Категорија: Почетна

Author dovezenskiPosted on април 17, 2018април 17, 2018Categories Почетна

Во дворот на Хомбу Доџо-то на Организацијата „Пат кон Сонцето“, во неделата се одржа традиционалниот семинар за Чигирики. Ова необично оружје, составено од стап на кој е закачен ланец со тег, во минатото било составен дел од арсеналот на неколку јапонски боречки школи. За жал, денес многу малку практичари се трудат да ја задржат традицијата преку неговата употреба односно преку вежбање со истото.

За време на семинарот се извежбаа вкупно девет техники, откако претходно инструкторот Довезенски ги објасни положбите, блоковите како и нападите со Чигирики.

Без сомнение и следната година повторно ќе организираме семинар на истата тема, бидејќи сме сигурни дека еден комплетен борец, мора одлично да го познава целиот арсенал на оружја кои се користеле од страна на јапонските легендарни воини – Самураите и Нинџите.

Author dovezenskiPosted on април 2, 2018април 2, 2018Categories Почетна

Со голем интерес беше дочекан семинарот за ракување со јапонска палка од периодот Едо – позната под името Џутте.

Инструкторот Игор Довезенски во неделата ги подучуваше своите ученици на техниките на користење на Џутте од школата Кукишинден рју Хаппобикен, а тие неуморно го впиваа секое знаење од учителот.

Веднаш на почетокот, учесниците имаа можност да се запознат со основните удари со самурајската челична палка, а потоа и да ги вежбаат петте кати од оваа стара ‘Сого Буџутсу’ школа.

На општо задоволство, на крајот се донесе заклучок дека викендов што измина беше еден од најинтересните досега во Хомбу.

Author dovezenskiPosted on април 2, 2018април 2, 2018Categories Почетна

Во саботата во дворот на Хомбу Доџо-то беше одржан семинар за ракување со Тоами односно рибарска мрежа – едно од таинствените оружја од арсеналот на легендарните јапонски Шиноби воини.

На настанот, учителот Игор Довезенски ги подучуваше учесниците на техниките на користење на Тоами и начините на фрлање и на борба со мрежа.

Многу е тешко да се опише воодушевеноста на присутните при изведувањето на самите техники од страна на инструкторот, а главното прашање на крајот од настанот беше: „Кога ќе биде следниот семинар?“

Author dovezenskiPosted on март 26, 2018март 26, 2018Categories Почетна

Вчера во дворот на Хомбу Доџо-то на „Пат кон Сонцето“ по девети пат се одржа традиционалниот семинар насловен како „Силата на Јари“.
Помладите членови на Буџинкан Македонија имаа можност да ги учат техниките на борба со копје и истовремено да го почувствуваат духот на минатото, додека напредните ги повторуваа веќе стекнатите знаења.

Иако првично беше предвидено семинарот да се одржи на ливадата лоцирана на ивицата на шумата Млака, поради дождот кој паѓаше речиси во текот на целиот ден, инструкторот Довезенски одлучи учесниците да вежбаат во дворот на Хомбу-то.

По завршувањето на настанот, на интерниот Форум, шидоши хо Марко Опачиќ ги охрабри помладите членови на доџо-то поредовно да учествуваат на семинарите во природа и во централното доџо на Буџинкан Македонија:

– Беше прекрасно да се вежба пред Хомбу Доџо-то. Копјето е неверојатно оружје со кое е навистина тешко да се ракува, иако во рацете на Сенсеи тоа изгледа лесно како да држи стапче од памук. Времето не ни се погоди, постојано врнеше ситен и ладен дожд и постојано газевме по кал, но без разлика на тоа, си поминавме прекрасно. Иако девет години по ред учествувам на овој семинар, секогаш откривам нови детали и секогаш Сенсеи кажува по некој нов куден. Какви се само преубави тие моменти поминати во Хомбу опкружен со прекрасни луѓе, соборци, браќа, сестри…

Следната сабота имаме Тоами Џутсу, а веќе наредниот ден и Џутте. Се гледаме повторно.

