Буџинкан Македонија

Author koryuPosted on јули 31, 2007Categories Почетна

Ги известуваме сите наши членови и пријатели дека во текот на месецот
Житар (Август), Школото за борбени вештини-Пат кон Сонцето, како и
Нинџутсу Сојузот Буџинкан Македонија, нема да работат. Како што веќе
знаете, тоа е единствениот месец кога си дозволуваме малку одмор и
релаксација.
Истовремено, Ве потсетуваме дека на Вашите маилови ќе биде одговорено после 20 Август.
Со тренинзи започнуваме на 1 Гроздобер (Септември), на старо место и во исто време (и во Скопје и во Битола).
Уписите за новите членови започнуваат од 4 Септември, така што ги
повикуваме сите заинтересирани кои сакаат да ја проучуваат древната
јапонска вештина Нинџутсу, да не контактираат преку нашиот е-маил.
Ви посакуваме пријатен одмор…

Author koryuPosted on јули 30, 2007Categories Почетна

Во услови на вонредна кризна состојба прогласена од страна на Владата
на Република Македонија, настаната поради енормно високите температури
во државава, членовите на Буџинкан Македонија успешно го завршија
семинарот на тема „Преживување“.
За жал, тројца кандидати се откажаа и го напуштија кампот предвреме
поради неподносливата жед која беше предизвикана од дозволените две
матарки вода во текот на првите 24 часа.
Логорот беше подигнат на местото викано „Смкнено“ на ридот „Лачуга“
односно на место без никакви сенки и дрвја, туку само голи карпи и
камења.
Двата дена беа исполнети со постојано уредување на кампот и вежбање на
нашата вештина. Слободно време не беше дозволено, а исто така, беше
забрането седнување на земја. Единствен одмор за двата дена беа
дозволените три часа спиење, кои и не беа искористени на најдобар
начин, поради необичните звуци кои доаѓаа од дувлото на лисицата
сместено во наша близина, а кое го откривме дури следниот ден. Во текот
на ноќта, стражарски групи го чуваа логорот, така што се помина во
најдобар ред.
Следниот ден беше уште потежок бидејќи температурата порасна за уште
некој степен (според термометарот 45 целзиусови), а водата беше
ограничена на само една матарка по човек (односно по нинџа :).
Истовремено, тренингот и уредувањето на кампот си продолжија со речиси
исто темпо.
Во текот на двата дена, нашите членови имаа можност да се запознат (или
усовршат) со вештините на користење на лак и стрела, фукија, шурикени и
меч, но се вежбаше и Интон Џутсу (вештина на невидливост и
камуфлирање), користење на петте природни елементи, техники на бешумно
движење, изострување на шестото сетило (харагеи), разни видови
медитации итн.
Единствена храна за време на целиот семинар беше по едно мало рипче
уловено со раце во блиската (пресушена) река, по четири речни школки
(само се џвакаа, а не се голтаа), по еден компир и по една пиперка
(„позајмени„ од една селска бавча-се извинуваме поради тоа и ветуваме
дека ќе надокнадиме) и по една рака пуканки (исто така „позајмени„).
По завршувањето на кампот, дехидрирани и изнемоштени се спуштивме до
пресушената река, во која ги допивме преостанатите неколку вирови полни
со ларви и црви.
Се на се, водачот на Буџинкан Македонија беше крајно задоволен од
своите ученици (и од себе самиот), затоа што, како што и самиот призна
на крајот, и тој го дал својот максимум.
Голем поздрав до учениците (јунаците) на Буџинкан Македонија од
скопското и битолското доџо: Александар, Марјан Н., Зоки, Марко, Роберт
и Милан, кои успешно го завршија семинарот, со песната „Се гледаме на
микробиологија“ :), а на останатите наши другари од доџото им
посакуваме следната година повторно да се пријават на „Преживување“ и
успешно да го поминат тестот (макар и фатиле глисти во цревата).

П.С. Колаж фотки во „Семинари“ и во „Фото галерија“.

