одржи повторно на истиот датум (04-12 август, 2016) и повторно покрај инструкторот Игор Довезенски ќе биде поканет уште еден учител со светско реноме, бидејќи нашиот стремеж е секоја година да покануваме различни инструктори, а се со цел уште подлабоко да навлеземе во тајните на традиционалните јапонски борбени вештини.

До следната година…