Author dovezenskiPosted on март 26, 2018март 26, 2018Categories Почетна

Водачот на Буџинкан Македонија, Игор Довезенски, во саботата одржа еднодневна обука за гаѓање со шурикени. На настанот учествуваа шестмина членови на Буџинкан Македонија од различни возрасти и степени на знаење.

За време на обуката, учителот Довезенски предаваше техники на гаѓање од најразлични положби на телото, како при мали, така и при големи растојанија.

Обуката за гаѓање со проектилни оружја (Шурикен Џутсу) вообичајно се изведува еден ден пред семинарот со копје (Јари), при што секогаш се внимава да се поправат сите грешки кои почетниците најчесто ги прават при вежбањето на оваа стара јапонска вештина.

Author dovezenskiPosted on март 5, 2018март 6, 2018Categories Почетна

Во скопското доџо на Буџинкан Македонија, инструкторот Игор Довезенски вчера одржа четиричасовен Не Ваза семинар на кој учествуваа неколкумина членови на доџо-то.

На настанот се изучуваа и вежбаа техники на транзиција односно преминување од една во друга положба кога противникот е во офанзива (Таи Нагаши), потоа контра техники (Каеши Ваза), како и зафати и давења (Кансетсу и Шиме Ваза).

На наше големо задоволство, на семинарот учествуваше и Менка Стојаноска, македонскиот неколкугодишен шампион во БЏЏ, Борење, како и во други дисциплини во кои борбата на земја е приоритет. Како девојка која првите чекори во јапонските боречки вештини ги започнала токму во нашето доџо, Стојаноска секогаш ќе биде добредојдена и ќе ја има нашата подршка во текот на својата кариера.

Ова воедно беше последниот семинар во доџо-то во Скопје, а веќе од следната недела, Хомбу Доџо-то ги отвора вратите за своите членови, како и за останатите граѓани кои сакаат одблиску да се запознат со традиционалните јапонски боречки вештини.

Author dovezenskiPosted on февруари 26, 2018февруари 27, 2018Categories Почетна

Вчера во Хомбу Доџо-то на Организацијата „Пат кон Сонцето“ беше одржан последниот семинар под наслов „Харагеи“.

Како што шидоши Довезенски претходно најави, од следната година техниките за развивање на сетилата и на будноста на телото ќе се изучуваат во рамките на новиот настан кој ќе се одржува под името „Сеишин Теки Кјојо“ односно духовно усовршување на Воинот.

Иако вчерашниот семинар требаше да се одржи во природа поточно на ридот Еленац, сепак во последен момент одлуката беше сменета. Всушност, пред самиот старт, силниот ветер проследен со снежни врнежи беше толку ладен, што за кратко време ги смрзнуваше прстите и лицето. А за медитација, сепак е потребно барем малку подобри услови, за таа да биде успешна. Поради тоа, настанот беше префлен во Хомбу-то.

Дами и господа, се гледаме следната година на ново место и со нова тема на проучување со која ќе го продолжиме ова несекојдневно духовно истражување.

Author dovezenskiPosted on февруари 18, 2018февруари 18, 2018Categories Почетна

На 25 февруари ќе се одржи последниот семинар на тема „Харагеи“. Инструкторот Игор Довезенски одлучи дека пет години беа доволно за да неговите ученици се запознат со овие техники, а отсега тие ќе продолжат да се изучуваат преку друг семинар кој ќе биде ставен на листата од следната година.

Хара ( 腹 ) е јапонски збор за стомак, додека Геи ( 芸 ) означува уметност. Меѓутоа, во боречките вештини зад овој збор се крие комплетен принцип на внатрешна и надворешна комуникација преку самоспознавање и навремено откривање на промените кои се случуваат наоколу. Учителите за Зен, со векови наназад подучуваат дека дишењето со Хара (стомак) го чисти умот од секакви мисли и овозможува поглед длабоко во себе. Токму тоа согледување на внатрешните и на надворешните промени, се верува дека на воинот ќе му овозможи навреме да ја препознае опасноста и истовремено да реагира. Ваквиот тренинг за култивирање на внатрешната енергија, познатиот зен-монах Такуан Сохо го нарекувал „вежба на неподвижниот ум“.