Author koryuPosted on јули 12, 2007Categories Почетна

САМО ЗА НАЈУПОРНИТЕ, НАЈСИЛНИТЕ, НАЈХРАБРИТЕ И НАЈИЗДРЖЛИВИТЕ…

БУЏИНКАН МАКЕДОНИЈА И ПАТ КОН СОНЦЕТО (ХОМБУ ДОЏО) ВИ НАЈАВУВААТ

ЛЕТЕН НИНЏА СЕМИНАР НА ТЕМА:

ПРЕЖИВУВАЊЕ ВО ПРИРОДА

ДВА ДЕНА ВО ПРИРОДА БЕЗ КУПЕНА И ГОТОВА ХРАНА, ВОДА, ОБЛЕКА И ХИГИЕНСКИ СРЕДСТВА

ДВА ДЕНА ВЕЖБАЊЕ, МЕДИТАЦИЈА И ПРЕЖИВУВАЊЕ

ТЕМА: ПРЕЖИВУВАЊЕ ВО ПРИРОДА

МЕСТО: ЛАЧУГА

ВРЕМЕ: 28 И 29 ЈУЛИ, 2007 ГОДИНА

ЦЕНА: 1.200 ДЕНАРИ (ЗА ДВАТА ДЕНА)

ПРОГРАМА:

САБОТА:

08.00-09.30 ТРЕНИНГ ТАИЏУТСУ
09.30-14.00 РАСПОРЕДУВАЊЕ ОБВРСКИ, ЛОВ, ГОТВЕЊЕ И ИЗГРАДБА НА КАМП
14.00-14.30 РУЧЕК (ЗАВИСИ ОД УЛОВОТ)
14.30-17.00 ТРЕНИНГ СО ОРУЖЈА (ЛАК И СТРЕЛА, ШУРИКЕНИ, ФУКИЈА)
17.00-19.30 СРЕДУВАЊЕ НА КАМПОТ, ЛОВ И ГОТВЕЊЕ
19.30-20.00 ВЕЧЕРА (ЗАВИСИ ОД УЛОВОТ)
20.00-21.00 ТРЕНИНГ ТЕОРИСКИ ДЕЛ
21.00-23.30 ТАИЏУТСУ ТРЕНИНГ
23.30-24.00 РАСПОРЕДУВАЊЕ СТРАЖА И ПОДГОТОВКА ЗА СПИЕЊЕ
00.00 СПИЕЊЕ
 
НЕДЕЛА:

07.00 СТАНУВАЊЕ И РАСПОРЕДУВАЊЕ ОБВРСКИ
07.30-08.00 ДОРУЧЕК (ЗАВИСИ ОД УЛОВОТ)
08.00-10.00 ТРЕНИНГ ТАИЏУТСУ
10.00-10.30 МЕДИТАЦИЈА
10.30-14.30 СРЕДУВАЊЕ НА КАМПОТ, ЛОВ И ГОТВЕЊЕ
14.30-15.00 РУЧЕК  (ЗАВИСИ ОД УЛОВОТ)
15.00-17.00 ТРЕНИНГ СО ОРУЖЈА (ЛАК И СТРЕЛА, ШУРИКЕНИ, ФУКИЈА И БОКЕН)
17.00-18.30 СОБИРАЊЕ НА КАМПОТ
18.30-19.30 СРЕДУВАЊЕ ВПЕЧАТОЦИ
19.30 ПОАЃАЊЕ
 
ДОЗВОЛЕНА ОПРЕМА ВО КАМПОТ: ВРЕЌА ЗА СПИЕЊЕ, ШАТОРСКО КРИЛО, ВОЈНИЧКА
УНИФОРМА (ПАНТАЛОНИ И КОШУЛА), ЕДНА МАИЦА, КАПА, ЕДЕН ПАР ГАЌИ
(ШИРОКИ), ЕДЕН ПАР ЧОРАПИ, ЈАЖЕ, НОЖ, МАТАРКА, ФУКИЈА И СТРЕЛКИ, ЛАК И
СТРЕЛА, ШУРИКЕНИ И БОКЕН.

ВАЖНО: ЗАБРАНЕТО НОСЕЊЕ ХРАНА, ВОДА И ОСТАНАТИ РАБОТИ КОИ НЕ СЕ НАВЕДЕНИ ПОГОРЕ.

НАЈВАЖНО: СЕМИНАРОТ Е ПРЕДВИДЕН САМО ЗА „ЦВРСТИ МОМЦИ И ДЕВОЈКИ“.
УСЛОВИТЕ ЗА ТРЕНИНГ ЌЕ БИДАТ ИСКЛУЧИТЕЛНО ТЕШКИ, А ДИСЦИПЛИНАТА ЌЕ БИДЕ
ЖЕЛЕЗНА. ТИЕ КОИ НЕ СЕ ЧУСТВУВААТ ПСИХОФИЗИЧКИ СПРЕМНИ ЗА „ВО ПЕКОЛ“ И
КОИ НЕ СЕ ПОДГОТВЕНИ ДА ГО УБИЈАТ СОПСТВЕНОТО ЕГО, ГИ МОЛИМЕ ДА НЕ СЕ
ПРИЈАВУВААТ ЗА СЕМИНАРОТ.

