Буџинкан Македонија

Author dovezenskiPosted on март 31, 2025март 31, 2025Categories Почетна

Веднаш по завршувањето на саботниот ШурикенЏутсу семинар, семпаите Владимир Антовски и Михаил Дракалски беа тестирани за Нидан (2 дан) од страна на нивниот учител Игор Довезенски, при што двајцата успешно го положија тестот за повисок ранг.

Шикен-от (тестот) се состоеше од демонстрирање техники и кати од школата Гјокко рју Кошиџутсу, а потоа и рандори односно одбрана од двајца напаѓачи.

И двајцата кандидати покажаа одлично знаење, по што се здобија со дипломи за Нидан.

Честитки!

Author dovezenskiPosted on март 31, 2025март 31, 2025Categories Почетна

Ниту дождливото време не ги спречи Воините на Буџинкан Македонија да го одржат традиционалниот семинар за борба со копје „Силата на Јари“.

Овој традиционален настан по 16-ти пат се одржа во дворот на Хомбу Доџото на Организацијата „Пат кон Сонцето“, а учество земаа над 20 членови на Буџинкан Македонија.

Беше прекрасно да се гледат учениците на доџото од сите возрасти, како посветено ги изучуваат тајните на борба со копје од школата Шинден Фудо рју ДакенТаиџутсу, а учителот Игор Довезенски како несебично го споделува своето огромно знаење со нив.

Следниот семинар според програмата на Буџинкан Македонија ќе се одржи на 12/13 април на тема: Хоџутсу/ЈумиЈа.

Author dovezenskiPosted on март 31, 2025март 31, 2025Categories Почетна

Во саботата, во Хомбу Доџото на Организацијата „Пат кон Сонцето“, беше одржан семинар за ШурикенЏутсу, на кој учествуваа околу 20-тина членови на Буџинкан Македонија.

Се гаѓаше на три мети, при што учителот Игор Довезенски предаде точно осум различни техники кои учениците со задоволство ги повторуваа.

Вечерта, тој одржа и предавање на тема: „Харагеи – Начини да препознаеш и превенираш опасност“, по што следуваше дружба околу каминот со заедничка вечера односно палачинки.

Ова беше уште еден семинар за паметење и создавање преубави спомени, особено за најмладите членови на доџото.

Author dovezenskiPosted on март 16, 2025март 17, 2025Categories Почетна

На 29 март (2025), со почеток во 21.00 часот, во Хомбу Доџото на Буџинкан Македонија ќе се одржи предавање на тема: Харагеи – Начин да препознаеш и да превенираш опасност.

Сите што малку поинтензивно се дружеле со учителот Игор Довезенски, забележале дека при посета на некој објект или ресторан, тој се однесува малку неконвенцијално. Имено, многу внимателно внимава кои локали ќе ги посети, потоа при влезот дискретно ги „скенира“ гостите и вработените, внимателно ја бира масата на која ќе седи како и положбата која најчесто подразбира дека грбот треба да му биде свртен кон ѕидот. Секако, Довезенски внимава и на многу други детали, но резултат на сите овие предстрожности е неверојатната прецизност при проценката на луѓето и нивните особини – нешто што досега никогаш не се случило да згреши, особено при составувањето на сликата односно анализата на нивниот карактер.

Испровоциран од времето и од регионот во кои живееме, Довезенски одлучи дека е време овие вештини да се споделат со помладите членови на доџото, а се со цел да научат како да избегнуваат односно да се заштитат од несакани ситуации како што се вербални и физички провокации, можни телесни напади, кражби и пожари и сите други сценарија кои се надвиснуваат над младите генерации.

Предавањето е бесплатно и наменето за сите членови на Буџинкан Македонија.

Author dovezenskiPosted on февруари 23, 2025февруари 26, 2025Categories Почетна

Денес во скопското Доџо на Буџинкан Македонија се одржа последниот Детски Нинџа Самит за првото полугодие на 2025 година.

Со настанот раководеше шидоши хо Таки Гаковски, а на истиот учествуваа околу 20 дечиња од групата Нинџа Клинци.

Веќе за следниот месец се предвидува нов семинар, кој ќе биде изненадување за најмладите членови, а можеме уште сега да ветиме одлична забава и дружба.

Бидете трпеливи!