Замислете ситуација, Вие и Вашиот противник сте одалечени два метра еден од друг со вперени катани во срцата. Тензијата се зголемува и само еден погрешен здив или едно трепкање со окото може да Ве дели од животот и смртта. Да го препознаете нападот, да го почуствувате моментот кога треба да се реагира, е од клучно значење.

Оваа година за последен пат, инструкторот Довезенски ќе ги подучува своите ученици како да ја зголемат будноста, а со тоа и да ја подобрат својата борбена вештина. Тие што досега учествуваа на сите „Харагеи“ семинари, имаат доволно искуство да можат да ја пренесат оваа вештина на помладите членови од доџо-то, а нивното надградување ќе продолжи од следната година, преку проширување на вештината со други техники потребни за усовршувањето на секој Воин.

Ден: 25.02.2018 (недела)

Место: Еленац

Програма:
08.00 часот – поаѓање од Скопје

09.00 часот – пристигнување

10.00 – 16.30 часот – теоретски и практичен дел

17.30 – враќање назад

Семинарот е отворен само за членовите на Пат кон Сонцето, но може да се присуствува на истиот и со препорака од личност што негува пријателски односи со нашето доџо. Прашања и пријавување на и-мејл, на телефон, во доџо или на Форум.

Author dovezenskiPosted on февруари 18, 2018февруари 18, 2018Categories Почетна

Вчера во доџото на Буџинкан Македонија се одржа третиот по ред „Детски Нинџа Маратон“. На задоволство на сите, дечињата имаа можност пет саати да вежбаат и да се забавуваат под надзор на нивните Инструктори, како и под будното око на Водачот на „Пат кон Сонцето“ – шидоши Игор Довезенски.

Ова воедно беше последниот маратон за првото полугодие, а следните ќе продолжат дури во ноември. Меѓутоа, Нинџа Клинци-те сега ги очекува пролетната екскурзија во Хомбу-то на Организацијата, како и најдобриот настан што се организира специјално за нив: „Детскиот Нинџа Камп“.

А дотогаш, дечињата ќе продолжат со напорната работа со цел да се усовршат и оспособат за многуте предизвици со кои неминовно ќе се сретнат во текот на понатамошниот развој и живот.

Продолжуваме одговорно да чекориме по Патот.

Author dovezenskiPosted on февруари 15, 2018февруари 19, 2018Categories Почетна

Под покровителство на Јапонската агенција за меѓународна соработка – JICA, како и на јапонската амбасада во Македонија, а на барање од Здружението МАК-ЈАМС од Скопје, Доџо-то за класични јапонски борбени вештини „Пат кон Сонцето“ организираше презентација (Ембу) на Буџутсу, Аикиџуџутсу и Нинџутсу (вештините).

Настанот се одржа завчера на Институтот за етнологија и антропологија при ПМФ – Скопје, во присуство на околу триесетина гости, меѓу кои и јапонскиот конзул во Македонија, неговата екселенција Тојоказу Кубота придружен од неговата прекрасна сопруга.

На демонстрацијата учествуваа водачот на доџо-то Игор Довезенски, како и членовите Марко Опачиќ, Зоран Тодоровски, Владимир Антовски, Благица Божиновска, Таки Гаковски и Сања Симонова. Тие пред присутните ги демонстрираа јапонските класични боречки вештини односно школи кои се вежбаат во „Пат кон Сонцето“ – Теншин Шоден Катори Шинто рју Буџутсу, Даито рју Аикиџуџутсу, Гјокко рју Кошиџутсу и Кото рју Коппоџутсу.

На крајот од настанот, за време на скромниот коктел, конзулот Кубота во разговор со Довезенски кажа дека досега никогаш не бил толку импресиониран од некоја Буџутсу демонстрација, особено нагласувајќи дека почустувал неверојатен судир на енергиите меѓу учесниците на демострацијата што го потсетило на „јапонските монаси-воини“ од средновековниот период.