ПРИЈАВУВАЊЕ И ПЛАЌАЊЕ ДО 25 ЈУЛИ КАЈ СЕКРЕТАРОТ НА КЛУБОТ

ЗА БИЛО КАКВИ ДОПОЛНИТЕЛНИ ИНФОРМАЦИИ, НЕ ВОЗДРЖУВАЈТЕ СЕ ДА НЕ КОНТАКТИРАТЕ ПРЕКУ НАШИОТ Е-МЕИЛ.

Author koryuPosted on јули 3, 2007Categories Почетна

Ниту високата температура на воздухот, ниту 6-часовното постојано
вежбање во речна вода (при тоа со облека на себе), не можеше да ги
поколеба воините од Хомбу Доџото на Буџинкан Македонија да ја совладат
вештината Суи Рен.
Тренингот започна во 09.00 часот, кога учениците и учителот веднаш
влегоа во ладната вода започнувајќи со изучување на основните техники
на обуката во вода.
Како што температурата во водата се зголемуваше, така и учесниците на
семинарот го зголемуваа своето знање и постигнуваа се подобри
резултати. Тие имаа можност да испробаат како функционираат таиџутсу
техниките во услови кога телото до пола се наоѓа во вода. Врв на се
беше успешното дишење во вода низ цевка (фукија или корица од меч), при
што секој ученик издржа пет минути под вода без никакви проблеми.
Освен тоа, членовите на Хомбу Доџото на Буџинкан Македонија научија
како да обезбедат храна и да ја прочистат речната вода за пиење, но и
многу други работи за кои нема доволно место да се напише тука.
Се на се, на огромно задоволство на сите, семинарот беше повеќе од
одличен, како и дружењето на „ѕверовите“ од Буџинкан Македонија кое
заврши со убав селски ручек (како и секогаш).   
Видете го колажот фотографии во „Семинари“, а наскоро и фотографиите во Фото галеријата.

Author koryuPosted on јуни 18, 2007Categories Почетна

На 1 јули, 2007 година, Буџинкан Македонија ќе организира семинар во природа на тема Суи Рен (обука во вода). Ова е одлична можност за сите наши членови да научат повеќе за оваа вештина која е една од 18 основни боречки вештини (Ninja Juhakkei), што секој нинџа морал да ги совлада за време на својата обука. Истовремено ве известуваме дека ова е предпоследен семинар во природа за овој семестар.

Тема: Суи Рен / средства за преминување преку вода, водата како оружје, алатки за дишење под вода, невидливост во водена средина, преживување преку обезбедување вода за пиење итн. (дел од техниките кои ќе се учат на семинарот)

Ден: 1 јули, 2007 (недела)

Место: Глушчево Ѓерме на Крива Река

Програма: 08.30 часот – поаѓање од Скопје
09.30 часот – пристигнување
10.00 -16.00 часот – теоретски и практичен дел
17.00 ручек
17.30 враќање назад

Цена: 1.200 денари (во цената е вклучено: семинарска такса, превоз и ручек)

Сите учесници добиваат сертификат за Суи Рен.

Семинарот ќе се одржи без разлика на временските услови.

Author koryuPosted on јуни 15, 2007Categories Почетна

Известувања

-Во недела редовен тренинг во Хомбу Доџо-то на тема Таихен Џутсу.
Почеток во 11.00 до 15.00 часот.

-Истовремено ве известуваме дека во продукција на Пат кон Сонцето Хомбу
Доџо излегоа два ДВД наслови и тоа: „Кукишинден Рју семинар Македонија
2007“ со Дејвид Холт и „Буџинкан Македонија семинар во Битола 2007“.

Цената на секој од насловите е 10 евра (за членовите на Буџинкан Македонија) односно 30 евра (за останатите).

