Скопското Доџо на Буџинкан Македонија беше претесно за да ги прими сите заинтересирани за традиционалната Работилница за Самоодбрана за Жени, која по 13 пат се одржа во организација на учителот Игор Довезенски.
Иако на почетокот беше предвидено да учествуваат само 25 припаднички на поубавиот пол, притисокот што постојано го вршеа и желбата да бидат дел од овој настан, не’ натера на три пати да ја зголемуваме квотата, се додека не бевме принудени да ја заклучиме бројката на 40 учеснички. И тоа само поради ограничениот простор кој го имаме на користење.
За време на Работилницата, учителот Довезенски ги подучуваше дамите на наједноставните техники за самоодбрана кои можат да се применат без некое големо искуство и вежбање.
Интересот за настанот беше толку голем, што многу од учесничките на 13-тата Работилница побараа почесто да се организираат вакви или слични настани, а некои од нив уште сега се пријавија за следните семинари во нашето Хомбу Доџо, кое наскоро ќе ја отвори новата сезона.