Author dovezenskiPosted on јануари 25, 2025јануари 28, 2025Categories Почетна

Под водство на семпаи Таки Гаковски, минатата сабота во скопското доџо на Буџинкан Македонија се одржа 10-тиот по ред Детски Нинџа Самит.

Како и на секој детски семинар, атмосферата беше неверојатна, а динамиката постојано беше засилувана како што семинарот течеше од почеток кон крај.

Последниот детски самит за првото полугодие на 2025 година ќе се одржи во февруари, со надеж дека борбените извици на најмладите вежбачи ќе се слушнат уште подалеку.

Author dovezenskiPosted on јануари 13, 2025јануари 13, 2025Categories Почетна

Со изучување на начините за зимско преживување, традиционално ја започнуваме секоја нова година, па така и оваа по 15 пат имавме можност да го збогатиме и усовршиме знаењето во оваа област.

На настанот кој се одржа во шумата Млака, во долината на Липац, учествуваа десетина воини на Буџинкан Македонија, кои неуморно работеа на сопствениот развој во текот на вчерашниот ден.

Истовремено, беше одржано и тестирање на знаењето за техниките на преживување во зима на Косара Довезенска, со што таа стана првата девојка во Буџинкан Македонија која била тестирана за овој тежок подвиг, но за жал не успеа да положи.

Неколку часа после настанот, водачот на Буџинкан Македонија напиша јавна порака по повод тестирањето на својата ќерка, која во целост ја пренесуваме тука:

„Оваа девојка е мојот херој на денот !

Денес Косара Довезенска беше првата девојка во Буџинкан Македонија што беше тестирана со тешкиот тест за „Преживување во зимски услови“, но за жал не успеа да го положи.

Тестот се состои од тоа што кандидатот е оставен сам во шума со нож и мало секирче, додека останатите од групата се оддалечуваат од него. Тој/таа треба да изгради живеалиште доволно силно за да издржи невреме, потоа да запали оган со кремен, како и многу други техники што нема потреба да се објаснуваат во детали.

За да нема привилегии и непотизам, бидејќи е ќерка на водачот на Буџинкан Македонија, за неа беше формирана комисија во која учествуваа сите Семпаи кои претходно успешно го положиле тестот.

Во 15.00 часот се упативме кон местото каде што беше оставена сама и кога ја видов целата во кал, премрзната, со скинати ракавици и покисната до гола кожа – како татко срцето ми се скина од жал, но како учител бев многу горд на неа, иако знаев дека нема да положи поради две грешки кои веднаш ги воочив.

Калосана во лицето, беше посебно симпатична, меѓутоа ништо не помогна во строгиот суд на Семпаите, кои ја оценија со истата строгост и праведност со која и јас ги оценував нив многу години порано.

Инаку, јас сум познат по својата строгост кога станува збор за напредување во Доџото, кое важи за едно од најдобрите на меѓународен план, а таа строгост од мене ја преземаа и моите најстари ученици (Семпаи). Тестот за зимско преживување е особено тежок, меѓутоа Косара ќе има шанса следната година да ги поправи своите грешки од оваа.

ТЕ САКАМ ТАТИНА!!! Се гордеам со тебе!!!

Никогаш не се предавај!!!“

Author dovezenskiPosted on јануари 2, 2025јануари 2, 2025Categories Почетна

Осетно намалување на семинарите во однос на 2023та, кога прокниживме дури 44, но сепак мораме да бидеме задоволни и со 31 што оваа година успеавме да ги организираме и одржиме. Велиме задоволни, бидејќи многу од енергијата и од средствата потребни за организирање настани, од оваа година драстично почнавме да ги вложуваме во изградбата на проектот „Јапонска Зен Градина и Нинџа Село“ во дворот на Хомбу Доџото. Доколку и во иднина сакаме да го задржиме епитетот „најдинамично нинџутсу доџо во светот“, ќе треба да најдеме рамнотежа меѓу планираното активирање на првата Јапонската Зен Градина во Македонија и нејзиното отворање за јавност и редовното организирање на легендарните семинари на Буџинкан Македонија.

Да почнеме со меѓународните семинари. Оваа година водачот на Буџинкан Македонија – Игор Довезенски, предаваше на три интернационални настани. Првиот се одржа во Македонија, каде што заедно со својот пријател од Турција (Ерџан Шарбат), предаваше на добропознатиот БуЈуКаи. По ова се одржа и предавањето на БуЈуКаи Србија односно во Нови Бечеј, а потоа следуваше и гостувањето во Истанбул каде што учителот Довезенски го споделуваше своето знаење со членовите на Буџинкан Турција.