Author koryuPosted on мај 28, 2007Categories Почетна

Во организација на Школото за борбени вештини Пат кон Сонцето-Битола,
во неделата во Битола се одржа семинар на тема Кихон Хаппо. На
семинарот учествуваа членови од битолското доџо, како и членови од
Хомбу Доџо-то од Скопје.
На семинарот се работеа осумтте основни техники на Буџинкан Будо
Таиџутсу (Bujinkan Budo Taijutsu), а за секоја техника беа прикажани и
по неколку варијанти. Покрај техничките карактеристики, присутните на
семинарот имаа можност да се запознат и со психолошкиот аспект на
техниките.
На семинарот беа доделени и две дипломи за 7 кју на Момо Белески и на Марјан Наумовски.
По барање на членовите од битолското доџо, беше договорено набрзо да се одржи уште еден семинар во овој град.
Истовремено ве потсетуваме дека нашата организација Буџинкан Македонија
(Bujinkan Macedonia) е членка на светската нинџутсу организација
Буџинкан Доџо под водство на големиот мајстор Соке Масааки Хатсуми. 

Author koryuPosted on мај 16, 2007Categories Почетна

На 27 мај, 2007 година, во организација на Школото за борбени вештини
Пат кон Сонцето-Битола, ќе се одржи првиот нинџутсу семинар во овој
град.
Тема на семинарот ќе биде Кихон Хаппо (осум основни бесконечни
техники), преку кои учесниците ќе можат подобро да се запознат со
древната јапонска вештина нинџутсу.
По завршување на семинарот, ќе се одржи мала свеченост на која ќе бидат
доделени дипломи, со што и официјално ќе биде отворен вториот Буџинкан
нинџутсу клуб во Македонија.
Истовремено, ги известуваме сите наши пријатели дека клубот во Скопје
се преименува во Пат кон Сонцето Хомбу Доџо (централно школо).

Тема: Кихон Хаппо
Време: 27 мај од 11.00 до 15.00
Место: Битола
Цена: 400 денари

Author koryuPosted on мај 14, 2007Categories Почетна

Во месноста Пударница на планината Липац, во тешки временски услови,
успешно се одржа семинарот Јуми Ја Џутсу (вештина на користење лак и
стрела). На семинарот учество земаа четворица ученици од почетничката
група на Школото за борбени вештини Пат кон Сонцето.
Семинарот започна со подготовка на материјалот за изработка на лак и
стрела, кој многу лесно може да се најде во нашата природна средина.
Потоа, започна искачувањето до местото предвидено за вежбање-Пударница,
кое се наоѓа на околу 750 м.н.в., а при тоа, сите учесници беа
оптоварени со соодветна борбена опрема. Температурата беше 34 степени,
а патот беше обраснат со густи грмушки и трња, но сепак, тоа не ги
поколеба нашите упорни вежбачи.
По пристигнувањето во Пударница, се започна со теоретскиот дел односно
со предавање за историјата, начинот на изработка, филозофијата како и
за стратегијата и техниките потребни при користењето на лакот и
стрелата.
Потоа учениците беа запознаени со начинот на изработка на лак и стрела,
што повторно се покажа како најтежок дел од обуката. По ова, учесниците
вежбаа гаѓање од четири основни ставови (јуми ја камае), при што
покажаа задоволителни резултати.
Семинарот заврши со свечен селски ручек под сенка на стари ореови дрвја.
На крајот, беше договорено да се одржи уште еден семинар на оваа тема, со оглед на сложеноста на оваа вештина.

Author koryuPosted on мај 3, 2007Categories Почетна

На 13 мај, 2007 година, Буџинкан Македонија ќе организира семинар во природа на тема Јуми Ја Џутсу (вештина на користење лак и стрела).
Семинарот е од затворен тип односно на него ќе можат да учествуваат само членовите на нашата организација.
Учесниците на семинарот ќе можат да научат како се изработуваат овие
древни орудија, како и кога се користат, односно ќе се изврши комплетна
основна обука за користење на лакот и стрелата.

Ден: 13 мај (2007)

Место: „Рудник“ под ридот Орљак (ако врне), „Пударница“ на Липац (ако е суво)

Програма:    08.30 часот – поаѓање од Скопје
                     09.30 часот – пристигнување
                     10.00 -16.00 часот – теоретски и практичен дел
                     17.00 ручек
                     17.30 враќање назад

Цена: 1.200 денари (во цената е вклучено: семинарска такса, превоз, лак и стрела и ручек)

Сите учесници добиваат сертификат за основна обука на лак и стрела.