Во годината што измина, учителот Игор Довезенски успеа да отиде два пати на редовното усовршување во Јапонија, при што вториот пат со себе ги понесе и своите ќерки Косара и Ксенија, со што тие добија можност да вежбаат и да го почуствуваат духот на јапонските нинџутсу учители. Двонеделните престои и успесите постигнати во Хомбу Доџото во Нода (Јапонија) е невозможно да се опишат во ваков краток извештај, па затоа ќе ги оставиме да бидат прераскажувани во иднина.

За време на летото, ги одржавме и нашите легендарни Летни Нинџа Кампови, како за децата, така и за возрасните. Тука треба да се спомене дека на шестнаесетото издание на кампот за возрасни, се постигна нов рекорд од 32 души, па така за 2025-та година бројката на дозволени учесници ја зголемуваме на 35 учесници.

Од другите настани, ќе ги споменеме: промоцијата на двете Буџинкан манги во градската библиотека во Нови Бечеј во Република Србија, организирана од страна на општината во рамките на манифестацијата „Здивот на јапонија“, потоа интернационалната и домашната проекција на филмот „Убиј ги прво децата“, во кој учителот Довезенски учествуваше како кореограф додека неговата ќерка Косара како дублер во боречките сцени, следува напредувањето односно сертифицирањето на Константин Анастасијевиќ за Шиноби Таисо (Шоден), како и интервјуто на водачот на Буџинкан Македонија за единствениот македонски портал за боречки вештини Ипон.мк. На Нафуда Каке во Хомбу Доџо имаме три нови имиња: Марина Јованова, Сара Гилеска и Љубомир Павловски.
Можеби најважниот настан за 2024-та година, покрај многубројните семинари, беше посетата на Хомбу Доџото на Буџинкан Македонија од страна на еминетниот професор од јапонскиот Универзитет во Мие и воедно водечки истражувач за историјата на легендарните Нинџа воини и нивната вештина Нинџутсу, д-р Јуџи Јамада.

За целосно да го сумираме резултатот на семинари во 2024та година, ќе дадеме краток преглед со бројки: 7 одржани нинџутсу семинари во скопското Доџо, 12 во Хомбу Доџото на Буџинкан Македонија и во природа, три меѓународни, два летни кампови, две двонеделни посети во Јапонија, пет Даито рју Аикиџуџутсу семинари од кои четири во Скопје и еден во Хомбу.

На крајот, сакаме да се заблагодариме на сите членови на Буџинкан Македонија, Даито рју Македонија и на Организацијата „Пат кон Сонцето“ кои со својата макотрпна работа овозможија и оваа година да уживаме во прекрасното патување низ светот на традиционалните јапонски боречки традиции. Повеќе не ветуваме дека следната година ќе постигнеме подобри резултати, но можеме да гарантираме дека се додека телото се држи на нозе, нема да ја намалиме љубовта кон борбените класични вештини наследени од генерациите пред нас.

Темата за првото полугодие на 2025 година ќе биде Кото рју Коппоџутсу.

Едно Доџо – Една Љубов! Буџинкан Македонија – лојалност, посветеност, чест.

Најубавата приказна која трае и не завршува!

Нинпо Иккан!!!

Author dovezenskiPosted on јануари 2, 2025јануари 2, 2025Categories Почетна

Како и секоја година, на крајот на декември се одржува полагањето за ученички степени и звања во Буџинкан Македонија, а потоа и прослава (БоненКаи) по повод успешната сезона на тренинзи.

Им честитаме на сите дечиња од детските групи кои успешно го положија тестот, како и на возрасните членови на Буџинкан Македонија за новите степени и звања.

Следната година да бидеме уште посилни!

Author dovezenskiPosted on декември 22, 2024декември 28, 2024Categories Почетна

Во саботата во скопското доџо на Буџинкан Македонија се одржа новогодишен Детски Нинџа Самит, на кој учество земаа рекордни 30 дечиња од детската група Нинџа Клинци.

Покрај одличниот тренинг, исполнет со многу забава, беше организирана и посета на Нинџа Дедо Мраз, кој донесе подароци за најмладите вежбачи, како и детска лотарија која премногу ги израдува малите нинџи.

На сите Нинџа Клинци им посакуваме се најубаво во новата 2025-та година.